bwiza.com
Iyobokamana

Bumbogo: Abakobwa babiri bagaburirwaga ibyatsi n’abiyita abavugabutumwa

Mu ijoro ryo ku wa Gatatu rishyira iryo ku wa Kane tariki ya 18 Ukwakira 2018,  nibwo mu rugo rw’uwiyita umuvugabutumwa yahinduye urusengero, ruherereye mu mudugudu wa Kayumba, akagari ka Musave, umurenge wa Bumbogo ho mu karere ka Gasabo, habonwe abakobwa babiri bari bamaze iminsi itanu barafungiranwe, bagaburirwa ibyatsi n’uwiswe Mama Psiteri.

Ubwo umunyamakuru yageraga kuri uru rugo ahagasa mu masaha ya saa sita z’ijoro, yahasanze abakobwa babiri bicaye mu muyaga, bamaze gusohorwa mu kazu gato kameze nk’ikiraro kuzuye umwanda n’umunuko ukabije katagaragaramo umwanya wo kuryamaho nubwo bavuga ko ariko bararagamo.

Mu ntege nke, batabasha kuvuga ku bw’inzara y’iminsi igera kuri itanu bari bafite, byabaye ngombwa ko abanza gutegereza ko babanza kugira icyo bafata mbere yo kugira icyo batangaza.

N’umwuka muke n’ibitekerezo bigaragara ko bitari byakagiye ku murongo ku bwo guhungabanywa n’ibyababayeho, babashije gusobanurira umunyamakuru uko bageze aho nubwo batemeranywa n’ababazanye bavuga ko barwaye.

Nyuma yo kumara iki gihe bakingiranye no gushyira ku munzani bagasanga ibyo bakorerwa baramutse batirwanyeho bahasiga ubuzima, aba babakobwa batari bafite uwo batakira ngo bigiriye inama yo gukora ikiri mu bushobozi bwabo cyose ngo bahikure kuko Imana bagiye bakurikiye byasaga nk’aho ntaho bagihuriye nayo.

Abaturanyi b’abo bavugabutumwa kimwe n’umukuru w’umudugudu wa Kayumba, aba bapasiteri babarizwamo ari nawo ubamo inzu aba bakobwa bari bakingiranwemo, bahurije ku cyo kuba uru rugo rukunze kuvugwamo amarozi.

Umukuru w’uyu mudugudu aganira na Radiotv1 dukesha iyi nkuru, yunzemo ko kuba aho hantu havugwa ko ari mu rusengero, hatemewe n’amategeko dore ko ubwo Leta yafungaga insengero n’amatorero bitujuje ibyangombwa n’aba bari bafungiwe.

Umuvugizi w’agateganyo w’urwego rw’ubugenzaha mu Rwanda, Mbabazi Modeste yatangaje ko nyuma yo kuvumbura iby’akorewe aba bakobwa, aba biyita abavugabutumwa bahise bashyikirizwa ubugenzacyaha.

Hagati aho uwitwa Mama Pasiteri wagaburiraga ibyatsi aba bakobwa mu gihe cyose bamaze muri urwo rugo we yahise aburirwa irengero.

Si ubwa mbere abiyita abavugabutumwa ahanini bakoresha iturufu yo gusengera abantu bakorera igisa n’iyicarubozo abo basengera, kuko mu mwaka wa 2016 mu karere ka Gasabo nabwo ngo uwiyitaga umuvugabutumwa yatwikishije imbabura uwo yavugaga ko afite amadayimoni bityo mu kuyarandurana n’imizi yayo agahitamo kuyatwikisha umuriro.

Umwe mu bakobwa babiri bari bamaze iminsi itanu bafungiranye

Izindi wakunda

1 Igitekerezo

ELISE 18/10/2018 10:08 am at 10:08 am

Mana yanjye koko ubu aba bavugabutumwa ba none bameze bate ? iyaba byashobokaga ngo akebo bagereyemo abandi nabo bakagererwemo nabo banywere kuri icyo gikombe nabo bumve. gusa ibi bintu byo kubyuka ugashinga idini bikwiye kwigwaho

Subiza

Tanga Igitekerezo

Bwiza.com