bwiza.com
Ahabanza » Imitangire mibi ya serivisi ikigaragara mu Rwanda izakemurwa nande?
Featured INKURU TWABAHITIYEMO Politiki

Imitangire mibi ya serivisi ikigaragara mu Rwanda izakemurwa nande?

Ejobundi mu Ukwakira 2018, Ku nshuro ya gatanu urwego rushinzwe imiyoborere mu Rwanda (RGB), ruherutse kumurika raporo yerekana uko u Rwanda ruhagaze mu nzego zitandukanye z’imiyoborere, harimo n’imitangire ya service, u rwego rukunze kuba ruri inyuma n’amanota ari hasi ugereranije n’zindi nzego ziza mbere nk’ urw’ umutekano.

Imitangire ya service bigaragara ko hakirimo icyuho gikomeye nubwo hashyirwa imbaraga mu gukangurira abaturage n’abayobozi gufata ingamba zizamura uru rwego, hakaba hibazwa ugomba gukemura iki kibazo aho kigaragara mu Rwanda.

Nubwo bimeze bityo kuva imyaka itanu ishize nta gihinduka cyane, bishoboka ko haba hakenewe izindi ngamba zirenze kandi zikakaye zatuma ibintu bihinduka mu buryo bwiza. Mu ngamba zihari hagombye gutekerezwa ko zidahagije bityo ababishinzwe nabo ubwabo bagahinduka bagafasha mu gutuma hakosorwa ibidindiza imitangire myiza ya service.

Ingero: kuri nimero zatanzwe zitishyurwa watabaza mu gihe ushaka gutanga amakuru yihuse aho umuntu yakiriwe nabi nuko yahawe service mbi, usanga imirongo iba ivugirwaho banakwakira bitinze ntibihutire gukurikirana amakuru watanze bikarangira ntacyo babikozeho.

Nigeze kuva Kigali imodoka itwara abagenzi yari imbere yacu dukurikiranye izamuka Shyorongi yose ishaka kudepasa ikamyo mu makoni umushoferi atitaye ku kureba imbere niba nta kindi kinyabiziga kimanuka cyateza impanuka, ntiyatekerezaga ubuzima bw’ abantu atwaye agiye gushyira mu kaga, azamuka atyo adepasa izindi modoka mu makona ariko narahamagaye ndabivuga nkeka ko imodoka bayifatira imbere ntihagira igikorwa!

Umuntu yagiye ku bitaro bya Gisenyi yarumwe n’imbwa yakirwa muri urgence bamusaba kujya hanze kugura urukingo muri pharmacy yagarutse saa cyenda, amara amasaha atatu ataradodwa ataraterwa urwo rukingo. Byaramurenze kuko yaraziranye n’ abayobozi bakuru aratabaza abaganga bamwakira mu gihe kitarenze iminota icumi baramudoda aterwa n’ urukingo.

Icyatangaje bamaze kudoda igikomere bamubwiye ko yihangana ibikoresho byo kuhapfuka byashize baza gukomeza bibonetse. Ubwo yicaye aho arongera ategereza nk’andi masaha abiri. Umurwayi agaparika aho mugihe amerewe nabi n’uburibwe, ububabare.

Muri ibi bitaro havugwaho kutihutisha serivice kuko n’ubwo MINISANTE yabujije amatelefoni ku kazi ho agikoreshwa ugasanga barangaranye abarwayi biganirira ibidafasha umurwayi n’ama rendez-vous y’abarwayi baziranye.

Abaforomo cyangwa abakozi bamwe ntibakurikiza uko abantu baje babagana kuko bamwe muribo baca inyuma bagacengeza amafishi kwa muganga abaje nyuma bagashyirwa imbere. Ushobora kuhamara iminsi ibiri wirukanka utarabona muganga.

Ibi kandi abaganga ntibabimenya n’ ubuyobozi nkeka ko butabizi. Kugira ngo ibi mvuga byumvikane neza ababishinzwe bazatungurane mu masaha y’umugoroba babaze abantu batandukanye igihe baba bahagereye niba batazasangamo abahamaze kabiri!

Iyo ubajije buri gihe baguha ugisubizo cy’uko hari ikibazo cy’abaganga bake, nanjye nkabaza nti ese kuki amavuriro y’igenga afite n’abakozi bake ibyo bibazo bitahaboneka! Mu ivuriro cyangwa ibitaro byigenga wakabije nabwo wakoresheje ibizamini ushobora kuhamara amasaha abiri. Mu bigenga bakakwakirana umutima mwiza bakuvugisha neza naho ahandi bakakwakirana isesemi, ubwirasi n’ ibindi nk’ibyo.

Ibi biranyibutsa ahandi hantu ku umushinjacyaha ku Gisenyi nagiye kureba mukeneyeho serivice gusa, anyakirana agasuzuguro gakaze ambaza ibibazo ubona mu byukuri byaribyo kumfungisha umunwa ndumirwa nibaza niba rubanda rugufi rwabasha kumwegera akarufasha.

Ingero ni nyinshi aho abakozi badakora neza abaturage bakahagwa ntibahabwe ubufasha kandi igihugu kidahwema kubasaba gutanga serivice nziza kandi zihuse. Umukuru w’ igihugu ntawema kubigarukaho mu mbwirwaruhame cyangwa mu biganiro iyo avuga ku mitangire ya serivice aho agira ati: ni musigeho kwiremereza ati ese ninde kwicisha bugufi byishe?”!

Kuba RGB ihora ikora ubushakashati bene abo bantu natanzeho ingero hamwe n’abandi nkabo bakadindiza uru rwego bakwiriye kumenya ko babangamira iterambere ry’igihugu cyacu kandi turi mu cyerekezo cyo kuryihutisha. Ntawe ufata umuriro w’imodoka mu gihe kimwe ngo afate na feri kandi ashaka ko imodoka ijy’ imbere.

Bene abo bantu ntaho baba bataniye he n’abanzi b’ igihugu? abarya ruswa, abatera u Rwanda? Nibamenye ko ubukungu bw’ igihugu cyacu ahanini bushingiye kuri serivice kuko ntawundi mutungo kamere dufite.

Nsoza najya inama ko bene abo bantu bajya bakurikiranwa kimwe n’abadindiza iterambere ry’ ubukungu bw’igihugu, abaturage bagatinyurwa bakajya batungira agatoki ababahaye serivice mbi, kunoza uko amakuru yajya atangwa byihuse, guhemba buri mwaka abantu cyangwa ibigo byakoze neza, kugaya cyangwa kunenga kumugaragaro ahagaragaye imikorere mibi.

Ndashima ariko ibigo nka RURA na DG Migration ibigo by’agahebuzo ababishinzwe bari bakwiriye kubashimira ku mugaragaro kubera imikorere iboneye kandi myiza. Ndetse RGB ikazahemba abazaba baragize uruhare mu kuzamura amanota y’uru rwego rwakomeje gusigara inyuma ikanahemba ibigo bitanu bya mbere byabonye amanota menshi mu miyoborere.

 

Samuel Munyakayanza

Izindi wakunda

Bwiza.com