bwiza.com
Ahabanza » Rusizi: Barasaba ubuyobozi guhagurukira ikibazo cya ’Banki Lambert’
Amakuru Ubukungu

Rusizi: Barasaba ubuyobozi guhagurukira ikibazo cya ’Banki Lambert’

Nkurunziza Antoine avuga ko afite ubwoba bwo kubura inzu ye ifite agaciro ka miliyoni 50

Bamwe mu batuye umujyi wa Rusizi barasaba ubuyobozi bw’aka karere n’inzego z’umutekano zihakorera guhagurukira ubucuruzi bw’amafaranga butemewe bita ‘’ Banki Lambert’’ mu ndimi z’amahanga, burushaho kwiyongera, bunarushaho gukenesha abaturage,aho ngo bamwe baterezwa ibyabo cyamunara cyangwa  bakajyanwa mu nkiko kubera amafaranga baba bafashe bagomba kwishura inyungu zirenze urugero bakayabura.

Nk’uko bamwe mu bacuruzi n’abakunda gufata aya mafaranga babivuga ngo nubwo abacuruza amafaranga nk’aya babikora rwihishwa,kugira ngo bitamenyekana kuko ngo ubusanzwe bihanwa n’amategeko,ubucuruzi nk’ubu bukaba butanemwe na banki nkuru y’igihugu, ngo ababukorana  bagirana amasezerano afifitse,ari yo mpamvu bamwe bibagora kuyubahiriza bikabagira ho ingaruka zirimo no gufatirirwa imitungo yabo.

Bavuga ko hari nk’igihe umuntu aha undi nka miliyoni 10 z’amanyarwanda kuko uyahawe aba ayakeneye cyane kubera ikibazo gikomeye afite ashaka gukemura, bagasezerana ko azamwungukira miliyoni ku kwezi,yaba azamwishura nko mu mezi 4 bakandikirana ko  amuhaye miliyoni 14 azamwishyura mu mezi 4.

Ngo hari n’igihe bandikirana ko baguze inzu, imodoka,inka cyangwa ikindi  bitewe n’amafaranga umwe ahaye undi kandi batakiguze, ingorane zikaba igihe uwahawe amafaranga ayabuze mu gihe yatanze, bikaba ngombwa ko icyo bumvikanye ko baguze gifatirwa kandi batarakiguze, gukura kw’iyi ngeso mbi ngo bigatuma bamwe mu baturage basaba ubuyobozi bw’akarere n’izindi nzego bireba kubikurikirana hakiri kare bikaba byacika burundu.

Nkurunziza Antoine ni umwe mu bacuruzi bo mu mujyi wa Rusizi. Avuga ko yagizweho ingaruka zikomeye n’ubu bucuruzi butemewe,aho mugenzi we yamuhaye amafaranga 13.000.000, azamwishyura 17.000.000  mu gihe cy’amezi 4,igihe kigeze amafaranga arayabura uwayamuhaye amusaba guhindura amasezerano amusinyira ko amugurishije inzu kuri ariya mafaranga kandi  ifite agaciro ka miliyoni 50 ubu akaba yarabuze uko yabigenza.

Yagize ati “ni ubucuruzi bweze muri uyu mujyi ariko bukorwa mu ibanga rikomeye cyane kuko abacuruza ayo mafaranga bazi ko babikora  bitemewe n’amategeko,uwo bayahaye bamusinyisha ibindi bidahuye n’ayo mafaranga,ari yo mpamvu twumva inzego z’ubuyobozi zabihagurukira  kuko bikomeje guhombya bamwe mu baturage bigatuma n’ibyo bavunikiye igihe kinini bigenda vuba cyane.’’

Yakomeje agira ati’’ nk’ubu umuntu yampaye amafaranga 13.000.000 nishyura umwenda wa banki, twumvikana ko nzamwishyura 17.000.000 mu mezi 4,nyabuze ansinyisha ko tuguze inzu yanjye kandi ifite agaciro ka miliyoni 50 z’amanyarwanda. Yanjyanye mu nkiko avuga ko ari yo twaguze kandi tutarigeze tuyigura none mfite ubwoba ko nayibura kandi ntarayigurishije.

Umunyamategeko wo ku rwego rw’ubushinjacyaha mu karere ka Rusizi,yabwiye Bwiza.com ko bakira imanza nke zijyanye n’iki cyaha kuko gikorwa mu buryo baba badashaka ko kimenyekana,akaburira abacuruza amafaranga mu buryo nk’ubu ko amategeko abahana akarishye, bakwiye kubireka.

Umuyobozi w’akarere ka Rusizi,Kayumba Ephrem asaba abaturage kugana amabanki igihe bakeneye amafaranga bakirinda gufata amafaranga nk’aya anyuze mu buriganya,bakaba banatungira agatoki ubuyobozi abunama ku baturage mu buryo nk’ubu kugira ngo babe bakurikiranwa,ariko n’abemera kubijyamo bakamenya ko  ari bo ba mbere bigaruka.

Ingingo ya 334 yo mu gitabo cy’amategeko ahana,ivuga ko umuntu wese ubonerana undi  kubera intege nke,irari,ubukene cyangwa ubujiji bwe,akamukoresha,abyigiriye cyangwa abigiriye undi,amasezerano y’urwunguko cyangwa y’indi yezandonke birengeje urwunguko rusanzwe,ashingiye ku mwenda amuhaye, cyangwa ku masezerano yandi arebana n’umutungo utimukanwa cyangwa wimukanwa amuhaye,ahanishwa igifungo  kuva ku mezi 6 kugeza ku myaka 2 n’ihazabu y’amafaranga y’u Rwanda kuva ku 200.000 kugera kuri 1.000.000 cyangwa kimwe gusa muri ibyo bihano.

Izindi wakunda

Bwiza.com
error: Ntibyemewe