bwiza.com
Ahabanza » Ruhago: Urutonde rw’amakipe 10 akize kurusha ayandi ku Isi
IBYEGERANYO Imikino

Ruhago: Urutonde rw’amakipe 10 akize kurusha ayandi ku Isi

Ikipe ya Manchester United yo mu Bwongereza, iyoboye urutonde rw’amakipe akize kurusha ayandi ku Isi muri ruhago mu mwaka wa 2018, ni urutonde rushyizwe hanze ku nshuro ya 14 n’ikinyamakuru Forbes kizwiho gukora intonde.

1.Man.Utd: Iyi kipe yo mu Bwongereza imaze imyaka 140 ishinzwe, amazina yayo yose ni ‘Manchester United Football Club’ ikaba izwi ku kazina ka ‘The Red Devils’; mu mwaka wa 1878 yashinzwe yitwa Newton Heath LYR F.C, mu 1902 ihindurirwa izina yitwa Man.Utd FC.

Iyi kipe iza ku mwanya wa mbere ku butunzi kurusha ayandi makipe y’umupira w’amaguru n’ubutunzi bwa Miliyari 4,12 z’amadolari ya Amerika, mu gihe umwaka ushize yari ifite ubutunzi bwa miliyari 3,69 z’amadorali ya Amerika.

2.Real Madrid: Iyi kipe yo muri Espagne imaze imyaka 116 iriho nka ‘Madrid Football Club’. Ni ikipe ifite sitade ‘Santiago Bernabeu’ ifite ubushobozi bwo kwakira abafana 81,044.

Iyi kipe ya Real Madrid izwiho ubuhangange muri ruhago, mu ruhando rw’isoko ry’abakinnyi ndetse no mu kibuga, kuri uru rutonde iza ku mwanya wa kabiri ku butunzi na Miliyari 4,09  z’amadolari ya Amerika.

3.FC Barcelone: ‘Futbol Club Barcelona’ iyi nayo ni ikipe yo muri Espagne, yashinzwe mu mwaka wa 1899, ubu imyaka ikaba ishize ari 118 ihatanira ibikombe mu ruhando rwa ruhago, iyi kipe ifite sitade ya ‘Camp Nou’ ifite ubushobozi bwo kwakira abantu 99,354, nayo ni igihangange ku ruhando rw’isoko ry’abakinnyi kandi ikabatangaho akayabo.

Iyi kipe ya FC Barcelona (FCB) iza ku mwanya wa Gatatu kuri uru rutonde n’ubutunzi bwa Miliyari 4,06  z’amadolari ya Amerika.

4.Bayern Munich: Ni ikipe yo mu gihugu cy’u Budage, ni ikipe yashinzwe ku wa 27 Gashyantare 1900, imyaka 118 ishize iri mu ruhando rwa ruhago, ifite sitade ‘Allianz Arena’ ifite ubushobozi bwo kwakira abantu ibihumbi 75. Kuri uru rutonde iza ku mwanya wa Kane n’ubutunzi bwa miliyoni 587,8 z’amayero.

5.Manchester City: ‘Manchester City Football Club’ nayo ni ikipe y’ubukombe mu ruhando rwa ruhago, mu mwaka wa 1880 nibwo yashinzwe yitwa St. Mark’s (West Gorton), mu mwaka wa 1894 ihabwa izina rya Manchester City, sitade yayo ‘City of Manchester’ ifite ubushobozi bwo kwakira abantu 55,097.

Kuru uru rutonde rwa 2018, iyi kipe ya Man City iza kuri uyu mwanya wa gatanu n’ubutunzi bwa miliyoni 527,7 z’Amayero.

6.Arsenal: ‘Arsenal Football Club’ Ni ikipe yo mu gihugu cy’u Bwongereza, izwi ku kazina na ‘The Gunners’, yashinzwe mu mwaka wa 1886, ikaba imaze imyaka 132 mu ruhando rwa ruhago, iyi kipe ifite sitade ‘Emirates’ ifite ubushobozi bwo kwakira abantu 59,867.

Kuru uru rutonde, iyi kipe iza ku mwanya wa Gatandatu n’ubutunzi bwa miliyoni 487,6 z’amayero.

7.Paris Saint-Germain: Ni ikipe yo mu gihugu cy’u Bufaransa ikaba ari ikipe ikiri akana ugereranyije n’igihe izi esheshatu ziyibanziriza zavukiye. Ni ikipe yashinzwe mu mwaka wa 1970, ubu ikaba imaze imyaka 48 mu ruhando rwa ruhago.

Ni ikipe ifite sitade ‘Parc des Princes’ ifite ubushobozi bwo kwakira abantu 47,929. Kuri uru rutonde iza kuri uyu mwanya n’ubutunzi bwa miliyoni 486,2 z’amayero.

8.Chelsea: ‘Chelsea Football Club’ ni ikipe yo mu Bwongereza, yashinzwe mu mwaka wa 1905, ikaba imaze imyaka 113 mu ruhando rwa ruhago, ni ikipe izwi ku kazina ka ‘The Blues’ na sitade ‘Stamford Bridge’ ifite ubushobozi bwo kwakira abantu 41,631. Kuri uru rutonde rwa 2018, iyi kipe ifite ubutunzi bwa Miliyoni 428 z’amayero.

9. Liverpool: ‘Liverpool Football Club’ yashinzwe ku wa 3 Kamena 1892, imyaka ikaba ishize ari 126 iyi kipe ihatana muri ruhago. Abantu 54,074 nibo sitade yayo ‘Anfield’ yakira, ikaba ari ikipe yaje kuri uru rutonde rwa Forbes n’ubutunzi bwa Miliyoni 424,2 z’amayero.

10.Juventus Turin:‘Juventus Football Club S.p.A’ ni ikipe yo mu gihugu cy’u Butalini. Ku wa 1 Ugushyingo 1897, nibwo yashinzwe, akazina izwiho ni ‘Juve’ sitade yayo ‘Allianz’ ifite ubushobozi bwo kwakira abantu 41,507. Iyi kipe iza kuri uru rutonde n’ubutunzi bwa miliyoni 405,7 z’amayero.

 

 

Izindi wakunda

1 Igitekerezo

Kakisa claude November 10, 2018 at 10:33 am

Ariko ibyo wanditse ubanza utabisobanuye,ariya mafaranga ni ayo zifite kuri compte cg nayo zagurwa?wibeshye rero

Subiza

Tanga Igitekerezo

Bwiza.com