bwiza.com
Ahabanza » Perezida Kagame yujuje imyaka 61 y’amavuko
Amakuru TUBAMENYE

Perezida Kagame yujuje imyaka 61 y’amavuko

Kuri uyu wa Kabiri tariki ya 23 Ukwakira 2018, umukuru w’igihugu, Paul Kagame arizihiza isabukuru ye y’amavuko y’imyaka 61 amaze abonye izuba.

Ku wa 23 Ukwakira 1957, nibwo Paul Kagame yabonye izuba, uyu munsi abantu benshi barimo Abanyarwanda n’abanyamahanga, bakaba bamwifuriza isabukuru nziza y’amavuko, y’imyaka 61, babicishije ku mbuga nkoranyambaga zitandukanye.

Guverineri w’Intara y’Amajyaruguru, Gatabazi J.M.V, agira ati “Kuri uyu Munsi Mukuru w’Amavuko wanyu Nyakubahwa Perezida Paul Kagame tunejejwe no kubifuriza Isabukuru Nziza. Turasaba Imana gukomeza kubarinda,kubongerera Imbaraga n’ubuhanga byo kutuyobora mu mpinduramatwara n’Iterambere mwiyemeje.Umugisha wuzuye ubasakareho n’Umuryango wanyu”.

Paul Kagame yavukiye i Nyarutovu mu cyahoze ari Komini Tambwe, Perefegitura ya Gitarama, ubu ni mu Karere ka Ruhango, Intara y’Amajyepfo. Ubu aho yavukiye hitwa Umudugudu wa Buhoro.

Abanyarwanda benshi n’abanyamahanga baramwifuriza isabukuru nziza ari na ko bishimira iterambere, ubuzima bwiza, amahoro, umutekano, ubumwe n’ubwiyunge n’ibindi byinshi bagezeho nyuma y’uruhare rukomeye yagize mu kubohora u Rwanda no guhagarika Jenoside yakorewe Abatutsi mu 1994.

Nyuma yo kubohora igihugu no guhagarika Jenoside yakorewe Abatutsi, kugeza tariki ya 23 Werurwe 2000, Maj. Gen. Paul Kagame yari Visi Perezida wa Repubulika akaba n’umugaba Mukuru w’Ingabo. Ku wa 24 Werurwe 2000 ni bwo yabaye Perezida wa Repubulika muri Leta y’Inzibacyuho asimbuye Perezida Pasiteri Bizimungu wari umaze kwegura.

Mu mwaka wa 2001, nibwo yatowe bwa mbere n’abaturage, kubera iterambere yari akomeje kubagezaho, bongeye kumugirira icyizere mu mwaka wa 2010, atorwa kuri manda ya kabiri.

Ibikorwa bya Perezida Kagame byibanze ku guharanira iterambere ry’ubukungu n’imibereho myiza y’Abanyarwanda binyuze mu gushakira igihugu abashoramari bakorera mu Rwanda no kuborohereza no kwagurira amahanga amarembo mu bya Politiki, ubuhahirane n’ubutwererane.

Abaturage bashyiriweho gahunda zinyuranye, zirimo iya Girinka Munyarwanda, Mudasobwa imwe ku mwana n’Uburezi kuri Bose , Ubwisungane mu Kwivuza (Mituweli), Ikigega Agaciro, guca Nyakatsi,…

Ibi kandi byatumye imibereho y’abarutage ikomeza kuba myiza kuko kuri ubu icyizere cyo kubaho kigeze ku myaka 66 nk’uko bigaragazwa n’Ikigo cy’Igihugu cy’Ibarurishamibare.

Abanyarwanda bahisemo guhindura Itegeko Nshinga ngo Perezida Kagame akomeze abafashe gutera intambwe igana imbere ndetse n’icyerekezo cy’igihugu gikomeze kuba ntamakemwa guhera mu mwaka wa 2017 nyuma ya manda ebyiri amaze ku buyobozi.

Muri Kanama 2017, ubwo Itegeko Nshinga ryamwemereraga kwiyamamaza ku yindi manda, nyuma y’ubusabe bw’abaturage bw’uko Itegeko Nshinga ryahindurwa, Paul Kagame yatorewe kuyobora indi manda y’imyaka irindwi.

Ubu akaba ari Umuyobozi w’Umuryango wa Afurika Yunze Ubumwe (AU) muri uyu mwaka, akaba akomeje urugendo ruganisha u Rwanda ku iterambere rirambye, ndetse na Afurika muri rusange.

Perezida Kagame yashakanye na Madamu Jeannette Kagame mu 1989, ubu bafitanye abana bane, abahungu batatu n’umukobwa umwe. Imfura yabo ni Yvan Cyomoro Kagame, ubuheta ni Ange Ingabire Kagame, hagakurikiraho Ian Kagame n’umuhererezi Brian Kagame.

Izindi wakunda

Bwiza.com