bwiza.com
Ahabanza » RDC: Inyeshyamba zirimo inkuru yitwa Shitani zishyize mu maboko ya FARDC
Amakuru mu mahanga

RDC: Inyeshyamba zirimo inkuru yitwa Shitani zishyize mu maboko ya FARDC

Ingabo za Leta ya Congo (FARDC) ku wa Mbere tariki ya 15 Ukwakira 2018, zatangaje ko abarwanyi babarirwa mu majana ba Maï-Maï n’iyindi mitwe, zabishyize mu maboko.

Izi nyeshyamba zimaze kwishyira mu maboko ya Leta, ngo zigera muri 300, zimwe ni izabarizwaga mu mutwe wa Maï-Maï itsinda rizwi nka Shetani, n’umuyobozi wazo, Mapela David uzwi ku izina rya Shetani, na we akaba yarishyize mu maboko ya Leta ku wa Gatanu tariki ya 12 Ukwakira 2018 i Kabambare.

Nk’uko bitangazwa na Radio Okapi, Ku cyumweru tariki ya 14 Ukwakira, izindi nyeshyamba zo mu mutwe ‘Chui’ nazo zishyize mu maboko ya FARDC i Kabeya, agace kari hagati ya Lulimba na Kilembwe, muri Teritwari ya Fizi.

Nk’uko bitangazwa n’Umuyobozi w’igitero cy’ingabo za Congo cyiswe Sokolo 2 gishinzwe guhashya inyeshyamba, Col. Blaise Bulenda, ngo izi nyeshyamba zari zifite intwaro, zirimo imbunda za Kalashnikov, Lance-roquette zo mu bwoko bwa (Chine) RPG 7 ndetse na bombi ebyiri.

Col. Blaise Bulenda akomeza avuga ko izi nyeshyamba zose hamwe zari zifite intwaro zisaga 60, ubu zikaba ziri mu maboko y’ingabo za Leta.

Umuyobozi mukuru wa Sokolo 2 mu Ntara y’Amajyepfo, Gén Rugahi Sengabo, avuga ko aba barwanyi biyemeje gushyira intwaro hasi, bagomba gusubizwa mu buzima busanzwe biciye mu nzira iteganywa n’amategeko kandi ko urugamba rukomeje rwo guhashya izikomeje kwinangira imitima.

Gén Rugahi Sengabo arasaba izindi nyeshyamba zirimo  Malaïka na Yakutumba, guhagarika ibikorwa zirimo by’ubunyeshyamba. Ubu butumwa zikaba zari zanabuhawe n’umugaba mukuru w’ingabo, Lt Gen. Célestin Mbala ubwo yagiriraga uruzinduko i Maniema mu Ntara ya Kivu y’Amajyepfo.

Izindi wakunda

Bwiza.com