bwiza.com
Iyobokamana TUBAMENYE

Byinshi wamenya kuri Rev.Natasha watwerewe Ubunyarwanda akabuhakana- AMAFOTO

Rev.Luck Natasha ni umuvugabutumwa w’umunya Kenya, akaba umukobwa ufite ubwiza buvugisha benshi by’umwihariko akaba yaragiye yitwa umunyarwanda akabihakana.

Mu kiganiro kirambuye yagiranye n’ikinyamakuru Tuko cyo muri Kenya, Natacha yavuze byinshi bitandunye birebana n’ubuzima bwe, muri byo 10 twabahitiyemo ni ibi bikurikira:

1.Rev.Natasha yavutse ryari? Uyu mukobwa asubiza iki kibazo, yatangaje itariki yo ku wa 24 Nyakanga, umwaka yirinze kuwutangaza.

2.Rev.Natasha yavukiye he? Mu gihe hari amakuru y’ibihuha yagiye avugwa ko yaba ari umunyarwandakazi, yasubije iki kibazo avuga ko ari umunya- Kenyakazi, akaba yarabyirukiye muri Huruma, amashuri yisumbuye yayigiye mu bigo by’i Nairobi, mbere y’uko akomereza kaminuza muri Afurika y’Epfo.

3.Umuryango wa Natasha: Yatangaje ko ari umwana w’imfura mu bana batatu, abakobwa babiri n’umuhungu umwe.

4.Yakuze se na nyina batabana: Rev.Natasha avuga ko se na nyina batandukanye ubwo yari akiri muto, yarezwe na nyina nawe ubu w’umupasiteri (Pastor Esther Wanjiru) akaba n’umuyobozi mu itorero rya MMC-K (Maximum Miracle Centre – Kawangware).

5.Akiri muto yavugaga adidimanga: Rev Natasha akiri muto ngo yagize ikibazo mu mivugire ye, aho ngo yadidimangaga, ibintu ngo byagoye nyina, biba ngombwa ko abanyamasengesho bamuhozaga ibiganza hejuru bamusengera, ubwo yari agize imyaka 10, ngo nibwo umuvugabutumwa yabasuye mu rugo, abaha ubuhanuzi aranamusengera atangira kuvuga atyo.

6.Hashize imyaka 8 asengewe: Mu mwaka wa 2011 nibwo Natasha yarambuweho ibiganza mu itorero ‘Redeemed Gospel Chirch’ riri i Huruma, yemezwa nk’umuvugabutumwa waryo, ari nabwo yahawe izina ry’icyubahiro rya Reverend.

7.Ubuhanga bwe mu bwanditsi: Rev. Natasha atangaza ko amaze kwandika ibitabo 12 bitandukanye. Bimwe muri byo, twavuga nka ‘Seven Keys to Success’,  Touching Heaven through Prayer , Every Problem Has Expiry Date, Characteristics of God’s Leading Lady,…

8.Rev Natasha ni ingaragu: Iki kinyamakuru gitangaza ko iyi nkuru yo kuba Natasha ari ingaragu ari nziza ku mbaga y’abagabo bamukunda batamuzi kubera ubwiza bwe, ariko ngo mbere ya byose ni uko uwifuza kumugira inshuti yazavamo umugore yabanza kumenya ibiranga umugabo yifuza.

Avuga ko atifuza umugabo w’imyitwarire nk’iya Salome uvugwa muri Bibiliya, uzwiho kuba yaragiraga abagore benshi ariko akaba umuhanga; ati “Imyitwarire y’umugabo uzirinda kubana na we ni nk’iya Salomo, umugabo muzaryamana, ejo akifuza kuryamana na murumuna wawe, ejobundi n’umuturanyi, nyogokuru,…Mbese atagira umupaka, uwo uzamwirinde”.

Indi myitwarire atifuza ku mugabo yumva yazashaka, ni uwo badahuza ukwemera, ati “ni byiza gutegereza igihe kirekire kurusha kurongorwa nabi, ahubwo ukaba warongorwa n’umugabo w’ukuri”.

9.Natasha agenda mu modoka ihenze: Imodoka uyu muvugabutumwa agendamo, ni iyo mu bwoko bwa Benz, aho ngo ifite agaciro ka miliyoni zibarirwa mu 10 z’amashilingi ya Kenya, ahagenewe nimero za pulaki, hariho Oracle.

10.Uyu mukobwa w’icyamamare ntiyemera ko agira abarinzi: Abibajijweho yagize ati “Njyewe si njya menya impamvu abantu bavuga ko mfite abarinzi (Bodyguards) abasore n’abakobwa mubona ni abo duhuje umurimo w’Imana baba bari muri polotokole.

Mu bindi avuga akunda, harimo guteka, akunda kurya capati,… yize iby’itangazamakuru n’itumanaho, akaba anafite impamyabumenyi mu bya Tewolojiya.

Izindi wakunda

Bwiza.com