bwiza.com
Ahabanza » Uganda: Umunyamerika ukiri muto yasanzwe aho yari acumbitse yapfuye
Amakuru Politiki

Uganda: Umunyamerika ukiri muto yasanzwe aho yari acumbitse yapfuye

Mu gitondo cyo kuri uyu wa Kane, itariki 13 Nzeri, abayobozi mu gihugu cya Uganda basanze umusore w’imyaka 21 w’Umunyamerika yapfiriye mu icumbi yari acumbitsemo muri Entebbe.

Uyu musore basanze yitwa James Crow, biravugwa ko yaba yiyahuriye mu cyumba cye mu icumbi rizwi nka Entebbe Zoo Hostel, aho yari acumbitse kuva kuwa Mbere ushize.

Abayobozi bizera ko yaba yimanitse akoresheje umukandara w’uruhu nubwo iperereza ryatangiye ngo hamenyekane neza niba yariyahuye cyangwa yarishwe akamanikwa mu rwego rwo kujijisha.

Iyi nkuru dukesha Chimpreports iravuga ko uyu yatangaga amahugurwa yo kwita ku nyamanswa nk’umukorerabushake mu Kigo cy’Igihugu gishinzwe inyamanswa zo mu ishyamba giherereye Entebbe.

Abakora muri pariki nto (Zoo) iri aha muri Entebbe bavuga ko baheruka kubona nyakwigendera ari muzima mu ijoro ryo kuwa Gatatu arimo kunywa inzoga. Uyu ngo akaba yari amaze icyumweru ageze muri Uganda, aho yari yazanye n’ababyeyi be gusura iyo pariki.

Ku Cyumweru gishize, ababyeyi be basubiye muri Leta Zunze Ubumwe za Amerika bamusiga inyuma. Uyu musore ariko ngo akaba yari asanzwe agaragara nk’umuntu ufite ibibazo ndetse wigunze nk’uko bagenzi be muri Texas babyemeza.

Hagati aho rero umurambo wa James Crow wajyanywe mu buruhukiro bw’ibitaro bya Mulago mu gihe hategerejwe ko uzasubizwa iwabo akajya gushyingurwa.

Ikigo cyo muri Amerika gishinzwe gukumira kwiyahura (American Foundation for Suicide Prevention) kivuga ko kwiyahura ari kimwe mu bintu bihitana abantu benshi muri Amerika, aho Abanyamerika bagera ku 43,000 bahitamo kwiyambura ubuzima buri mwaka nk’uko imibare ibigaragaza.

 

Izindi wakunda

Bwiza.com