bwiza.com
Amakuru Politiki

Kicukiro: Yafatanywe Amanyarwanda, Amashilingi n’Amadolari yose y’amiganano

Polisi ikorera  mu karere ka Kicukiro ku makuru yahawe n’abaturage yafashe umugabo ukekwaho gukora amafaranga y’amahimbano y’ibihugu bitandukanye agizwe n’amanyarwanda, amadorari y’Amerika ndetse n’amashilingi ya Uganda.

Munyehirwe Eliezel w’imyaka 29 y’amavuko utuye mu murenge wa Gahanga akagari ka Gahanga yafashwe mu masaha ya saa 02:30 z’ijoro rishyira kuri uyu wa kabiri tariki ya 4 Ugushyingo, ubwo Polisi yahabwaga amakuru ko akora amafaranga y’amiganano ndetse ngo akaba ashobora no kuba ayakwirakwiza mu baturage.

Umuvugizi wa polisi mu mujyi wa Kigali Chief Inspector of Police (CIP) Emmanuel Kayigi yavuze ko hari amafaranga y’amahimbano bafatiye mu rugo rwa Munyehirwe n’ibindi bikoresho yifashisha ayakora.

Yagize ati “Tukimara kubwirwa amakuru twagiye kumusaka, tumusangana amashilingi ya Uganda 220.000, amafaranga y’u Rwanda ibihumbi 10 n’amadorari y’Amerika 100 yose y’amiganano.”

Amafaranya y’amahimbano uyu mugabo yafatanwe yari agizwe n’inoti esheshatu (6) z’ibihumbi 20 n’ebyiri (2) z’ibihumbi 50 zose z’amashilingi ya Uganda, inoti imwe y’ijana (100$) y’amadorari y’Amerika ndetse n’inoti ebyiri za 5000 y’amanyarwanda.

CIP Kayigi yavuze ko hari n’ibindi bahasanze Munyehirwe yifashisha yigana inoti z’ibihugu bitandukanye.

Ati “Mu bindi, twanahasanze amarangi yifashisha ahindura ibara ry’amafaranga ashaka kwigana. Imashini yifashisha yo twasanze ngo hari imodoko yari imaze kuyitwara, ubu nayo turacyayishakisha ngo turebe ko yafatwa.”

Yasabye abaturage gushishoza bakamenya gutandukanya amafaranga yemewe n’amategeko n’ay’amiganano kandi aho bagize urujijo bagatanga amakuru ku nzego zishinzwe umutekano kuko gukwirakwiza amafaranga y’amiganano bigira ingaruka nyinshi.

Ati “Abaturage bakwiye kurangwa n’ubushishozi ku buryo gutandukanya amafaranga y’umwimerere n’ay’amiganano biborohera kandi aho bagize amakenga bakitabaza izindi nzego kuko gukwirakwiza amafaranga y’amahimbano bisubiza inyuma ubukungu bw’igihugu, ifaranga ry’umwimerere rigata agaciro  karyo.”

CIP Kayigi yibutsa buri wese kugira uruhare mu kubungabunga umutekano w’ifaranga ry’igihugu aririnda gutakaza agaciro biturutse ku ikwirakwira ry’amafaranga y’amahimbano, agasaba abaturage kurushaho gutanga amakuru ku bigana amafaranga.

Ingingo ya 269 mu gitabo cy’amategeko ahana ibyaha mu Rwanda iteganya ko umuntu wese, ku bw’uburiganya wigana, uhindura amafaranga y’ibiceri cyangwa inoti akoreshwa mu Rwanda cyangwa mu mahanga, ibyakwitiranywa nayo, impapuro zifite agaciro k’amafaranga y’igihugu zashyizweho umukono n’inzego zibifitiye ububasha, ziriho tembure yayo cyangwa ikirango cyayo, cyangwa izindi mpapuro zikoreshwa mu Rwanda cyangwa mu mahanga, uzana cyangwa ukwiza mu Rwanda izo mpapuro n’izo noti azi ko ziganywe cyangwa ko zahinduwe, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi(7).

 

Izindi wakunda

1 Igitekerezo

Jibsoson December 6, 2018 at 7:49 am

Turashimira abaturage batanze amakuru kugirango hafatwe uyu muntu ukora amafaranga yamahimbano tunasaba abaturage kujya bashishoza mbere yokwakira amafaranga kuko amafaranga yamahimbano atuma ifaranga ry’igihugu ritakaza ubusugire bwaryo.

Subiza

Tanga Igitekerezo

Bwiza.com