bwiza.com
Ahabanza » Iyo u Rwanda rutegereza ko hari ab’ahandi bagomba kurukorera, ntiruba rugeze aho ruri– Min Kaboneka
Amakuru Politiki

Iyo u Rwanda rutegereza ko hari ab’ahandi bagomba kurukorera, ntiruba rugeze aho ruri– Min Kaboneka

Minisitiri w’Ubutegetsi bw’Igihugu, Kaboneka Francis avuga ko iyo u Rwanda rutegereza abazaturuka ahandi kuza kurukorera, aho rugeze ubu, ruba rutarahagera.

Ibi yabitangaje ku wa Mbere tariki ya 15 Ukwakira 2018, mu kiganiro yagiranye n’abavuga rikumvikana bo mu Karere ka Nyagatare, gaherereye mu Ntara y’Iburasirazuba.

Muri uru ruzinduko Min Kaboneka yagiriye muri aka karere, yabanje kuganira n’abaturage b’umurenge wa Musheri ababwira ko hari byinshi bagezeho, bityo bakwiye kwirinda ko ibiyobyabwenge byahubangabanya iterambere barimo.

Ati “Uwanyweye ibiyobyabwenge, akora ibitabereye umuntu. Ntabwo ushobora kuba udatekanye ngo utekereze iterambere”.

Iyi ngingo kandi y’ikoreshwa ry’ibiyobyabwenge rishobora kuba inzitizi ku iterambere n’imbarutso y’ibindi byaha, yanagarutsweho n’umuyobozi wa Polisi y’u Rwanda, IGP Gasana Emmanuel, ababwira ko bisenya iterambere, bityo akaba abasaba kubyirinda.

Yagize ati “Nimuhaguruke dufatanye kurwanya ibiyobyabwenge, magendu gukubita no gukomeretsa, urugomo, amakimbirane mu ngo n’ibindi byaha byose bikwiye kwitwa kirazira iwacu, ubundi dusigare turi umudugudu uzira ibyaha”.

Ubwo yari amaze kuganira n’abaturage bo muri Musheri,  mu cyo  yagiranye n’abavuga rikumvikana bo muri Nyagatare, Min Kaboneka yabatangarije ko Kuba Nyagatare ari umujyi wungirije Kigali bifite icyo bisaba cyane cyane abaturage b’aka karere, mbere na mbere bibavuye mu maboko n’ubushobozi byabo, badategereje abandi bazaturuka ahandi.

Yagize ati “Iyo u Rwanda rutegereza ko hari ab’ahandi bagomba kurukorera, ntiruba rugeze aho ruri uyu munsi. Rwarabiharaniye; namwe rero abatuye Nyagatare ni mwe mugomba gufata iya mbere mu kuyiteza imbere”.

Arabasaba guhera ku byo bafite, ati “Mufite iby’ingenzi byose; mureke amateka azagaragaze ko mwabaye intwari zahereye ku bihari hanyuma zikabibyaza umusaruro. Nyagatare iri mu maboko yanyu”.

Akarere ka Nyagatare ni kamwe mu Turere 7 tugize Intara y’Iburasirazuba. Igabanwemwo Imirenge 14, Utugari 106 n’Imidugudu 603. Gahana imbibe n’igihugu cya Uganda mu Majyaruguru, Tanzaniya iri Iburasirazuba.

Aka karere kazwiho kugira imvura nkeya, kagizwe muri rusange n’imisozi migufi, usanga ahanini ifite ubutaka budatoshye kubera igihe kirekire cy’izuba rihera muri Kamena kugera kugera mu KUboza, ikice kini cyako kigizwe na Parike y’akagera. Aka karere kakaba gateye imbere cyane cyane ku bikomoka ku bworozi.

Abavuga rikumvikana bo mu Karere ka Nyagatare bagezwagaho ikiganiro na Min Kaboneka
Min Kanoneka arasaba abaturage b’umurenge wa Musheri kwirinda ibiyobyabwenge

Izindi wakunda

Bwiza.com