bwiza.com
Ahabanza » RDC: Inzovu yishe umuntu ukekwaho kuba nyirayo nawe aricwa
Amakuru Politiki

RDC: Inzovu yishe umuntu ukekwaho kuba nyirayo nawe aricwa

Inzovu y’inyagasozi imaze ibyumweru ibunga mu baturage yiswe “Ya Mado” kuri uyu wa kabiri, itariki 06 Ugushyingo, yishe umugore wo mu giturage cya Bahaha muri Teritwari ya Ituri, ho muri Kivu y’Amajyaruguru, aho nyuma y’urupfu rw’uyu mugore abaturage bariye karungu bahise bivugana umuntu bikekwa ko ari we utunze iyi nzovu.

Iyi nkuru dukesha Radio Okapi ivuga ko nyakwigendera yajyaga mu murima ari kumwe n’umugabo we ahagana saa tatu za mugitondo mu nkengero z’igiturage cya Bahaha ubwo bacakiranaga n’inzovu umugabo akabasha gucika naho umugore ikamucagaguramo ibice.

Amakuru yahise akwirakwira byihuse mu giturage, maze imbaga y’abaturage yariye karungu igaba igitero ku witwa Baudouin Zamotine, se w’umukuru w’igiturage cya Bandisangu, nawe wishwe n’iyi nzovu. Abaturage rero bafata Baudouin nka nyiri iyi nzovu kandi ari we uyitaho.

Ibi byamuviriyemo kwivuganwa n’aba baturage barangije umurambo we bajya kuwujugunya ku muhanda. Umwuka mubi ukaba warakomeje kugeza mu masaha ya nyuma ya saa sita kuri uyu wa Kabiri muri Bahaha ndetse ngo n’urujya n’uruza rw’imodoka rukaba rwarabangamiwe ku muhanda Komanda-Kisangani nyuma y’ibyo bintu.

Biravugwa ko iyi nzovu kugeza ubu imaze kwivugana abantu bagera kuri batanu, yangije ibintu byinshi ndetse igatuma abaturage ba Bahaha no mu nkengero bamwe bahunga.

 

Izindi wakunda

Bwiza.com