bwiza.com
Amakuru Umutekano

Rusizi: Uwamugaye amaguru yafatanwe urumogi

Baranyika Jean Claude w’imyaka 56 y’amavuko, utuye mu mudugudu wa Kanunga, akagari ka Gahinga mu murenge wa Mururu, mu karere ka Rusizi, usanzwe afite ubumuga bw’amaguru yombi yafatanywe ibiti bitanu by’urumogi aho yaruhinze munsi y’urugo rwe.

Ushinzwe iterambere ry’imibereho myiza y’abaturage mu kagari ka Gahinga Muhawenimana Eugène, yavuze ko uyu mugabo wamugaye amaguru yombi, yafatanywe iki kiyobyabwenge mu murima we ku bufatanye n’abaturage.

Yagize ati ’’ Si ubwa mbere arufatanwa kuko hari n’ikindi gihe yafatanwe urwumye mu mufuka w’ipantalo  akavuga ko ari abanye Congo barumurangiye nk’umuti, icyo gihe abifungirwa amezi atatu,  none afatanywe uruhinze mu murima.’’

Abaturage bavuga ko aka gace gahana imbibI n’igihugu cya Congo/ Kinshasa gakunze kugaragaramo ibiyobyabwenge cyane cyane urumogi, hakaba n’ubucuruzi bwa magendu benshi bemeza ko budashobora gucika burundu.

Umunyamabanga Nshingwabikorwa w’umurenge wa Mururu,  Ingabire Joyeux, aganira na Bwiza.com, yavuze ko atari uyu wenyine ufatanywe urumogi kuko muri Cyete mu kagari ka Kagarama, muri uyu murenge baherutse  gufatana undi musaza udupfunyika 1500 twarwo n’ibiro 7 bidapfunyitse, avuga ko hari hashize igihe n’abahungu be barufatanywe.

Ati “kuba duturanye n’igihugu kitarufata nk’uruteye ikibazo kandi twe rutemewe, bituma bamwe barufata nk’uko abaho  barufata bakumva ari nk’ibisanzwe ariko tugira inama abaturage yo kurureka, cyane cyane ko n’ibihano ku muntu urufatanywe arunywa, arucuruza cyangwa aruhinga byiyongereye cyane.’’

Avuga ko bibabaje kubona abantu bakuru  ari bo bishora mu bikorwa nk’ibyo bishobora kugira ingaruka ku buzima bwabo no ku bw’imiryango yabo, agasaba buri wese kuba ijisho rya mugenzi we.

Ubuyobozi bw’uyu murenge kandi buvuga ko mu zindi ngamba zafashwe zo guhangana n’iki kibazo harimo itegurwa ry’imikino izajya ihuza urubyiruko, mbere yayo rukaganirizwa ku bibi by’ibiyobyabwenge, amakalabu yo kubirwanya mu midugudu no mu mashuri na yo agashyirwa mo imbaraga,…

Uru rwafashwe rwahise rurandurwa rushyikirizwa inzego z’umutekano.

Aha ni ho uyu Baranyika Jean Claude yahingaga uru rumogi

Izindi wakunda

Bwiza.com
error: Alert: Ntabwo byemewe!!