bwiza.com
Ahabanza » Nyamasheke: Urujijo ku itemwa ry’inka ya Girinka
Amakuru Umutekano

Nyamasheke: Urujijo ku itemwa ry’inka ya Girinka

Mu nama abaturage b'akagari ka Miko bagiranye n'umuyobozi w'akarere, Kamari Aimé Fabien

Mu rukerera rwo ku cyumweru ushyira ku wa Mbere tariki ya 8 Ukwakira 2018, ni bwo abaturage n’ubuyobozi bw’umudugudu wa Rutare, akagari ka Miko mu murenge wa Karengera mu karere ka Nyamasheke bahurujwe n’umwe mu bahungu b’umukecuru witwa Mukamusoni Consolée wari warahawe inka muri gahunda ra Girinka ko imaze gutemwa n’abagizi ba nabi.

Nk’uko Bwiza.com yabitangarijwe n’umunyamabanga nshingwabikorwa w’akagari ka Miko,Ndayisenga Patrick, ngo iyi nka uyu mukecuru yayihawe muri 2016,ikaba yari ifite inyana y’amezi 5 yari ishigaje igihe gito ngo yiturwe, ngo byaje kugaragara ko ifashwe nabi cyane ndetse iri hafi gupfa,abaturage batangira kubitangaho amakuru mu buyobozi ngo itabarwe itarapfa,kuko ngo itari ikinagaburirwa.

Akomeza avuga ko, nk’ubuyobozi babimenyeshejwe bagatangira gutekereza icyemezo bafata harimo no kuba yayamburwa igahabwa undi, mu gihe ngo veterineri w’uyu murenge yiteguraga kujya yo kuri uyu wa Mbere ushize mu gitondo kuganira n’uyu mukecuru n’abahungu be bashinjwa kuba bataramufashije kuyitaho ngo harebwe umwanzuro wafatwa ku bufatanye n’abaturanyi b’uyu mukecuru,ni bwo bumvaga ngo yatemwe.

Nubwo ubuyobozi buterura ngo buvuge ko yaba yaratemwe n’aba bahungu be babiri, ariko ubwo ngo bakoreshwaga inama nyuma y’iri bara,dore ko yari yatemwe amaguru yombi itabasha guhagarara, abaturage basabwe kuvuga uwo bakeka ko yaba yayitemye,banabwirwa ko nabura bateranya amafaranga bakagurira uyu mukecuru indi, habura n’umwe uvuga,basaba ko ngo aho kuvuga bahabwa impapuro ibyo bari kuvuga bakabyandika.

Ngo mu kubyandika bose bahurije ku kuba  yatemwe n’abahungu 2 b’uyu mukecuru usanzwe yibana kuko bose bubatse izabo, ngo kugira ngo bigaragare ko yatemwe n’abagizi ba nabi,umukecuru ahabwe indi,cyangwa inyana yayo yari kuzazitura ayigumane,dore ko yo ngo yakuraga neza nta kibazo.

Umwe muri aba baturage yabwiye Bwiza.com ati “dukeka ko  bamaze kuyifata nabi umukecuru yumvise ko ashobora no kuyamburwa bahimbye  imitwe yo kuyitema ngo bazavuge ko yatemwe n’abagizi ba nabi umudugudu wacu ushyirweho icyo cyasha n’abaturage babateranirize amafaranga yo kugura indi kandi ari bo babyikoreye, kubera n’ipfunwe ryo kuba bataramufashije kuyitaho.’’

Uyu mukecuru n’aba bahungu be bahise bafatwa bajyanwa ku murenge kuganirizwa no kubazwa neza, umunyamabanga nshingwabikorwa w’uyu murenge Nsengiyumva Zablon na we akavuga ko mu bisobanuro byabo, nubwo umuntu atahita abahamya icyaha hakaba hakirimo urujijo rudasobanuka neza,ariko bishoboka ko ari bo babikoze bumvise ko igiye guhabwa abazayita ho.

Umuyobozi w’aka karere Kamari Aimé Fabien akimara kubyumva yahise ajyayo kuri uyu wa kabiri aganira n’abaturage, nyuma yo gusesengura ikibazo neza buri muturage avuga uko abyumva ,kuko inka yahise ibagwa ikagurishwa  amafaranga 70.000, aba bahungu b’uyu mukecuru bahise bategekwa gushaka andi mafaranga 130.000 akongerwaho akagurwa indi y’amafaranga 200.000 igashyikirizwa uyu mukecuru,inyana yayo yo akayitura nk’uko bisanzwe.

Abaturage bahise basabwa kuba ijisho rya bagenzi babo,bakumva igishaka gutera ikibazo cyose  bakakivuga hakiri kare,hakaba hakomeje iperereza ku bufatanye bw’inzego z’umutekano,iz’ubuyobozi n’abaturage kugira ngo niba ari n’undi wayitemye  nk’uko bivugwa n’uyu muryango bimenyekane, ahanwe.

Hari hashize igihe  mu kagari ka Gako,mu murenge wa Kagano muri aka karere indi nka nk’iyi itemwe biza kugaragara ko nyira yo ari we wayitemeye ashaka kujijisha ku byaha yari akurikiranywe ho ngo avuge ko abaturage basanzwe bamwanga banayitemye, abaturage bagasabwa kudakinisha gahunda ya Nyakubahwa perezida wa Repubulika mu buryo nk’ubu kuko babihanirwa bikomeye.

Mu nama abaturage b’akagari ka Miko bagiranye n’umuyobozi w’akarere, Kamari Aimé Fabien

Izindi wakunda

Bwiza.com