bwiza.com
Ahabanza » APR FC yasabye ko imikino yayo yakwigizwa inyuma
Amakuru Imikino

APR FC yasabye ko imikino yayo yakwigizwa inyuma

Umukino wari uteganyijwe kuzahuza APR FC na Rayon Sports ku itariki 23 Ugushyingo 2018 mu Gikombe cyo kurwanya ruswa wimuriwe ku itariki itaramenyekana nyuma y’ubusabe bwa APR FC.

Igikombe ngaruka mwaka  kitiriwe kurwanya ruswa gihuza amwe mu makipe meza y’imbere mu gihugu  gitegurwa kigaterwa inkunga n’Urwego rw’Umuvunyi.

APR FC na Rayon Sports ni umukino ukurikirwa cyane mu Rwanda kurusha iyindi yose ukaba ari nawo mukino ukomeye aho uhuza ikipe y’ingabo z’igihugu n’ikipe ya rubanda nyamwinshi. Uyu ni umukino w’amakipe y’amakeba hano mu Rwanda.

Amakuru agera kuri bwiza.com ni uko APR FC yasabye ko uwo mukino wimurwa kubera impamvu zo kwitegura undi mukino wa CAF Champions League izahatanamo n’ikipe ikomeye yitwa Club Africain yo muri Tunisia.

Mu mukino aya makipe aheruka gukina, Rayon Sports yatsinze APR FC ifite abakinnyi 10 nyuma yuko myugariro wayo Rugwiro Herve  ahawe ikarita itukura nyuma y’ikosa yakoreye umukinnyi ukina hagati muri Rayon Sports , Niyonzima Sefu bakunda kwita Busquets  ku mukino wa nyuma w’igikombe cy’Agaciro

APR FC yifuza ko itariki y’uyu mukino w’igikombe cyo kurwanya ruswa wakwigizwa inyuma, kubera ko hari impungenge ko yashoboraga gutakaza  abakinnyi bayo b’inkingi ya mwamba muri uwo mukino yagombaga guhuriramo na Rayon Sports itarakina umukino wa CAF Champions League.

APR FC yari kuzakina na Rayon Sports ku itariki 23 Ugushyingo 2018, ikongera igakina na Club Africain muri Champions league nyuma y’iminsi ine gusa.  Kugeza ubu Ferwafa n’Urwego rw’Umuvunyi ntibaratangaza igihe uyu mukino uzabera.

Biravugwa ko imwe mu mikino ya Shampiyona y’u Rwanda nk’umukino wa Shampiyona iyo kipe yari kuzakina n’ikipe ya Mukura tariki 1 Ukuboza 2018, ushobora gusubikwa mu rwego rwo gutegura neza umukino mpuzamahanga wo kwishyura APR FC izahuriramo na Club Africain.

Umukino ubanza muri CAF Champions League uzabera kuri Stade ya Kigali Nyamirambo ku itariki 27 Ugushyingo 2018. Naho uwo kwishyura ubere kuri Stade Olympique de Radès yo mu Mujyi wa Tunis ku itariki 4 Ukuboza 2018.

Izindi wakunda

Bwiza.com