bwiza.com
Ahabanza » Rusizi: Abahoze ari inzererezi n’abafite ubumuga barashima Leta yabagaruriye icyizere
Amakuru Iterambere ry'umuryango

Rusizi: Abahoze ari inzererezi n’abafite ubumuga barashima Leta yabagaruriye icyizere

Bamwe mu bana bahoze ari inzererezi mu mujyi wa Rusizi ndetse n’abafite ubumuga, bahamya ko iyo  igihugu gifite Leta nziza yita ku baturage, ntacyo batageraho.

Babigaragaje ubwo  umuryango ‘Rwanda aid’ wita ku bana bafite ibibazo binyuranye by’imibereho, cyane cyane  inzererezi, abafite ubumuga, abana baturuka mu miryango ikennye cyane n’abandi mu turere twa Rusizi na Nyamasheke wizihizaga imyaka 10 umaze ushinzwe.

Muri iyi myaka kandi,abana barenga 500 bafite ubumuga bunyuranye bitaweho mu buryo bwose bubagarurira icyizere cyo kubaho neza, aho bafashijwe kwiga, guhabwa inyunganirangingo n’ibindi bakenera.

Dusabimana JMV w’imyaka 20 y’amavuko avuga ko nyuma yo gufashwa kuva mu buzererezi yiyemeje kwiteza imbere. Yagize ati’’ nakuwe mu buzererezi nigishwa kogosha none ubu ndinjiza amafaranga arenga ibihumbi 150 mu kwezi  ubuzima bwanjye bwarahindtse, nkabishimira Leta yacu yita ku bana bose ndetse na Rwanda aid yanyigishije.’’

Ndayisabye Fidèle w’imyaka 23, avuga ko kugira ubumuga bukomeye bw’ingingo bwatumaga ahezwa,  byari byaramuteye kwiheba ariko ubu yarangije icyiciro cya mbere cy’ayisumbuye akaba hari n’ibindi azi gukora; aremeza ko iyo hataba  ubuyobozi bwiza yari kuzapfa ntacyo yimariye.

Bariyizi Félicien uhagarariye uyu muryango nterankunga w’abongereza mu Rwanda, avuga ko ibikorwa bamaze gukorera aba bana, kubakira abatishoboye, guhugura abarezi bigisha abana bafite ubumuga, gufasha abaturage kwivana mu bukene n’ibindi bimaze gutwara arenga miliyari eshatu.

Ati ’’buri mwana wari inzererezi cyangwa ufite ubumuga bunyuranye yarafashijwe, abari barataye imiryango bayisubizwamo bitewe n’impamvu yabiteye kuko tubanza kumva umwana tukabona kumva n’umuryango we, ahari amakimbirane dufasha mu kuyahosha ngo abana basubire mu miryango batekanye  tubafashirizemo, abataragiraga shinge na rugero bashakirwa imiryango ibakira,…”.

Sally Chaplin, umufasha w’uwashinze umuryango Rwanda aid,  David Chaplin, yishimiye kuba aba bana bihamiriza ko aho bafashirijwe kuva mu buzima bubi barimo bahinduye imibereho, avuga ko bazakomeza kwita ku bana nk’aba, bakanafasha n’abandi batishoboye muri utu turere nk’uko babikora, asaba abagenerwabikorwa guha agaciro ubufasha  bahabwa bagakomeza kwiteza imbere.

Umunyamabanga nshingwabikorwa w’aka karere Mushimiyimana Ephrem, avuga ko impamvu zituma abana bajya mu muhanda  zigihari, cyane cyane izituruka ku makimbirane yo mu miryango n’ubukene bukabije mu miryango imwe n’imwe, ko akarere ku bufatanye na Rwanda aid bakora ibishoboka byose ngo abana bagirwaho ingaruka n’izi ngorane zose kimwe n’abafite ubumuga bashakirwe imibereho myiza.

Madamu Sally Chaplin avuga ko bazakomeza gufasha u Rwanda gukemura ku buryo bugaragara ikibazo cy’imibereho y’abana b’inzererezi n’abafite ubumuga

 

Izindi wakunda

Bwiza.com