bwiza.com
Amakuru Umutekano

Rubavu: Umugore wararanaga icyuma arashinjwa gukata igitsina cy’umugabo we

Umugore ushinjwa gukeba igitsina cy’umugabo we, ari mu maboko rw’urwego Rushinzwe Ubugenzacyaha, RIB. Umuyobozi w’umudugudu akavuga ko bari bafitanye amakimbirane ndetse ko yararanaga icyuma.

Uyu mugore yafashwe na RIB ku wa Kabiri tariki ya 27 Ugushyingo 2018, aho batuye mu Kagari ka Burushya mu Murenge wa Nyamyumba, Akarere ka Rubavu, ndetse abaturanyi be bakemeza ko atari ubwa mbere yari agerageje gutera umugabo we icyuma.

Umunyamabanga Nshingwabikorwa w’Akagari ka Burushya, Uwimana Eustache aremeza aya makuru akavuga ko n’ubusanzwe uyu muryango wari usanzwe urimo amakimbirane.

Ati “Bari basanzwe bafitanye amakimbirane ku buryo uyu mugore yararanaga icyuma, hari n’ubwo bamufunze aza kurekurwa”.

Akomeza avuga ko ubwo umugabo yari arimo kwambara, umugore yamucunze amukata igitsina, ati “bari baraye bashwanye ni uko umugabo arimo kwambara umugore ahita aza afata igitsina cy’umugabo arakata ariko kubw’amahirwe nticyavaho”.

Mu gihe uyu mugore afungiye kuri sitasiyo y’ubugenzacyaha ya Gisenyi, umugabo wakaswe igitsina nticyatana arimo kuvurirwa ku bitaro bya Gisenyi.

 

Izindi wakunda

Bwiza.com
error: Alert: Ntabwo byemewe!!