bwiza.com
Ahabanza » Paul Pogba avuga ko kwamburwa ubuyobozi ntacyo byamuhungabanyijeho
Imikino

Paul Pogba avuga ko kwamburwa ubuyobozi ntacyo byamuhungabanyijeho

Paul Pogba umaze igihe avugwaho gushyamirana n’umutoza we, Jose Mourinho mu ikipe ya Manchester United, yatangaje ko nta kibazo na kimwe afite nyuma yo kwamburwa ubuyobozi.

Uyu mutoza w’imyaka 25 y’amavuko, yakuwe ku mwana w’uwungirije kapiteni na Jose Mourinho biturutse ku mwuka mubi wari hagati yabo, ubu akaba avuga ko nta ngaruka byigeze bimugiraho.

Yagize ati “Kunyaka igitambaro [nka visi kapiteni], nta kintu na kimwe bihindura, Icyo nshaka gusa ni ugukina uko nshoboye kose. Nta ngaruka byangizeho,… Nishimiye kwambara umwenda wa Manchester United, [gukinira] iyi kipe. Mu kibuga, iteka [nkina] mwenyura”.

Mu mikino ibiri yo muri shampiyona y’uyu mwaka, Pogba yabaye kapiteni w’iyi kipe mu gihe Antonio Valencia atari mu kibuga kubera imvune, ariko mu kwezi kwa cyenda abwirwa ko atazongera kuba kapiteni wungirije w’iyi kipe.

Ibi Mourinho yabibajijwe mu kiganiro yagiranye n’abanyamakuru kuri uyu wa Gatatu tariki ya 7 Ugushyingo 2018, mbere y’umukino Manchester United  ikinira mu Butaliyani n’ikipe ya Juventus mu mikino ya Champions League.

Mourinho yagize ati “Ntekereza ko tubanye neza. Navuga ko ari umubano mwiza hagati y’umutoza n’umukinnyi w’umupira w’amaguru”.

Umufaransa Paul Pogba w’imyaka 25 y’amavuko, yageze mu ikipe ya Manchester United mu mwaka wa 2016 aguzwe miliyoni 89 z’amapawundi, umwaka umwe yagereyemo n’umutoza we Mourinho wari uvuye Chelsea.

Izindi wakunda

Bwiza.com