bwiza.com
Ahabanza » “Indege ikaruruka ntibakome imbere, Rusumbabose” ibisingizo, Ntaganda yifuza guha Perezida Kagame
Featured INKURU TWABAHITIYEMO Inkuru zicukumbuye Politiki

“Indege ikaruruka ntibakome imbere, Rusumbabose” ibisingizo, Ntaganda yifuza guha Perezida Kagame

Aya niyo mazina azitwa uwari umenyerewe nk’Intore izirusha intambwe, umukuru w’igihugu akaba n’umuyobozi w’ishyaka riri ku butegetsi FPR INKOTANYI, nyakubahwa Kagame Paul. Aya mazina mashya ngo niyo Ntaganda Bernard azamwita umunsi yafashe umwanzuro wo gufungura abandi banyapolitiki bagifunze, nk’uko yamaze kubikorera Diane Rwigara, Adeline Mukangemanyi, Ingabire Victoire Umuhoza na Kizito Mihigo.

Me Ntaganda Bernard, wiyita umuyobozi w’ishyaka PS IMBERAKURI ritemewe mu Rwanda, asanzwe azwiho gucura no gukoresha amagambo yahuranya. Yibukirwa ku ijambo akayihayiho ka politiki yakundaga gukoresha, na tura tugabane niwanga bimeneke, avuga ku igabana ry’ubutegetsi.

Uyu uteganya kuvuga imyato umutware w’intabera, ngo azamuhundagazaho ibisingizo amaze gufungura n’urubuga rwa politiki, ngo kuko “umunyapolitiki si nk’umuturage uhinga amateke”.

Ubwo yabazwaga n’itangazamakuru uko yakiriye icyemezo cy’urukiko ku ifungurwa ry’agateganyo z’imfubyi n’umupfakazi b’umuherwe Assinapol Rwigara (Diane na nyina Adeline); Ntaganda agira ati, “….ni icyemezo cyiza, kugirango kigire ingufu, nk’uko bafunguye Ingabire Victoire n’ubu bafunguye Diane na nyina, ni intambwe itewe. Icyo dusaba FPR n’ubuyobozi bwayo ni uko barekura abandi banyapolitiki bafungiye ubusa.

Diane ararekuwe, ariko niba arekuwe, arekuwe nk’umunyapolitiki. ntabwo arekuwe nk’umuturage ugiye guhinga amateke. ni ukuvuga ngo rero akwiye kongera guhabwa uburenganzira bw’urubuga rwa politiki akavuga, kuko bitabaye ibyo, kumurekura byaba bibaye nk’aho bamuhinduriye gereza bakaba bamujyanye muri gereza nini aho bamubuza kuvuga.

Ikindi nshaka kongeraho, hari intambwe itewe, ndashaka Intore izirusha intambwe, sinkunda kumuvuga mu izina, itere izindi ntambwe, nayitera nzamwita indege ikaruka ntibakome imbere. Igihe azemera ko amashyaka ya politiki akorera mu Rwanda, igihe azemera ko umunyarwanda azisanzura, njye sinzaba nkimwita Intore izirusha intambwe, nzamwita Indege ikaruka ntibakome imbere, Rusumbabose”.

Bernard Ntaganda

Ifungurwa rya Diane na nyina ryabokeje igitutu bahindura imvugo

Ibi bibaye nyuma y’ibyumweru bitatu Ingabire Victoire na Kizito Mihigo bafunguwe ku mbabazi z’umukuru w’igihugu, nyuma umunyapolitikikazi Ingabire Victoire akavuga ko atigeze asaba imbabazi, abandi bakabyitirira igitutu cy’amahanga. Gusa nyakubahwa Perezida wa Repubulika yateye utwatsi icyo gitutu, ubwo yakiraga indahiro y’abadepite baherutse gutorwa.

Ni nyuma kandi y’ibyumweru bibiri, Me Ntaganda Bernard asohoye itangazo N°008/PS.IMB/NB/2018, tariki 20 nzeri, rifite umutwe ugira uti, “ISHYAKA FPR INKOTANYI RIRAKORA YA  POLITIKI YO GUHONGA,GUHINGA WAKWANGA UGAHUNGA!”

Ryagiraga riti,

Rishingiye ku magambo y’iterabwoba  yuje urwango ari kuvugwa n’abayobozi batandukanye b’Ishyaka FPR INKOTANYI aho badatinya kuvuga ko Mme Victoire INGABIRE ashobora gusubizwa muri gereza cyangwa agategekwa gahunga;

Rimaze kubona ko iryo terabwoba rishingiye gusa y’uko Mme Victoire INGABIRE yanze kwemera ko yatse imbabazi nyuma yo gufungurwa;

Ishyaka PS Imberakuri riramenyesha abarwanashyaka baryo,impirimbanyi za demokarasi n’amahanga ibikurikira:

Ingingo ya mbere:

Ishyaka PS Imberakuri rirasanga ibivugwa n’Ishyaka FPR INKOTANYI ko Mme Victoire INGABIRE yatse imbabazi kugira ngo afungurwe ari ukwigiza nkana kuko atigeze yemera na rimwe ibyaha byose byacuzwe na FPR INKOTANYI. Aha, Ishyaka PS Imberakuri riributsa ko  “gusaba imbazi zitangwa na Prezida wa Repubulika” bitandukanye no gusaba imbabazi z’ibyaha bamuhimbiye.

Ingingo ya 2:

Ishyaka PS Imberakuri  ritewe impungenge n’amagambo yuje urwango n’iterabwoba y’abayobozi ba FPR INKOTANYI badatinya kuvuga ko Victoire INGABIRE bashobora kumusubiza mu gihome cyangwa bakamucira ishyanga. Aha Ishyaka PS Imberakuri riributsa FPR INKOTANYI ko Mme Victoire INGABIRE  ari umunyapolitiki utavuga rumwe na Leta ya FPR INKOTANYI bityo kutabona ibintu kimwe nayo cyangwa kwanga gukeza ubuhake dore ko inafite abahakwa benshi atari  uguca inka amabere.

Ingingo ya 3:

Ishyaka PS Imberakuri rirasanga aya magambo y’iterabwoba arimo n’urwango  FPR INKOTANYI ifitiye abatavugarumwe nayo yibutsa ku buryo budasubirwaho  ya politiki  ya cyera aho bamwe mu  Banyarwanda bahatirwaga “guhinga, guhonga, bakwanga bagahunga! Ubu FPR INKOTANYI nayo iri gusaba abatavugarumwe nayo ko bagomba: kuyipfukamira, kuyisenga bakwanga bakerekezwa gereza cg bakameneshwa bagahunga igihugu!

Ingingo ya 4:

Ishyaka PS Imberakuri ryongeye guhatira ishyaka FPR INKOTANYI gufungura urubuga rwa politiki kandi rikumva ko kutavuga rumwe naryo  ari bwo buryo bwonyine buboneye bwo kubaka u Rwanda kuko kubibona ukundi ni ugukomeza kugira u Rwanda gereza yagutse bityo na Mme Victoire INGABIRE akaba atarafunguwe ahubwo yaba yarahinduriwe gereza.

Ingingo ya 5:

Ishyaka PS Imberakuri ryongeye gusaba ibihugu by’amahanga n’imiryango mpuzamahanga byafashije FPR INKOTANYI kugera ku butegetsi, bikomeje no kuyitera inkunga mu buryo butandukanye kwamagana amagambo y’iterabwoba n’urwango ari gukwirakwizwa na FPR INKOTANYI no kuyihatira kwemera gufungura urubuga rwa politiki nk’uko bibikora ku bindi bihugu byo mu Karere nk’u Burundi na Repubulika Iharanira Demokarasi ya Kongo cyane  ko u Rwanda ruri inyuma y’ibi bihugu mu kwimakaza demokarasi n’indi migenzo myiza iranga ubumuntu. Gukomeza guceceka bifatwa nko gushyigikira igitugu cya Leta ya FPR INKOTANYI.

“TWESE TURI  VICTOIRE INGABIRE!”

 

Bikorewe i Kigali,kuwa kuwa 20 Nzeri 2018

Me NTAGANDA Bernard

Prezida Fondateri wa PS Imberakuri (Sé)

Umunyapolitiki Ingabire Victoire nawe yokejwe igitutu n’ifungurwa ry’agateganyo rya Diane Rwigara na nyina, Mukangemanyi Adeline, ahendura imvugo yari afite agifungurwa.

Ati: “nta mpamvu n’imwe ihari y’uko igihugu cyacyo cyakomeza kwambara icyasha …..nkaba nshimira rero ko aba bantu bafunguwe, …hari izindi mfungwa zihari..abayoboke b’ishyaka ryanjye icyenda barimo baracyafunze, nabo ndasaba ko bafungurwa, hari Deo Mushayidi aracyafunze ndasaba ko yafungurwa, hari Dr Niyitegeka ndasaba ko yafungurwa n’abandi banyapolitiki baba bahari.”

Yashimye iki cyemezo cy’urukiko avuga ko hari intambwe ubutegetsi bw’u Rwanda butangiye gutera kandi ishimishije yo gufungura urubuga rwa politiki, kandi yiteguye gukorana n’ubutegetsi mu kubaka igihugu. Ahamagarira abari mu mashyaka arwanya ubutegetsi akorera hanze y’igihugu kuza gukorera hamwe mu kubaka igihugu, aho gukomeza kucyambika icyasha.

Nta gitutu na mba, Ingabire Victoire asoza avuga ko ashyigikiye kwiyamamaza kwa Louise Mushikiwabo ku buyobozi bwa OIF, anamusaba ko manda ya mbere yayirangiza nta cyasha kikiri ku Rwanda.

Karegeya Jean Baptiste

Izindi wakunda

1 Igitekerezo

SIMON October 7, 2018 at 3:05 am

Habaho igihe umuntu bamwogeje maze nawe sinakubwira. Ni umgani w’abanyarwanda. Aba se nabo barashaka kutujyana he?????. Uwanze kumva.

Subiza

Tanga Igitekerezo

Bwiza.com