bwiza.com
Ahabanza » RDC: Ese koko Katumbi na Dr Mukwege baba baherutse kurwanira I Buruseli?
Amakuru Politiki

RDC: Ese koko Katumbi na Dr Mukwege baba baherutse kurwanira I Buruseli?

Fondation Panzi ya Dr Denis Mukwege uherutse kwegukana igihembo cya Nobel cy’Amahoro, irahakana amakuru ivuga ko ari impuha aherutse gutangazwa avuga ko umunyapolitiki utavuga rumwe n’ubutegetsi bwa Congo, Moise Katumbi, yarwaniye na Dr Mukwege I Buruseli mu Bubiligi.

Ni inkuru yakwirakwijwe kuwa Kabiri ushize, itariki 06 Ugushyingo 2018 yemezaga ko impuguke mu kuvura indwara z’abagore y’Umunyekongo, Dr Denis Mukwege ndetse n’uwahoze ari Guverineri wa Katanga barwaniye I Buruseli mu Bubiligi.

Aya makuru rero byaje kwemezwa ko ari ibihuha nyuma yo kumenyekana ko uwo munsi bivugwa ko habaye guhangana, Denis Mukwege yari i Bukavu ku Bitaro bya Panzi.

Fondation Panzi ya Denis Mukwege ikaba yanyomoje aya makuru igira iti: “Fondation Panzi iranyomoza ikomeje ibihuha mu nkuru yahawe umutwe uvuga ko ‘Habaye guhangana gukomeye hagati ya Katumbi na Mukwege I Buruseli! Yasohowe kuwa Kabiri itariki 06 Ugushyingo 2018 saa 14h42 ku rubuga Southafricanews.canalblog.com ndetse ikanyura kuri whatsApp.”

Iyi fondation nk’uko itangazo ryayo ryageze kuri Politico.cd dukesha iyi nkuru rivuga, ivuga ko bitandukanye n’ibyatangajwe, Dr Mukwege atigeze ajya i Buruseli ari ku Bitaro bya Panzi i Bukavu muri Repubulika iharanira Demokarasi ya Congo aho avurira abarwayi be.

Iyi foundation ikaba yakomeje yamagana icyo yise itekinika rigamije gusebanya no guhungabanya abantu, mu gihe Dr Mukwege we avuga ko ibyo bihuha bidakwiye kwitabwaho.

Izindi wakunda

Bwiza.com
error: Ntibyemewe