bwiza.com
Amakuru Imikino

Modric yihanganishije abo Ronaldo na Messi bagiye babuza amahirwe

Umukinnyi wo hagati wa Real Madrid na Croatia, Luka Modric nyuma yo gutsindira igihembo cy’umukinnyi wahize abandi mu mupira w’amaguru ku isi (Ballon d’Or) yatangaje ko agituye abandi bakinnyi bashobora kuba barayitsindiye ariko bakarushwa amahirwe na Ronado cyangwa se Messi, bamaze imyaka 10 barakikubiye.

Modric w’imyaka 33 y’amavuko yahawe iki gihembo ku mugoroba wo ku wa Mbere tariki 3 Ukuboza 2018. Aganira na BBC Sport, yatuye iyi Ballon d’Or abandi bakinnyi bose batayitsindiye mu gihe cy’imyaka 10 ishize yihariwe na Messi na Cristiano.

Yagize ati “Wenda mu bihe byashize hari abakinnyi bamwe bashoboraga kuba baratsindiye Ballon d’Or nka Xavi, Andres Iniesta cyangwa [Wesley] Sneijder, ariko ubu abantu noneho kera kabaye bari kubona undi muntu”.

Yakomeje agira ati “Iki gihembo ngituye abakinnyi bose bishoboka ko bari bakwiye kugitsindira ariko ntibagitsindire. Kuri jye, uyu wabaye umwaka mu by’ukuri udasanzwe. Biragoye ko navuga mu magambo uko numva merewe mu mutima wanjye. Ni ikintu kidasanzwe kuri jye,… “.

Modric yavuze ko Cristiano na Messi ari “abakinnyi badasanzwe”, yongeraho ati: “Kuba ngitsindiye, bivuze ko mu kibuga nakoze ikintu rwose kidasanzwe muri uyu mwaka, ni yo mpamvu umwaka [w’imikino] wa 2017-2018 wabaye umwaka wanjye”.

Modric yari umwe mu bakinnyi umunani ba Real Madrid bari bari ku rutonde rugufi rw’abakinnyi 30 batoranywagamo utsindira Ballon d’Or y’uyu mwaka.

Mu mwaka wa 2007, umukinnyi Kaka wahoze akinira AC Milan n’ikipe y’igihugu ya Brezili yabaye umukinnyi wa nyuma wari waratsindiye iki gihembo mbere yuko Messi na Cristiano batangira kugenda bagisimburanaho.

Ada Hegerberg w’imyaka 23 y’amavuko akaba rutahizamu wa Lyon n’ikipe y’igihugu ya Norvège, ni we watsindiye igihembo cya mbere cya Ballon d’Or mu bagore.

Mbappe w’imyaka 19 y’amavuko, we yabaye uwa mbere utsindiye igihembo cya Kopa Trophy, gihabwa umukinnyi wahize abandi mu bari munsi y’imyaka 21 y’amavuko kandi agatoranywa n’abigeze gutsindira igihembo cya Ballon d’Or.

Luka Modric wegukanye Ballon d’Or

Izindi wakunda

Bwiza.com