bwiza.com
Ahabanza » Abanyekongo byibuze 10 biciwe muri Angola
Amakuru Politiki

Abanyekongo byibuze 10 biciwe muri Angola

Abanyekongo byibuze 10 biciwe muri Angola nyuma y’amakimbirane bagiranye n’abaturage ndetse n’abapolisi nyuma y’icyemezo cya guverinoma cyo kubasubiza iwabo muri Congo.

Televiziyo ya leta muri Angola, TPA kuri uyu wa kabiri yatangaje ko Abanyekongo 10 n’umupolisi umwe wa Angola biciwe mu makimbirane yadutse ahitwa Lucapa, mu Ntara ya Lunda Norte. Muri Repubulika iharanira Demokarasi ya Congo, ishyirahamwe ry’Abanyekongo baba muri Angola ryemeje ko ari Abanyekongo 14 bishwe.

Nk’uko televizyo ya Angola yakomeje ibitangaza, ngo ibibazo byatangiye kuwa Gatatu ushize ubwo Abanya-Angola bibasiraga abacukuzi ba zahabu bakomoka muri Congo. Igipolisi cyaratabaye Abanyekongo babiri baricwa. Abatangabuhamya bavuga ko bukeye amakimbirane yakomeje Abanyekongo 8 bakicwa ndetse n’umupolisi umwe wa Angola.

Imibare y’abantu 11 bivugwa ko bishwe yemejwe na Jose Zeca Mutchimapar, umuyobozi w’itsinda riharanira ubwigenge bwa Lunda Norte. Umwe mu bapolisi ariko we yahakanye ko hapfuye abanyekongo 14 nk’uko byatangajwe n’iryo shyirahamwe ryabo.

TPA ikomeza ivuga ko ituze ryagarutse kuva kuwa Gatanu, Abanyekongo 6,000 bakaba barasubijwe iwabo mu rwego rwo kwirukana abanyamahanga baba muri Angola mu buryo bunyuranyije n’amategeko.

Bivugwa ko ku mupaka wa Angola na Congo ahitwa Kamako hari huzuye abantu benshi, ibihumbi by’Abanyekongo byambuka umupaka bitaha kuva kuwa Kane.

Izindi wakunda

Bwiza.com