bwiza.com
Ahabanza » Rusizi: Prof. Shyaka yatunguwe no gusanga 40% bari mu cyiciro cya mbere n’icya 2 by’ubudehe
Featured Politiki

Rusizi: Prof. Shyaka yatunguwe no gusanga 40% bari mu cyiciro cya mbere n’icya 2 by’ubudehe

?

Umunsi wa mbere w’uruzinduko Minisitiri w’ubutegetsi bw’igihugu, Prof. Shyaka Anastase agirira mu turere twa Rusizi na Nyamasheke yarutangiriye mu karere ka Rusizi, aho yasuye ibikorwa binyuranye birimo iby’iterambere atungurwa no gusanga 40% by’abaturage bari mu kiciro cya mbere nicya 2 cy’ubudehe.

Mu bikorerwa kandi yabanje gusura harimo no ku mipaka ya Rusizi ya mbere n’iya 2, ikiraro gishya kiri kuri Rusizi ya mbere n’ubu kitaratangira gukoreshwa, Hotel Kivu Marina Bay yubakwa muri aka karere, n’ikaragiro ry’amata rya Giheke rimaze igihe ryaradindiye,abonera ho no kuganira n’abakozi bose b’akarere kuva ku rwego rw’akagari.

Min. Prof.Shayaka Anastase asobanurirwa imikorere yo kumupaka wa Rusizi ya mbere.

Mu byo yagejejwe ho n’umunyamabanga nshingwabikorwa w’aka karere, Mushimiyimana Ephrem byamutunguye cyane ni ukuba abaturage benshi bako bakiri mu bukene bukabije, aho 10% by’abaturage 430.289 bagatuye bari mu cyiciro cya mbere cy’ubudehe, abagera kuri 30% bakaba mu cya 2 cy’ubudehe, abana bagera kuri 34% bari munsi y’imyaka 5 bakaba bari mu mirire mibi, kandi nyamara ubukungu gafite ngo ari ntagereranywa.

Ubushakashatsi kandi  bwakozwe mu mwaka 2015 n’Ikigo cy’Ibarurishamibare mu Rwanda (NSIR) , bugaragaza ko akarere ka Rusizi katari mu uturere dufite ubukene bukabije kuko kari ku ikigero cya 35.1% mu gihe akarere ka Nyamasheke gafite ubukene bukabije gafite 62%. ibi bikaba bitera kwibaza uwariwe wese uhereno uba ari kamwe mu karere gafite umujyi washyizwe muyunganira Kigali.

Minisitiri Prof.Shyaka Anastase, yabwiye aba bayobozi ko bikojeje isoni kubona akarere nk’aka, gafite byinshi benshi mu tundi turere bifuza bitabuza ko bamwe mu baturage bako baba mu bukene bukabije, akavuga ko biterwa n’abayobozi badafasha abaturage gusoroma aya mahirwe adasanzwe akarere gafite, agasanga iyi atari ishusho ikwiye gukomeza kukaranga.

Yagize ati’’ ishusho ndayibonye y’akarere, kandi ndababwiza ukuri ntabwo ijyanye n’amahirwe gafite. Kubona akarere nk’aka abaturage 10% bari mu cyiciro cya mbere cy’ubudehe, ubateranije n’abari mu cya 2 bakagera kuri 40% n’amahirwe ari aha, n’ubukire buhari, n’imbaraga zishyirwa mo ngo abaturage bazamuke, icyo ni cyo mushaka ko abaturage bakomeza kumera batyo? Ubwo murumva twadamarara nk’ubuyobozi?’’

Yakomeje agira ati’’ ntabwo twadamarara, iyo shusho ntijyanye n’icyerekezo cy’akarere, nta n’ubwo ijyanye n’ubushobozi buhari, nta n’ubwo ijyanye n’icyifuzo cy’igihugu, ni ukuvuga mu byo dushyira imbere mu igenamigambi ry’igihugu. Ntabwo abaturage 40% bashobora kuba bari mu bakene badigadiga, icyo ni cyo tugomba guhera ho.’’

Min. Prof. Shyaka Anastase ( hagati) asaba abayobozi muri aka karere imikorere n’imikoranire inoze mu rwego rwo kuzamura imibereho y’abaturage.

Avuga ko hari gahunda zitandukanye z’imibereho myiza y’abaturage zigomba guhyirwa mu bikorwa neza kugira ngo kwa kuzamuka gushoboke, ari yo mpamvu asanga umwana adakwiye kuvukira mu cyiciro cya mbere cy’ubudehe ngo azarinde ashaka akikiri mo, akavuga ko ubuyobozi bukwiye gufasha ngo ibyo bihinduke vuba.

Yasabye abayobozi kurangwa n’imikorere n’imikoranire inoze, gahunda zizamura imibereho y’abaturage nk’uturima tw’igikoni n’izindi ntizisinzirizwe kandi zarashyiriwe ho gukemura ibibazo nk’ibyo by’imirire mibi, akavuga ko nk’akarere gafite umujyi washyizwe mu mijyi yunganira umujyi wa Kigali abaturage bako bakwiye kugira imibereho itandukanye n’iy’uturere tw’icyaro tudafite amahirwe y’iterambere nk’ayo aka gafite.

Umuyobozi wungirije ushinzwe imibereho myiza y’abaturage mu karere ka Rusizi, Nsigaye Emmanuel, yavuze ko hari byinshi bikorwa ngo ikibazo cy’ubukene bukabije mu baturage gikurura n’imirire mibi itera kuwingira kw’abana kigabanuke,hagomba imbaraga zikomatanije z’abayobozi n’abaturage, ko bigiye kwitabwa ho hakagira igihinduka vuba.

Ubushakashatsi kandi bwakozwe ku mibereho y’abana bwakozwe n’ikigo cy’igihugu cy’ibarurishamibare mu mwaka 2014-2015, kandi bwashyize Akarere ka Rusizi ku mwanya wa 5 mu kugira abana bari munsi y’imyaka 5 bagaragaraho ubugwingire , aho aka karere kaje kari gafite 35% gakurikiye uturere twa Nyabihu yaje ku mwanya wa mbere na 59%, Ngororero 56%, Karongi 49%, Rutsiro na Rubavu 46%, Rusizi 35% na Nyamasheke 34% twose tubarizwa mu Ntara y’Ibirengerazuba.

Iyi mbonerahamwe (Graphics) igaragaza n’uburyo Intara y’iburengerazuba yaje kumwanya wambere mu kugira abana benshi bafite ibibazo by’ubugwingire mu mwaka 2014-15 (NISR), uhereye ku kuba imiryango myinshi yo mu Karere ka Rusizi , 40%  ubwayo ibarizwa mu cyiciro cya mbere ni cya kabiri, ibi bishobora kugira ingaruka kumikurire y’abana, ariko kakaba ari nakamwe mu uturere dufite ubukungu budafite ikibazo kanashyizwe mu mijyi igomba kunganira Kigali .

Mu rwego rw’igihugu, abana bagwingiye bangana na 38% : Intara y’Uburengerazuba ifite impuzandengo ya 45%. Intara y’Amajyepfo ifite 41%, iy’Amajyaruguru ifite 39%, Uburasirazuba 35%, naho Umujyi wa Kigali ufite 23%. Ku bana bari munsi y’imyaka 5 uturere twa Nyabihu, Ngororero, Nyamagabe, abagwingiye nibo benshi nkuko ubu bushakashatsi bwabigaragaje mu mwaka wa 2014-2015. Ibi bisobanuye ko aka karere nubundi gashobora kuzisanga mu myanya ya mbere mu kugira ubugwingire cyangwa abana bagaragaraho imibereho mibi bitewe nuko byose bihera mu muryango. Aha wakwibaza niba hari 40% babarirwa mu cyiciro cya mbere ni cya kabiri, imibereho y’abana iteye ite?.

Aka ni ko Karere ka mbere Min. Prof. Shyaka Anastase asuye nk’akarere kuva yagirwa Minisitiri w’ubutegetsi bw’igihugu, mu bindi bibazo yasabye ko byakemuka byihuse harimo n’ikibazo cy’ibicanwa aho 84% by’abatuye aka karere bagikoresha inkwi mu gucana, uyu mubare ngo ukaba ukiri hejuru cyane, ukwiye kugabanuka.

Abayobozi banyuranye basabwe ubufatanye n’abaturage ubukene bukabije bukagabanuka muri aka karere.

Izindi wakunda

Bwiza.com