bwiza.com
Ahabanza » Isesengura: Ese Kizito Mihigo yanze kugwa mu mutego washibukanye Ingabire Victoire ?
Featured

Isesengura: Ese Kizito Mihigo yanze kugwa mu mutego washibukanye Ingabire Victoire ?

Nyuma yaho Umuyobozi w’ishyaka  FDU-Inkingi,  Ingabire Umuhoza Victoire akatiwe igifungo cy’imyaka umunani nyuma yo guhamwa n’ibyaha  byo kugambanira igihugu, kurema umutwe w’abagizi ba nabi, akaza kujurira maze agatirwa n’urukiko rw’ikirenga imyaka cumi n’itanu, bishoboka ko Mihigo na we yasanze ko  aramutse ajuriye ashobora  kugererwa mu kebo kamwe na Ingabire.

Isesengura ry’igenga rya Bwiza.com ribona ko nta gitangaza kirimo ku cyemezo  cyo guhagarika ubujurire cyafashwe na Kizito mu ibaruwa ye yashyikirije urukiko rw’ikirenga.

Uyu Mihigo ntiyahwemye kugaragaza ko atiteguye guhangana mu nzira zinyuze mu butabera ubwo yemeraga ibyaha byose yashinjwaga ndetse akabisabira imbabazi mu mizi y’urubanza.

Ikindi kandi ni we wafashe iyambere ashwishuriza abamwunganiraga mu mategeko bakomezaga gushaka guhangana n’ubushinjacyaha barwana ku mukiriya wabo.

Kugeza magingo aya, tubona ko ibaruwa Kizito yanditse ku wa 26 Kamena ayicisha ku buyobozi bwa gereza, Urukiko rw’Ikirenga ruyakira ku wa 27 Kamena yaba yari ibumbatiye ubutumwa n’ubundi busaba imbabazi ubuyobozi bukuru bw’igihugu.

Ibi si ibitekerezo byacu gusa bishimangirwa n’amagambo umunyamategeko we, Me Antoinette  Mukamusoni yavuze ko yamubwiye.

Mihigo ngo yaramubwiye ati” “Yambereye umwana mwiza, arambwira ati urabizi ko naburanye nsaba imbabazi. Sinigeze mpakana ibyo ndegwa, urukiko rugiye kunkatira rwashingiye ku mategeko, nta kintu gishya njyanye mu rw’Ikirenga. Nzaburana iki? Nzaba ndi kunenga iki Urukiko rukuru rwankatiye?”

Kizito Mihigo ashobora kurekurwa?

Uretse kuba ataragoye ubutabera,  Kizito agaragara kenshi nk’umugororwa w’intangarugero mu mico no mu myifatire bitandukanye na Ingabire Victoire witabaje inzira zose ziteganywa n’ubutabera avuga ko ari umwere ko ibyo ashinjwa biterwa n’impamvu za politiki.

Byumvikanye kenshi inzego z’igihugu zimushima mu ruhame bityo akaba ashobora guhabwa amahirwe yo kwikosora.

Urugero dutanga ni amagambo y’umuvugizi w’Urwego rw’Igihugu rushinzwe Imfungwa n’Abagororwa, Sengabo Hillary ushimangira ko Mihigo ari umwe mu bagororwa bubahiriza ibyo asabwa, unagerageza kubana neza na bagenzi be.

Ku ruhande rumwe, n’ubwo Mihigo yahamwe n’ibyaha byo kugambanira igihugu, bizwi ko n’ubusanzwe atari umuntu w’inararibonye muri politiki cyanwa ngo agire inzozi zo kuba umuyobozi nk’uko abarwanya Leta y’u Rwanda (RNC) bamwizezaga imyanya y’igitangaza baramutse bafashe ubutegetsi.

Ikindi kandi Mihigo ntiyigeze ashungura ngo arebe ingaruka mbi zari kuva mu butumwa bugufi yohererezwaga n’abarwanya Leta binyuze kuri Skypee nk’uko inzego z’ubugenzacyaha zabishikirije ubushinjacyaha.

Tugendeye ku ngingo zavuzwe haruguru, Mihigo aramutse asabye gufungurwa yabihabwa cyane ko no mu ngingo ya 246 mu Itegeko ryerekeye imiburanishirize y’imanza z’inshinjabyaha ivuga ko usaba gufungurwa by’agateganyo ashobora kubyemererwa mu bihe birimo ‘ iyo yakatiwe igifungo kirengeje imyaka itanu akaba amaze gufungwa bibiri bya gatatu (2/3) byayo’.

Mu bigenderwaho, harimo kuba yagaragaje ibimenyetso bihagije by’ubwitonzi n’iyo agaragarwaho impamvu nyakuri zihamya ko azabana neza n’abandi.

Kizito amaze imyaka ine n’amezi atanu muri gereza. Bisobanuye ko mu gihe nk’iki mu myaka ibiri, azaba yujuje imyaka itandatu n’igice ingana na 2/3 by’igihano cye ku buryo yasaba gufungurwa by’agateganyo.

Kizito Mihigo yitabye Urukiko rw’Ikirenga kuri uyu wa 10 Nzeri 2018, Perezida w’Iburanisha atangira amubaza ku ibaruwa ye yo ku wa 26 Kamena 2018 isaba guhagarika ubujurire.

Ntihasobanuwe impamvu ku yindi yaba yaratumye Kizito na mugenzi we Jean Paul Dukuzumuremyi basaba guhagarika ikirego cyabo, uretse kubaza buri umwe niba agihagaze ku busabe bwe maze bombi bakabihamya badashidikanya.

Kizito yahamijwe icyaha cyo kurema umutwe w’abagizi ba nabi, icyaha cy’ubugambanyi bwo kugiririra nabi ubutegetsi buriho ndetse n’icyaha cy’ubwoshye bwo kugiririra nabi Perezida wa Repubulika n’icyo gukora umugambi w’icyaha cy’ubwicanyi mu wa 2014.

Yari yasabiwe n’ubushinjacyaha igihano cyo gufungwa burundu no kwamburwa uburenganzira bwose mu gihugu nyuma akatirwa gufungwa imyaka 10.

Gaston Rwaka & Fred Rugira M. Rugira/ Bwiza.com

 

 

 

 

 

 

 

Izindi wakunda

Bwiza.com
error: Ntibyemewe