bwiza.com
Ahabanza » Inkongi y’umuriro yahitanye Umubyeyi n’abana be batatu barimo uruhinja
Amakuru Politiki

Inkongi y’umuriro yahitanye Umubyeyi n’abana be batatu barimo uruhinja

Agahinda katashye abaturage bo mu giturage cya Nabutiti muri Makindye y’Uburasirazuba muri Kampala mu gihugu cya Uganda mu gitondo cyo kuri uyu wa Gatatu, itariki 07 Ugushyingo, nyuma y’aho umugore n’abana be batatu barimo uruhinja rw’amezi 8 bapfiriye rimwe bazize inkongi y’umuriro yibasiye inzu yabo baryamye mu masaha ya nijoro.

Igipolisi cya Kampala kivuga ko iperereza ry’ibanze ryagaragaje ko umubyeyi yibagiwe kuzimya buji yari yashyize hafi y’uburiri bwabo. Polisi ikavuga ko umuriro wahereye kuri matora mu gihe abo bantu bane bo mu muryango umwe bari basinziriye.

Twabwiwe n’abaturage ko umubyeyi yakundaga gukoresha buji ndetse no muri iryo joro yarayicanye,” uyu ni umuvugizi w’igipolisi cya Kampala, Luke Oweyesigire.

Abaturage kandi bavuze ko muri iyi nzu nta mashanyarazi yabagamo ari nayo mpamvu buji ari yo bifashishaga mu gucana. Luke Oweyesigire akaba avuga ko uwo mubyeyi wishwe n’inkongi yitwa Annet Tusasirwe w’imyaka 35 n’abana be barimo; Elijah Akankwasa w’imyaka 10, Musa Kyakuha w’imyaka 5 n’uruhinja rw’amezi 8 rwitwa Rebecca.

Igipolisi kikaba kivuga ko cyatabajwe nka saa saba z’ijoro ariko mu kuhagera ntikibashe gukiza aba bantu nk’uko Daily Monitor dukesha iyi nkuru ikomeza ivuga.

Igipolisi kandi cyaboneyeho kugira inama abaturage yo kujya bazimya buji ndetse no kuzimya amatara mu gihe bagiye kuryama cyangwa bavuye mu rugo.

 

Izindi wakunda

Bwiza.com