bwiza.com
Amakuru Umutekano

Rusizi: Ushinjwa gusambanya abana babiri arahigwa bukware

Amakuru aturuka mu kagari ka Kigenge, umurenge wa Nzahaha, mu karere ka Rusizi, avuga ko abaturage ku bufatanye n’inzego z’umutekano bahagurukiye gushakisha umugabo witwa  Murwanashyaka Gaspard   w’imyaka 47 y’amavuko nyuma y’iminsi 2 acitse, akekwaho gusambanya abana be babiri.

Nk’uko Bwiza.com yabitangarijwe n’umunyamabanga nshingwabikorwa w’akagari ka Kigenge,  Munezero Rita  ngo ubuyobozi n’inzego z’umutekano bumaze iminsi 2 yose bashakisha  uyu mugabo Murwanashyaka Gaspard ngo ashyikirizwe ubutabera aryozwe amahano yakoreye abana be babiri b’abakobwa.  Umwe afite imyaka 11 y’amavuko undi ni irindwi.

Uyu muyobozi avuga ko aya mahano yabuze gihanura muri uyu murenge, yabaye mu gicuku cyo ku cyumweru tariki ya 30 Nzeri 2018. Uyu mugabo  usanzwe afatwa nk’umukire muri uyu murenge kuko afite imodoka ye ya taxi-voiture muri izi zigezweho yakoreshaga nk’umushoferi ayitwara Kamembe-Bugarama akaba afite n’inka nyinshi, ngo yataye umugore mu buriri amubwira ko agiye gukama inka saa munani z’ijoro arombereza mu cyumba cy’abana gukora aya mahano.

Nk’uko byemezwa n’umugore we,  ngo  aba bana bari bamaze iminsi bamubwira ko abasambanya ariko akumva bitashoboka akabyima amatwi, ngo hashize akanya umugabo abyutse, byamwanze mu nda arabyuka aramukurikira, akinguye icyumba cy’abana asanga undi ari gusambanya ako k’imyaka 11 ahita atabaza abaturanyi, batinze kumutabara ajya gushaka nyina w’ako kana aho yahukaniye mu Bugarama kuko yahoze ari umugore we wa mbere w’uyu mugabo, bagarutse basanga umugabo yapakiye mu modoka imyenda ye n’iy’umugore n’ibindi by’ingenzi yagiye.

Aba bagore bombi bahise batabaza inzego z’umutekano n’abandi baturage, mu gitondo bajyana abana mu kigo nderabuzima cya kiyisilamu mu Bugarama, ngo  basanga bimwe mu bimenyetso bigaragaza ko icyo cyaha cyabaye bikiri kuri ako kana nk’uko ubu buyobozi bubyemeza, basanga baranangiritse mu myanya ndangagitsina,hahita hafatwa icyemezo cyo kubageza ku bitaro bya Gihundwe ngo bikurikiranwe neza.

Munezero Rita yagize ati “akana gakuru yari yarakabyaranye n’umugore uba mu Bugarama yirukanye, uwo yashakanye na we bwa kabiri bafitanye abana 2,agakuru kakaba ako k’imyaka 8 kuko uwa 3 yitabye Imana, tukaba nta kindi kibazo tuzi yagiraga,cyaba icyo mu mutwe cyangwa icyo mu rugo n’umufasha we cyatuma yangiza abana yibyariye. Byatubereye inshoberamahanga kuko ibi ni ubwa mbere tubyumvise muri uno murenge,akaba akomeje gushakishwa,yazaboneka agashyikirizwa inzego zibishinzwe akaryozwa aya mahano.’’

Amakuru aturuka ku mufasha we, avuga ko ngo amaze hafi umwaka wose abasambanya  kuko ngo yabitangiye uyu mugore yaragiye kubyara kandi uwavutse icyo gihe agiye kuzuza umwaka, ngo akajya ababwira  ko nihagira ubivuga azamwicana na nyina, kandi ko ngo nta kibazo bakwiye kugira, bagira ubwoba ariko aka gato kabibwira nyina rwihishwa,undi abanza kubyima  agaciro kugeza ubwo amuguye gitumo.

Umunyamabanga Nshingwabikorwa w’umurenge wa Nzahaha, Rwango Jean de Dieu, yabwiye Bwiza.com ko inzego zose zihakorera  n’abaturage bahagurukiye ku mushaka,bakifuza ko igihe yaboneka yaburanishirizwa aho yakoreye aya mahano,byabera isomo n’abandi bahungabanya uburenganzira bw’umwana bigeze aha.

Bibaye mu gihe hatarashira amezi abiri mu mudugudu wa Kacyiru muri aka kagari,umugabo yishe umugore we amakubise ifuni mu mutwe na bwo mu gicuku, abaturage bakaba bakomeje kwibaza kuri aya mahano abera mu kagari kabo, bagasaba ko aba bombi bazahanwa by’intangarugero imbere yabo  igihe uyu yaboneka.

 

Aba bana biga mu mashuri abanza bavuga ko se amaze hafi umwaka wose abasambanya yarababwiye ko uzabivuga azicanwa na nyina

Izindi wakunda

Bwiza.com