bwiza.com
Ahabanza » Rusizi: Haravugwa ubwumvikane buke hagati y’abarobyi n’umushinga ‘pêche‘
Amakuru Ubukungu

Rusizi: Haravugwa ubwumvikane buke hagati y’abarobyi n’umushinga ‘pêche‘

Aha ku cyicaro cya projet péche ngo hagombye kugezwa toni n'igice z'isambaza buri munsi ariko ngo nta n'ikilo kihagera kuko abarobyi ngo bazigurisha rwihishwa

Hamaze iminsi havugwa ikibazo cyo kutumvikana hagati y’umushinga pêche (Projet  pêche) n’ihuriro ry’amakoperative y’abarobyi mu karere ka Rusizi buri ruhande rushinja urundi kurubangamira no kutubahiriza amasezerano bagiranye, hakaba ngo hari impungenge ko bidakemutse mu buryo bwa burundu uku kutumvikana kwavamo amakimbirane yageza no ku mirwano.

Nk’uko Bwiza.com yacukumbuye iki kibazo, ngo ubu bwumvikane buke buva ku nyungu buri wese ashaka guharanira muri iki kiyaga atumva ko zamucika zikajya ku rundi ruhande, nubwo ubuyobozi bw’akarere bwagerageje kubumvikanisha ngo  ikibazo kikaba kikiri kibisi,bose bagasaba ko bakoreshwa  inama yo kugikemura mbere y’uko uburobyi bwongera gusubukurwa.

Umuyobozi mukuru wa projet péche, Hakizimana Majaliwa aganira na Bwiza.com, yavuze ko  uyu ari umushinga watangijwe n’umushoramari  witwaga Nassoro Mselem ku masezerano wagiranye na Leta y’u Rwanda ufite intego yo guteza imbere uburobyi muri iki kiyaga ku ruhande rw’uturere twa Rusizi na Nyamasheke,  aho wagombaga kuroba, kugura, kugurisha, kurinda no kongera umusaruro w’amafi n’ibiyakomokaho muri iki kiyaga cya Kivu.

Nyuma ngo MINAGRI yashyizeho ihuriro ry’amakoperative y’abarobyi rifite inshingano zo kuroba nk’iziyi projet kuko yo ngo yari yarahagaze nyuma y’urupfu rwa nyira yo, aho umuhungu we  Faisal Nasser Albrawi  asubukuriye imirimo ku wa 23 Gashyantare 2016, ku masezerano yagiranye na RDB yumvikana n’abarobyi ko bajya baroba,umusaruro wose ukagurwa n’iyi projet , ikawugurisha abacuruzi b’isambaza mu rwego rwo kwirinda amakimbirane n’abarobyi,ariko ngo abarobyi babirenze ho bakomeza kuwugurisha rwihishwa mu bihuru bakawujyana no muri Kongo kandi batabyemerewe.

Yagize ati’’ ni ikibazo gikomeye cyane gishobora gukurura amakimbirane akomeye kidakemutse vuba  kandi neza,kuko umushoramari akomeje guhomba kubera ko nta n’ikilo cy’isambaza ahabwa n’abarobyi ba Rusizi mu gihe yagombye kubona nibura toni n’igice buri munsi zihava, kuko umusaruro wose abarobyi bawugurisha rwihishwa mu bihuru bakanawujyana muri Congo kandi bagombye kuwuzana hano tukawugura, tukawugurisha n’abacuruzi.’’

Abarobyi  bemera ko aya masezerano koko yabayeho,aho bagomba gushyikiriza umusaruro wose uyu mushinga ariko ko basanga atari uwo kubateza imbere ahubwo  ko ubakenesha, bakaba badashobora kwemera imikorere yayo,cyane cyane ko ngo n’ayo masezerano yagiranye na RDB abarobyi batayazi.

Nzeyimana J.Claude uhagarariye iri huriro yagize ati’’ twe ntitwanze ayo masezerano nubwo tutayazi ariko twumva ko iyi projet yaje igamije kuduteza imbere iduha ibikoresho bigezweho by’uburobyi natwe tukayigurisha ho umusaruro ku giciro twumvikanye ho,ariko  abakozi babo baduca inyuma bakajya kugura umusaruro rwihishwa n’abakozi bacu mu mazi kandi bitemewe,tugasanga igamije kudukandamiza aho kuduteza imbere,kuko n’igiciro iduha tutacyishimiye na gato.’’

Nyirahabimana Christine uhagarariye imwe mu makoperative y’abacuruzi b’isambaza mu mujyi wa Rusizi avuga ko uku kutumvikana abacuruzi  na  bo babihomberamo cyane kuko aho babwiwe bajya kurangura isambaza bacuruza ku cyicaro cy’uyu mushinga bajyayo bakazibura.

Umuyobozi w’aka karere Kayumba Ephrem avuga ko yagiye kubumvikanisha ku wa 3 Nyakanga uyu mwaka nyamara hagakomeza kugaragara kwitana ba mwana, bakaba batakongera kubumvikanisha ikivu gifunze nk’uko babyifuza kuko batamenya neza uruhande rubangamira urundi mu gihe nta burobyi burimo bukorwa, nibusubukurwa akaba ari cyo kizaherwaho mbere y’ibindi.

Kugeza ubu  abarobyi bavuga ko umusaruro w’isambaza  uboneka ku ruhande rw’akarere ka Rusizi ari toni hagati ya 15 na 20 mu kwezi ,nyamara ngo ikiyaga kirobwe mu buryo bwiza n’ibikoresho bigezweho hashobora kuboneka toni zitari munsi ya 50 mu kwezi, ikindi batumvikana ho kikaba ari ugucunga ikiyaga kuko buri wese yumva yagicungana n’inzego z’umutekano aheje undi.

Aha ku cyicaro cya projet péche ngo hagombye kugezwa toni n’igice z’isambaza buri munsi ariko ngo nta n’ikilo kihagera
Nyirahabimana Christine uhagarariye koperative CODEPEK icuruza ibikomoka ku burobyi mu mujyi wa Rusizi avuga ko bahombera cyane muri ubu bwumvikane buke
Hakizimana Majaliwa,umuyobozi mukuru wa projet pêche Rusizi na Nyamasheke asaba ko aka kajagari kahagarara
Umusaruro w’isambaza ubonetse ngo ugurishwa rwihishwa n’abarobyi kandi wagombye kugezwa kuri proje péche abacuruzi bazo akaba ari ho bawurangura

Bahuwiyongera Sylvestre/ Bwiza.com

 

Izindi wakunda

Bwiza.com