bwiza.com
Amakuru Umutekano

Muhanga: Abanyamaguru bavuga ko uburenganzira bwabo buhutazwa n’abakoresha umuhanda

Bamwe mu bagenda n’amaguru mu mujyi wa Muhanga, mu ntara y’Amajyepfo, barinubira kubangamirwa n’abatwara ibinyabiziga batubahiriza amategeko agenga inzira z’abanyamaguru kuko usanga abenshi batajya bahagarara ngo babareke bambuke.

Aba banyamaguru  batangaza ko kutubahiriza amategeko agenga inzira zabagenewe zizwi nka “Zebra Crossing” ngo bituma barushaho kugira impungenge zo kuhambukira kuko batinya kuhagongerwa kandi nyamara byitwa ko ariho bagenewe kwambukira. Bakaba basaba inzego bireba guhagurukira icyo kibazo kugira ngo abatwara ibinyabiziga barusheho kubahiriza amategeko y’umuhanda.

Uwamahoro Anita, ni umugore w’imyaka 42, atuye mu kagali ka Gahogo, umurenge wa Nyamabuye. Avuga ko agorwa cyane no kwambuka umuhanda imbere y’ahakorera radiyo Huguka ajya mu isoko rya Muhanga. Ati “abatwara ibinyabiziga bajya bubahiriza inzira z’abagenzi ngo babareke bambuke ku buryo hari n’abahagongerwa. Iyo abona ugiye kwambuka ntibahagarara ngo wambuke, ahubwo bavuza amahoni menshi umuntu akaba yata n’umutwe.”

Uwamungu Yohani we avuga ko abatwara moto aribo bakunze kutubahiriza inzira zagenewe abagenzi. Aragira ati “icyo nabonye ni uko wagira ngo abamotari nta feri bagira ku buryo ashobora kuba yanahakugongera”.

Aba baturage bavuga kandi ko hari igihe bibasaba guhagarara umwanya munini bategereje ko babona uko bambuka umuhanda, ibyo bigatuma hari abakererwa ibyo bari bagiyemo. Uwimana Didasi, utuye mu kagali ka Ruli, umurenge wa Shyogwe, abisobanura muri aya magambo ati  “[…] kuko niba tugeze hariya tugahagarara isaha yose umuntu arakererwa mu mirimo yari agiyemo, mubatubwirire babe inyangamugayo natwe abagenzi baduhe uburenganzira”.

Bamwe muri aba baturage kandi basanga polisi idakunze kwita kuri iki kibazo bagasaba ko cyahagurukirwa. Sebatware Noheli wo mu kagali ka Gitarama umurenge wa Nyamabuye aragira ati “Polisi ikwiye guhana abantu batareka ngo abanyamaguru batambuke. Abapolisi ni benshi hafi y’imihanda, babibona byoroshye, ariko kugeza ubu barabyirengagiza. Nyamara waba udafite ceinture de securite, ntubacika.”

Abashoferi na bo bemera ko  abanyamaguru batitabwaho

Ibyo abanyamaguru bavuga babihurizaho na bamwe mu bashoferi  bavuga ko akenshi banga guhagarara kubera ko baba basiganwa n’igihe.

Nsengiyumva Yohani utwara abagenzi kuri moto we atanga impamvu ye yihariye yo kurwana ku mutekano we ati “turabinjirana kabisa kubera ko feri yacu iyo uyikozeho uhita ugwa ku buryo utayikoraho bigutunguye kuko hari igihe uhagera umuntu agahita yiyahuramo ukagira ngo nawe ntabwo yari azi ko ibinyabiziga biri buze”.

Akomeza avuga ko nubwo babikora, baba batayobewe ko ari amakosa kandi ahanwa n’amategeko.

Muri iki cyumweru cya polisi cyahariwe umutekano wo mu muhanda, Polisi y’igihugu, ishami rishinzwe umutekano wo mu muhanda ikomeje gusaba abakoresha umuhanda kurushaho kumenya no kubahiriza amategeko kuko nta mpamvu n’imwe ishobora gutuma umuntu atayubahiriza.

T.Kaberuka

Izindi wakunda

Bwiza.com
error: Alert: Ntabwo byemewe!!