bwiza.com
Amakuru

Kimisagara: Abafite ubumuga bakina ruhago barasaba ubufasha bwa Leta mu kurwanya akato

Abafite ubumuga bagendera ku mbago bakina umupira w’ amaguru  bakinira kuri Maison Des Jeunes ku Kimisagara,barasaba ko Leta y’  u Rwanda ko yabafasha kurwanya akato bakorerwa binyuze mu myidagaduro.

Aba bakinnyi b’ umupira w’ amaguru bavuga ko babonye ibikoresho bikenewe nk’ imipira yo gukina, imyenda ,inkweto  ndetsen’ ikibuga cyabugenewe byabafasha kwagura impano zabo ndetse bakanahura n’ abagenzi babo basangiye ikibazo mu Rwanda no mu mahanga.

Ibi byashimangiwe n’ Umutoza wa Kimisagara Amputee Football Club, Ugirimpuhwe Ennock mu kiganiro yagiranye na Bwiza.com ku gicamunsi cyo ku wa 12 Nzeri 2018.

Yatangiye atangaza ko we n’ abagenzi be batandatu barimo Rugwiro Audace, Shumbusho Theoneste mu mwaka wa 2014 bagize igitekerezo cyo kwishyira hamwe bakazajya bakina ruhago batitaye ku bumuga bafite.

Ugirimpuhwe yagize ati ‘Tumaze kubona ko harimo bagenzi bacu bari basanzwe bakina ariko bakaza kumugara ndetse hari n’ abandi bamugaye ariko bakagira isoni zo kwigaragaza bakina twahisemo gushinga ikipe ya ruhago”.

Abakinnyi b’umupira w’amaguru babana n’ubumuga mu kibuga cyo ku Kimisagara mbere y’umukino/ Photo: Bwiza.com

Akomeza avuga kandi ko mu ntangiriro bashinze ikipe ahanini bitewe n’ akato bahabwaga n’ abandi babuza  gukina bityo batangira gukodesha ikibuga cy’ umupira cya Maison Des Jeunes ku Kimisagara aho bishyuraga amafaranga ibihumbi 20 buri kwezi.

Tumubajije aho bakuraga amafaranga y’ ubwishyu bw’ ikibuga ndetse n’ ibindi bikoresha n’ imyenda, inkweto n’ imipira,  Ennock Ugirimpuhwe yavuze ko byose byagombaga kuva mu maboko y’ abanyamuryango nubwo bitaboreheraga.

Aba baturage barasaba Leta ko yabafasha muri iki gikorwa batangiye kuko ari ingirakamaro kuri bo.

Ugirimpuhwe  ati”  Iyi ruhago dukina yatumye turushaho kwegerana n’ abagenzi bacu ndetse binadufasha kwirema icyizere gikomeye ari nako binadufasha kumenya ko twifitemo impano zikomeye zihishe”.

Yanakomeje anasaba ababyeyi bafite abana babana n’ ubumuga buciriritse kutabatererana kuko  mu gihe amahirwe bashobora kubagirira akamaro kanini.

Kimwe na bagenzi be bakunda uyu mukino, Ugirimpuhwe  barasaba ko Leta y’ u Rwanda yababa hafi ikabafasha kumenyekanisha uyu mukino ku rwego mpuzamahanga.

Kugeza magingo aya, mu Rwanda hari amakipe agera ku 8 y’ ababana n’ ubumuga bakina ruhago ,muri aya hari Kimisagara Amputee FC, Huye ,Musanze,Gakenke, Rubavu , Gatagara , Kigali Amputee FC.

Uyu mukino wa ruhago w’ abantu babana n’ ubumuga ukinywa n’ abakinnyi 7 harimo n’ umuzamu ugomba kuba afite akaboko kamwe.

Mu bushobozi bwabo buke, hatagize igihinduka aba babana n’ ubumuga bakina umupira w’ amaguru barimo gutegura amarushanwa azabahuza mu Gushyingo 2018.

Gaston Rwaka/Bwiza.com

 

 

 

 

 

 

 

 

 

 

 

Izindi wakunda

Bwiza.com
error: Alert: Ntabwo byemewe!!