bwiza.com
Ahabanza » Umutoza Masoud Djuma arahakana kujya muri Yanga
Amakuru Imikino

Umutoza Masoud Djuma arahakana kujya muri Yanga

Umutoza Masoud Djuma

Nyuma y’aho ikipe ya Simba yo muri Tanzania ifatiye icyemezo cyo gutandukana n’umutoza Masoud Djuma, uyu nawe yitangarije ko adashaka kugira byinshi atangaza ariko abajijwe ibijyanye n’uko yaba ari kuvugana n’ikipe ya Yanga asubiza asa nk’utunguwe agira ati: “Ngiye muri Yanga njyewe!”

Ikipe ya Simba SC iherutse gusubika amasezerano yari ifitanye n’Umutoza Masoud Djuma ukomoka mu Burundi, ariko nubwo byabaye mu ibanga rikomeye bivugwa ko atumvikanaga n’umutoza mukuru, Patrick Aussems ukomoka mu Bubiligi.

Umutoza Masoud Djuma akaba yatangarije itangazamakuru ko akiri Dar es Salaam nashaka kuhava azasezera. Ku kijyanye n’uko yaba ashaka kujya gutoza mu ikipe ya Yanga, Djuma yasubije agira ati: “Ngiye muri Yanga njyewe! Sinzi aho mukura ibintu bya Yanga, njyewe nzi ko Yanga ifite umutoza wayo, hari abamufasha. None njye ndajya gute muri Yanga, kwicara he hariya?”

Abajijwe igihe ateganya kuzasezerera muri Simba ku mugaragaro abazwa niba azaba ari ku mukino cyangwa ku munsi usanzwe, yongeye kuvuga ko nta byinshi ashaka gutangaza. Ati: “Ndatekereza ibibazo bya Simba nk’uko nabikubwiye, sinshaka kubiganiraho. Sinshaka na none kugaragara mvuga ijambo ryakwakirwa ukundi.”

Abajijwe indi kipe ateganya kujyamo nyuma yo gusezera muri Simba, yasubije ko Imana ari yo ipanga umunsi nugera bazabimenya nk’uko iyi nkuru dukesha Udaku Special ikomeza ivuga.

Umutoza Masoud Djuma yagiye mu gihugu cya Tanzania avuye mu ikipe ya Rayon Sports ndetse yari amaze kugeza kuri byinshi birimo ibikombe bigera kuri bitatu. Muri Simba kandi ngo Djuma yari afite abakunzi benshi batishimiye ko agiye gutandukana na Simba.

Ikinyamakuru Championi nicyo cya mbere cyatangaje inkuru yo gutandukana kwa Masoud Djuma na Simba SC aho cyavugaga ko cyabwiwe ko gukorana n’umutoza Patrick Aussems bitamushobokeye aho ngo uyu yabwiraga abakinnyi kwitwara nabi kugirango umutoza mukuru yirukanwe abe ari we umusimbura.

Iyi nkuru ya Championi yagiye ahagaragara kuwa 27 Kanama 2018, yateje impaka ndende ariko nyuma biza kugaragara ko ibyo iki kinyamakuru cyavugaga ari byo. Kuri ubu Masoud Djuma akaba ategereje guhembwa amafaranga Simba imufitiye agasezera mu mahoro nyuma y’aho umuyobozi muri Simba, Salim Abdallah atangarije ko bananiwe kumvikanisha aba batoza ba Simba.

Umutoza Masoud yigeze gutoza ikipe ya Simba nk’umutoza mukuru mu mikino itatu gusa ya shampiyona mu gihe cy’ukwezi kumwe uhereye ku itariki 30 Ukuboza kugeza ku itariki 27 Mutarama, kandi iyi mikino yose abasha gutsinda amakipe ya Ndanda, Singida na Kagera. Ngo yanayoboye Simba mu mikino 4 y’Igikombe kitwa icy’impinduramatwara (Kombe la Mapinduzi).

Izindi wakunda

Bwiza.com