bwiza.com
Ahabanza » Intara y’Uburengerazuba yakusanyije imisoro ya miliyari 8.350Frw ugereranyije n’intego ya miliyari 7,2 yari yihaye
Amakuru Ubukungu

Intara y’Uburengerazuba yakusanyije imisoro ya miliyari 8.350Frw ugereranyije n’intego ya miliyari 7,2 yari yihaye

Umunyamabanga wa Leta muri MINALOC, ushinzwe iterambere ry’abaturage, Harelimana Cyriaque

Umunyamabanga wa Leta muri MINALOC, ushinzwe iterambere ry’abaturage, Harelimana Cyriaque atangaza ko gusora neza bituma Igihugu kirushaho kwigira ntikibeshweho n’imisoro y’abaturage b’ibindi bihugu. Ibi yabitangaje mu muhango Ikigo cy’Igihugu cy’Imisoro n’Amahoro (RRA) cyateguye wo gushimira abasora bo mu Ntara y’Iburengerazuba, wabereye mu Karere ka Rutsiro ku wa 12 Nzeri 2018, aho abasora neza kandi ku gihe bahawe ishimwe. Uyu muhango wahujwe kandi no kwizihiza isabukuru y’imyaka 20, RRA imaze igiyeho.

Avuga ku misoro yinjijwe mu Ntara y’Iburengerazuba muri uyu mwaka ushize wa 2017/2018, Umuyobozi mukuru wungirije muri RRA, Bwana Bizimana Rugenitwali Pascal yagaragaje ko Intara yinjije umusoro w’imbere mu Gihugu ungana na miliyari 23,3 Frw ku ntego yari ifite ingana na miliyari 22,043 Frw ikaba yarayigezeho ku gipimo cya 105%.

Ku birebana n’imisoro n’amahoro RRA ikusanyiriza Uturere, Intara y’Iburengerazuba yakusanyirijwe miliyari 8.350 Frw, ugereranyije n’intego yanganaga na miliyari 7.2. Ikaba yarayigezeho ku 116%,iyirenzaho miliyari 1.2 Frw. By’umwihariko mu Karere ka Rutsiro ngo hakusanyijwe miliyoni 626.7, ku ntego ya miliyoni 514.2, ikaba yaragezweho kuri 121.9%.

Uyu muyobozi muri RRA avuga ko muri rusange mu mwaka ushize wa 2017/2018, imisoro n’amahoro mu Gihugu byagize uruhare mu ngengo y’imari ya Leta rungana na 58.3%. Ku bijyanye n’imisoro iteganyijwe muri uyu mwaka, Intara y’Iburengerazuba ngo irasabwa kwinjiza imisoro y’imbere mu Gihugu ingana na miliyari 25.4 Frw; n’aho ku misoro RRA izakusanyiriza Uturere tw’Intara ingana na miliyari 9.0Frw.

Minisitiri Harelimana yashimiye abasora ku ruhare rwabo mu iterambere ry’Igihugu,ashimira na RRA uburyo ikorana neza n’urugaga rw’abikorera mu rwego rwo kurushaho gukusanya imisoro, yaboneyaho gusaba abikorera kurushaho gutanga serivisi nziza bakira neza ababagana.

N’ubwo uyu muyobozi yashimiye abasora, ntiyabuze kunenga bamwe batitabira gutanga imisoro bakora ubucuruzi asaba abayobozi b’inzego z’ibanze ku bufatanye na RRA kubegera. Yagize ati: “Mujye aho hantu hose hakiri intege nke mu gusora, mubigishe mubasobanurira akamaro mubabwira ibyiza byayo”. Yasabye ubufatanye bw’inzego zose kugira ngo hubakwe Igihugu cyifuzwa mu iterambere rirambye.

Guverineri w’Intara y’Iburengerazuba, Munyatwali Alphonse nawe yashimiye abasora ku ruhare bagira mu iterambere ry’Igihugu, avuga ko ubuyobozi bw’Intara butazahwema kubashyigikira mu bikorwa byabo. Yabasabye kandi ubufatanye mu kurwanya abakora magendu kuko baba banyereza imisoro y’Igihugu.

Umuyobozi w’urugaga rw’abikorera mu Ntara y’Iburengerazuba, Bwana Twagirayezu Pierre Célestin we yagaragaje ko abikorera bamaze gusobanukirwa akamaro ko gusora kuko biteza imbere Igihugu mu nzego zitandukanye.Yashimiye RRA ku gikorwa ngarukamwaka cyo gushimira abasora kuko ngo bibatera imbaraga zo gukomeza kwiyubakira Igihugu.

Yishimiye ko RRA yagiye ikemura ibibazo bayigejejeho bibangamira imikorere yabo, aboneraho kugaragaza bimwe mu bibazo bagifite basaba ko yabibafashamo birimo; abacuruzi basabwa kwishyura ipatante itajyanye n’ubushobozi bwabo mu bucuruzi, abakozi ba RRA batari mu Mirenge yose n’amahugurwa ku basora yatuma barushaho gusobanukirwa no gutanga imisoro.

Muri iki gikorwa, abasora neza kandi ku gihe bahawe ishimwe, hakaba haratoranyijwe n’abandi 02 bazahembwa ku munsi wo gushimira abasora ku rwego rw’Igihugu. Gushimira abasora kuri iyi ncuro ya 16 byari bifite insanganyamatsiko igira iti: “Dusore neza, Twubake u Rwanda twifuza”.

 

Izindi wakunda

Bwiza.com