bwiza.com
Ahabanza » MIGEPROF irasaba ababyeyi guhangana n’ikibazo giteye inkeke abana b’abakobwa
Featured

MIGEPROF irasaba ababyeyi guhangana n’ikibazo giteye inkeke abana b’abakobwa

Minisitiri w’Uburinganire n’Iterambere ry’Umuryango (MIGEPROF), Esperance Nyirasafari  yatangaje ko ababyeyi bakwiye guhaguruka bakarwanya abantu basambanya abana b’ababakobwa ndetse n’abahungu.

Ibi Min.Nyirasafari yabitangaje kuri uyu wa 11 Ukwakira 2018 mu muhango gufungura umunsi mpuzamahanga w’umwana w’umukobwa wahujwe nitangizwa ry’ubukangurambaga  bwiswe ‘#GIRL2LEADER’ wabereye mu ngoro y’inteko ishinga amategeko.

Min. Nyirasafari ageza ijambo ku bitabiriye umunsi mpuzamahanga w’abana b’abakobwa

Yagize ati” Mu rwego rwo guteza imbere abana b’abakobwa, U Rwanda twateye imbere nko kuba nta na hamwe ahejwe bitandukanye no mu myaka yashize nk’aho batari bemerewe no kuzungura. Hari ikibazo kibibasiye kandi giteye inkeke. Ababyeyi, urubyiruko n’abandi kugira ngo bahangane n’iki kibazo gituma abana b’abakobwa batwita bakiri bato”

Abana bari babukereye mu rwego rwo kwizihiza uyu munsi

Uyu muyobozi yavuze ko iki kibazo cyugarije abana b’abakobwa ariko ko gishobora kurandurwa burundu habayeho ubufatanye.

Ati” Iki kibazo twese kiratureba,kiraduhangayikishije kandi nyamara buri wese abigizemo uruhare cyakemuka. Iyo umugore cyangwa umukobwa ateye imbere n’igihugu kiba giteye imbere”

Perezida w’Inteko Ishinga Amategeko Donatille Mukabarisa wari umushyitsi mukuru muri uyu muhango yasabye abana b’abakobwa kugira ubuzima bufite intego kuko igihugu cyamaze gutegura ibisabwa byose anabasaba kwirinda ababashuka no kumenyesha ababyeyi ibibazo bahura nabyo mu buzima bwabo bwa buri munsi.

Abana b’abakobwa bari kumwe n’abayobozi

Ati” Iyi gahunda irafasha kubaka ubuyobozi bwanyu. Mufite igihugu cyiza,ubuyobozi bwiza. Ntabwo mukwiye gupfusha aya mahirwe. Mukwiye kugira intego mu buzima. Mubwire ababyeyi , abayobozi n’abandi bireba kugira ngo babafashe. Mukwiye kwibuka indangangagaciro z’umuco wacu wa Kinyarwanda”

Perezida w’Inteko Ishinga Amategeko, Donatille Mukabarisa aha impanuro abana b’abakobwa.

Uyu munsi mpuzamahanga w’abakobwa  ubaye mu gihe imibare y’abana b’abakobwa basambanwa ku ngifu igenda yiyongera n’ubwo nta mibare mishya igaragazwa muri uyu mwaka.

Imibare itangazwa na Polisi, igaragaza ko mu mwaka wa 2016, yakiriye ibirego by’abashinjwa ibyaha byo gusambanya abana bingana na 1362, mu gihe Minisiteri y’Uburinganire n’Iterambere ry’Umuryango (MIGEPROF), yatangaje ko muri uwo mwaka, abana b’abakobwa bari hagati y’imyaka 16-19 bagera ku 17 444 batewe inda.

Ubu bukangurambaga buzamara amezi abiri bufite insanganganyamatsiko igira iti” Twubake umuryango twifuza,turwanya gusambanya abana”.

Abayobozi batandukanye bari babukereye mu rwego rwo kwizihiza uyu munsi

Ubu bukangurambaga bwatanagijwe n’ihuriro ry’abadamu b’abayobozi mu rwego rwo gukangurira abana b’abakobwa kwigirira icyizere cyo kujya mu nzego z’ubuyobozi ndetse n’izindi nzego.

Minisitiri w’Urubyiruko, Mbabazi Rose Mary ari mu bari bitabiriye uyu munsi
Ibumoso: Min. Nyirasafari, Depite Mukabarisa n’Umuyobozi wa one UN

 

Izindi wakunda

Bwiza.com