bwiza.com
Ahabanza » USA: Abademokarate batsindiye kuyobora Inteko Ishinga Amategeko
Amakuru Politiki

USA: Abademokarate batsindiye kuyobora Inteko Ishinga Amategeko

Imibare imaze kuva mu biro by’amatora muri Leta Zunze Ubumwe za Amerika iragaragaza ko abademokarate batsinze mu bice byinshi ariko ko nta cyizere ko bashobora gutsinda ku majwi menshi cyane, mu gihe hari abasanga Perezida Trump atazoroherwa mu kurangiza manda ebyiri.

Nubwo bimeze gutyo, amahirwe y’uko abademokarate bashobora kuyobora Sena yo asa nk’aho akiri macye nyuma yo gutsindwa muri leta ya Indiana na Tennesse Perezida Trump yakuyemo amajwi menshi cyane mu 2016.

Muri aya matora, imyanya 435 mu nteko ishinga amategeko niyo irimo guhatanirwa ndetse n’imyanya 35 muri Sena ndetse nab a guverineri batari bacye.

Imibare imaze kujya ahagaragara ikaba igaragaza ko Abademokarate bafite amajwi 213 angana na 49%, mu gihe Abarepubulikani bafite amajwi 191 angana na 43,9%, mu gihe muri Sena Abademokarate bafite amajwi 404, naho Abarepubulikani bakaba bafite 435.

Muri rusange nk’uko tubikesha VOA, ngo byagaragaye ko Abanyamerika bitabiriye amatora ku bwinshi nubwo mu maleta atari macye imvura yazindutse igwa ndetse yirirwa igwa.

Nubwo Perezida Trump atari mu batorwa, benshi mu batoye mu gihugu basanga aya matora ari nka referandumu ku myaka ibiri amaze ku butegetsi.

Nk’uko ibitekerezo bitandukanye byagiye biva mu bantu bivuga, ngo Abademokarate bahangayikishijwe n’ibijyanye n’ubuzima n’ubukungu, mu gihe Abarepubulikani bo bahangayikishijwe n’ibibazo by’abimukira.

Abademokarate bakaba bari bakeneye imyanya 23 ngo bayobore inteko ishinga amategeko yari yiganjemo abarepubulikani. Aba ba nyuma ariko bigaragara ko bakiganje muri Sena.

 

Izindi wakunda

Bwiza.com