bwiza.com
Amakuru Politiki

Uganda: Umuhinde yiyahuye nyuma yo kuribwa mu rusimbi amafaranga y’ikigo yakoreraga

Umugabo ukomoka mu Buhinde yasanzwe amanitse mu cyumba cya hotel yari acumbitsemo iherereye mu mujyi wa Mubende mu gihugu cya Uganda, aho bivugwa ko yaba yiyahuye kubera urusimbi.

Amakuru aturuka mu gipolisi cyo muri Mubende aravuga ko uyu muhinde mu kwiyahura yasize urupapuro rw’impamvu yiyahuye mu mizigo ye.

Norbert Ochom, umuvugizi w’igipolisi mu karere ka Wamala, yabwiye ikinyamakuru Chimpreports dukesha iyi nkuru ko uru rwandiko uwiyahuye yasize rwavugaga ko yashoye mu rusimbi amafaranga y’ikigo yakoreraga agera muri miliyoni 50 z’amashilingi kandi anafite imyenda myinshi ya hotel.

Uyu bivugwa ko yiyahuye ni uwitwa Devana Gireemish w’imyaka 23 y’amavuko.

Itangazo polisi yashyize ahagaragara rivuga ko Devana yiyahuye akoresheje ishuka yo muri Travelles Hotel yari acumbitsemo mu mujyi wa Mubende.

Hamenyekanye kandi ko Devana yari umukozi w’ikigo kitwa Navis Distillers gikorera ahitwa Kawempe.

Hagati aho, umurambo wajyanywe mu buruhukiro bw’uyu mujyi ngo ubanze ukorerwe ibizamini hamenyekane neza niba yiyahuye cyangwa yishwe.

 

 

Izindi wakunda

Bwiza.com