bwiza.com
Ahabanza » RDC: Imirwano hagati ya FARDC n’inyeshyamba yaguyemo abantu 16
Amakuru mu mahanga

RDC: Imirwano hagati ya FARDC n’inyeshyamba yaguyemo abantu 16

Imirwano yabaye hagati y’ingabo za Leta ya Congo (FARDC) hamwe n’imitwe y’inyeshyamba, yaguyemo abantu 16 barimo abasirikare ba Leta bane.

Abantu batatu bishwe n’amasasu ku wa Gatandatu tariki ya 3 Ugushyingo 2018, mu gace ka Sake, Teritwari Masisi, mu Ntara ya Kivu y’Amajyaruguru, aho FARDC yarwanaga n’umutwe w’amabandi yari yitwaje intwaro.

Nk’uko Radiyo Okapi ibitangaza, mu bantu bahasize ubuzima harimo umusirikare umwe wa Leta wari ucunze umutekano kuri sosiyeti ya TRABMECO hamwe n’amabandi ane.

Abandi bantu batandatu bakomerekejwe n’amasasu, bajyanwa kuvurirwa mu bitaro ‘CEBCA/Ndosho’ i Goma

Abandi bantu 11 barimo abasirikare ba Leta batatu barishwe abandi icyenda bakomerekera mu yindi mirwano yabaye ku wa Gatadantu tariki ya 3 Ugushyingo, yashyamiranyije FARDC n’umutwe w’inyeshyamba i Muganga, muri teritwari ya Djugu (Uturi)

Iyi radiyo itangaza ko abantu bari bitwaje intwaro zirimo imyambi n’imbunda ahagana saa kumi z’igitondo bagabye igitero ku kigo cya gisirikare i Muganga, bakozanyaho n’abasirikare ba FARDC. Imibare yatangajwe igaragaza ko abantu 11 bahasize ubuzima abandi icyenda barakomereka bajyanwa kuvurirwa ku bitaro bya Angumu.

Umudepite uvugira Intara ya Ituri, Claver Bedidjo yasabye Leta gufata iki kibazo cy’ubwicanyi nk’igikomeye, ndetse anasaba ko abasirikare bahabwa ibikoresho bihagije byajya bibafasha guhangana n’imitwe y’inyeshyamba.

 

Izindi wakunda

Bwiza.com