bwiza.com
Ahabanza » Congo irashinja UPDF kwica abarobyi bane b’Abanyekongo imirambo yagaragaye ireremba ku kiyaga
Amakuru Politiki

Congo irashinja UPDF kwica abarobyi bane b’Abanyekongo imirambo yagaragaye ireremba ku kiyaga

Igisirikare cyo mu mazi cya Repubulika iharanira Demokarasi ya Congo kuri uyu wa Gatatu ushize cyashinje ingabo za Uganda kwica abarobyi bane b’Abanyekongo, imirambo yabo yagaragaye ku Kiyaga cya Edouard yaratobowe n’amasasu yanatwitswe.

Uganda yahakanye iki kirego, kiri mu bya nyuma mu bimenyetso bigaragaza umwuka utari mwiza hagati ya Congo na Uganda kubera iki kiyaga gito kurusha ibindi mu Karere k’Ibiyaga Bigari, giherutse kuberaho imirwano hagati y’ibihugu byombi hagapfa n’abantu batari bacye.

Jonas Kataliko, umuyobozi w’ishyirahamwe ry’abarobyi b’Abanyekongo, yavuze ko abarobyi bagenzi babo bari mu Kiyaga bagiye kuroboba kuva kuwa Gatanu w’icyumweru gishize ariko ntibagaruke. Kuwa Kabiri ngo bakaba barabonye imirambo yabo yatwitswe ndetse iziritse ireremba hejuru y’amazi.

Major Jean Tsongo, ukuriye igisirikare cyo mu mazi cya FARDC hafi y’iki kiyaga, ashinja ingabo za Uganda kuba ari zo zishe abo barobyi. Ati: “Ni abasirikare ba Uganda bishe abarobyi b’Abanyekongo

Yakomeje avuga ko batwitse amato yabo kandi imirambo yageze ku ruhande rwa Congo ihambiriye, yatwitswe ifite n’imyenge y’amasasu.

Umwe mu bayobozi muri Uganda nawe yemeje ko imirambo yagaragaye ireremba ku kiyaga ariko ahakana ko ingabo zabo zabigizemo uruhare.

Lt Col James Nuwagaba, ukuriye umutwe ushinzwe kurinda abarobyi (Uganda’s fisheries protection force), yabwiye AFP ubu bwicanyi bushobora kuba bwaratewe n’imirwano hagati y’abarobyi ubwabo cyangwa bakicwa n’indi mitwe ikorera muri Congo.

Umwuka mubi hagati ya Uganda na Congo, bivugwa ko uterwa no kutemeranya gusangira ingufu ziva mu Kiyaga cya Edouard, warushijeho kuzamuka muri Nyakanga, ubwo abarobyi 16 b’Abanyekongo, abasirikare bane ba Uganda n’abasivili batatu bicirwaga mu mirwano yadutse hagati y’igisirikare cyo mu mazi cya Uganda ndetse n’igisirikare cya Congo.

 

Izindi wakunda

Bwiza.com