bwiza.com
Ahabanza » Ubucuti bwa Kagame na Mnangagwa bayoboye ibihugu byakozanyijeho muri Congo
Amakuru Politiki

Ubucuti bwa Kagame na Mnangagwa bayoboye ibihugu byakozanyijeho muri Congo

Perezida Emmerson Mnangagwa wa Zimbabwe ngo yaba yifuza gutera ikirenge mu cya perezida w’U Rwanda, Paul Kagame mu kuzamura ubukungu bw’igihugu hagendewe ku kwishakamo ibisubizo ndetse no kurebera ku mikorere ya bimwe mu bihugu bya Aziya bifite umuvuduko mu bukungu nka za Singapore, Malaysia n’ibindi.

Ikinyamakuru The Independent cyo muri Zimbabwe cyatangaje ko kuva yajya ku butegetsi nyuma ya coup d’etat mu Ugushyingo umwaka ushize, Perezida Mnangagwa afitanye ubucuti bwa hafi na perezida w’U Rwanda, Paul Kagame bwakomeje na nyuma yo gutsinda amatora muri Nyakanga muri uyu mwaka.

Ku cyicaro cy’Umuryango w’Abibumbye, I New York muri iki cyumweru dusoza, Perezida Kagame, akaba na chairman wa Afurika Yunze Ubumwe, yumvikanye avugira Zimbabwe, asaba Umuryango Mpuzamahanga guha amahirwe perezida Mnangagwa akagira icyo akora muri iki gihugu cyari kimaze imyaka hafi 40 kiyobowe n’umuntu umwe, Robert Mugabe waranzwe na politiki itaravugwagwaho rumwe no gukoresha nabi umutungo w’igihugu.

Iki kinyamakuru kibutsa kandi ko Perezida Kagame ari umwe mu bayobozi bakeya muri Afurika bitabiriye umuhango w’irahira rya Perezida Mnangagwa I Harare kuwa 26 Kanama.

Ikinyamakuru Zimbabwe Independent nacyo cyavuze ko u Bwongereza bushyigikiye imigambi ya perezida Mnangagwa no kuba ashaka uburyo bw’u Rwanda bushingiye ku buyobozi bukomeye bwabashije kugira ubukungu buzamuka ku rugero ruri hejuru imyaka myinshi.

Ngo kuva Perezida Mnangagwa yabonana na Perezida Kagame mu nama idasanzwe ya Afurika Yunze Ubumwe yabereye I Kigali kuwa 21 Werurwe, aba bombi bakomeje gukorana bya hafi nubwo ibihugu byombi byigeze kurebana ay’ingwe mu ntambara ya Congo yo kuva mu 1998-2002.  Zimbabwe yari ishyigikiye leta ya Congo yari imaze kwitandukanya n’u Rwanda na Uganda byayifashije kubaho nyuma yo guhirika Mobutu.

Bivugwa ko nyuma yo kubonana ubutegetsi bwa Mnangagwa bwitabaje umuyobozi wa RDB, Clare Akamanzi muri Mata akajya gufasha mu gutegura ishingwa ry’ikigo cy’igihugu cy’iterambere  cya Zimbabwe wagereranya na RDB. Iki kikaba ari Zimbabwe Investment and Development Agency.

Kuba kompanyi y’indege y’u Rwanda, Rwandair kuri ubu ikora ingendo za Kigali-Harare ndetse igakomeza Cape Town muri Afurika y’Epfo nabyo bigaragaza ubufatanye buri hagati ya Perezida Mnangagwa na Perezida Kagame.

 

 

Izindi wakunda

Bwiza.com