bwiza.com
Ahabanza » Guverinoma y’u Rwanda yiyemeje gutanga uburezi bufite ireme- Min.w’Intebe, Dr Ngirente
Featured Mu mashuli

Guverinoma y’u Rwanda yiyemeje gutanga uburezi bufite ireme- Min.w’Intebe, Dr Ngirente

Minisitiri w’Intebe, Dr Ngirente Edouard, yatangarije mu karere ka Huye ko Guverinoma y’u Rwanda yiyemeje guteza imbere uburezi bufite ireme kandi kuri bose.

Ibi yabigarutseho ubwo yagezaga ijambo ku bitabiriye umuhango wo gutanga impamyabumenyi ku banyeshuri basoje ibyiciro bitandukanye muri Kaminuza Nkuru y’u Rwanda, umuhango ukaba wabereye mu karere ka Huye, kuri uyu wa Gatanu tariki ya 2 Ugushyingo 2018.

Minisitiri w’Intebe ashima Kaminuza Nkuru y’u Rwanda kubera uruhare igira mu gutanga ubumenyi yita ubwo ku rwego rwo hejuru bufasha Igihugu kubona abakozi bafite ubushobozi ari muri urwo rwego Guverinoma ngo izakomeza kuyiba hafi.

Ati “Guverinoma y’u Rwanda ikomeje kuba hafi no gushyigikira Kaminuza y’u Rwanda muri gahunda zayo zitandukanye zigamije kuyiteza imbere no kuzamura ireme ry’uburezi”

Nk’uko bikubiye muri Gahunda ya Guverinoma y’Imyaka irindwi 2017-2024, ngo Guverinoma y’u Rwanda yiyemeje gutanga uburezi bufite ireme kandi bugera kuri bose no kurushaho kwihutisha iterambere ry’ubukungu bushingiye ku bumenyi.

Ati “Kugira ngo ibi bizagerweho, Guverinoma yiyemeje gushyira imbaraga mu guhuza no kunoza uburezi n’ibikenewe ku isoko ry’umurimo”

Agaruka ku bibazo bimaze igihe bivugwa muri iyi Kaminuza, Minisitiri w’Intene, yagize ati “Kuva mu kwezi k’Ugushyingo 2017, Guverinoma yashyizeho Itsinda ryihariye ryasesenguye ibibazo byose byatumaga Kaminuza y’u Rwanda idashobora gusohoza inshingano zayo uko bikwiye ikaba yarafashe ingamba zo kuzikemura”.

Yakomeje ashima ko ishyirwa mu bikorwa ry’ingamba Minisiteri y’Ubutegetsi bw’igihugu yafashe ngo zikemure ibibazo bya Kaminuza, rimaze gutanga umusaruro ushimishije. Atanga urugero ku buryo bushya bwo kunganira umutungo wa Kaminuza y’u Rwanda bwemejwe n’Inama y’Abaminisitiri yo ku wa 14/02/2018.

Ashingiye ku bimaze gukorwa muri Kaminuza y’u Rwanda n’imbaraga Guverinoma ikomeje gushyiramo ku bufatanye n’abafatanyabikorwa bayo mu by’uburezi, ngo yizera ko Kaminuza y’u Rwanda izarushaho kugera ku ntego nyamukuru yayo yo guteza imbere uburezi bufite ireme.

Kaminuza y’u Rwanda yahaye impamyabumenyi abanyeshuri 7,050 barangije neza amasomo yabo, mu byiciro bitandukanye by’ubumenyi, uyu mwaka wa 2018.

Izindi wakunda

Bwiza.com
error: Ntibyemewe