bwiza.com
Ahabanza » Rusizi: Ubutaka buto buracyabereye imbogamizi abahinzi b’icyayi
Amakuru Ubukungu

Rusizi: Ubutaka buto buracyabereye imbogamizi abahinzi b’icyayi

?

Abahinzi b’icyayi bibumbiye mu ihuriro ry’amakoperative ane y’abahinzi b’icyayi mu turere twa Rusizi na Nyamasheke, bavuga ko bakomeje kubangamirwa n’ubutaka bagihingaho bubabana buto.

Bamwe muri aba bahinzi bari mu makoperative ya COOPTHE Mwaga-Gisakura na COOPTHEVIGI yo muri Nyamasheke, COOPTHE Shagasha na The villageois UMACYAGI yo muri Rusizi, bibumbiye mu ihuriro ry’amakoperative y’abahinzi b’icyayi (UCOTHEI), bavuga ko mbere batitaga kuri ubu buhinzi kuko bwabavuniraga ubusa ntibabubyaze inyungu ishimishije, ariyo mpamvu bakiranduraga bagatera amashyamba cyangwa indi myaka, ariko ubu bitewe n’agaciro gifite, bumva ngo bahinga cyinshi.

Nambajimana Samson ugihinga  mu kagari ka Nyarusange mu murenge wa Bushekeri  muri Nyamasheke, yagize ati ’’ turasaba ko hashakwa uburyo twakongererwa ubuso duhingaho icyayi, hashakwa uburyo nk’ubutaka babona bwakweraho icyayi hahingwaho ibidatanga umusaruro uhagije ubuyobozi bukabuduhesha,…”.

Umuyobozi w’iri huriro, Nduwayezu Marie, yemeranywa n’aba bahinzi ayoboye,  ngo ibindi bibazo bagiraga muri ubu buhinzi Leta yagiye ibikemura ku buryo ngo bari bageze aheza, ariko ihindagurika ry’igiciro cyacyo ku isoko mpuzamahanga, kubura ingemwe zihagije n’ubutaka buto gihingwaho bakurikije icyo bifuza biracyababera imbogamizi.

Yagize ati’’ imwe mu mbogamizi zikomeye dufite ni ubutaka buto bwo guhingaho icyayi kandi twifuza ko ubwinshi bwacyo bwaziba icyuho nk’igihe igiciro cyagabanutse. Habayeho nko kureba amasambu atabyazwa umusaruro ukwiye, yaba aya Leta cyangwa  andi, tukayahabwa tukayabyaza uwo musaruro byakungura uturere twacu n’igihugu muri rusange”.

Umuyobozi w’akarere, Kayumba Ephrem avuga ko abahinzi batarabagezaho iki kibazo, akabizeza ko bazabyigaho hakarebwa ahari ubutaka gishobora kweraho, bakaba babuhabwa mu buryo bakumvikanaho.

Iri huriro rivuga ko kugeza ubu rifite abanyamuryango 6485 bagihinga kuri Hegitari 2232 bakifuza ko nibura mu myaka itatu baba bongeyeho Hegitari 400 kugira ngo babashe kugera ku musaruro bifuza.

Izindi wakunda

Bwiza.com
error: Alert: Ntabwo byemewe!!