bwiza.com
Amakuru mu Rwanda

Rwamagana: Ababyeyi barasabwa kugaragaza abana bafite ubumuga aho kubahisha mu nzu

Ibirori byo kwizihiza umunsi mpuzamahanga wahariwe abafite ubumuga mu Karere ka Rwamagana wabereye mu Kagari ka Nsinda mu Murenge wa Muhazi  ku wa 03 Ukuboza 2018, aho mu butumwa bwahatangiwe ubuyobozi bw’Akarere ka Rwamagana bwasabye ababyeyi kugaragaragaza abana bafite ubumuga aho kubahisha kugirango ubuyobozi bubashe gufasha abakeneye gufashwa.

Abafite ubumuga bavuga ko iyo umuntu ufite ubumuga yitaweho agafashwa nawe ashobora kwiteza imbere ariko ko hari ababyeyi bagihisha abana aho kubagaragaza kugirango nabo bafashwe

Kagarama Farancois atuye mu Murenge wa Gahengeri arasaba ko ababyeyi bafite abana bafite ubumuga kujya bagaragaza abo bana aho kubahisha mu nzu.

Yagize ati: “Bamwe mu babyeyi bagomba kumenya ko umwana ufite ubumuga iyo yitaweho agafashwa nawe yabagirira akamaro ntaba agomba kumuhisha mu nzu kuko kumuhisha mu nzu n’ukumubuza uburenganzira bwo kubaho neza nk’abandi kuko umuntu ufite ubumuga iyo afashijwe yatera imbere kandi agateza imbere umuryango we.”

Ndanguza Jean Bosco umuhuzabikorwa w’Inama y’Igihugu y’abafite Ubumuga mu Karere ka Rwamagana yasabye ababyeyi kudahisha abana bafite ubumuga kuko bituma badafashwa.

Yagize ati: “Hari intambwe twateye mu rwego rwo guha ubushobozi abafite ubumuga kugirango batere imbere kandi ubuvugizi bwose dukomeje kubukora kugirango bafashwe, hari imiryango y’abantu bahejeje abana inyuma ,nk’umuntu wanga kugaragaza umwana ngo yige nk’abandi birasaba rero ubukanguramba nk’abanyamakuru mudufashe mutubwirire abaturage bareke guhisha abana bafite ubumuga kuko nabo bagira ubushobozi nk’ababyeyi bafite abo bana nibabazane turebe ibibazo bafite aho kubahisha mu ngo zabo.”

Ubuyobozi bw’Akerere ka Rwamagana buranenga ababyeyi bagihisha abana bafite ubumuga aho kubagaragaza ngo bafashwe.

Umuyobozi w’akarere wungirije ushinzwe imibereho myiza, Mutoni Jeanne, yabwiye ababyeyi ko abana bafite ubumuga bagomba kwitabwaho ariko ko baterwa impungenge n’ababyeyi bahisha abana ntibabagaragaze ngo bafashwe nk’abandi.

Yagize ati: “Mu Karere ka Rwamagana tuzakomeza kwegera no gufasha abantu bafite ubumuga ,by’umwihariko mu karere kacu tuzaha ubushobozi abafite ubumuga kuko dufite abafatanyabikorwa benshi ariko hari byinshi byakozwe ariko kandi hari ibindi bibazo tugifite haracyari ababyeyi batagaragaza abana bafite ubumuga nagirango nsabe ababyeyi kugaragaza abo bana kugirango tubashe kubafasha nk’ubuyobozi kuko abana bafite ubumuga ntawugomba kubaheza.”

Abafite ubumuga mu karere ka Rwamagana babaruwe ni 3967.

Umunsi mpuzamahanga wahariwe abafite ubumuga watangiye kwizihizwa mu mwaka w’ 1992 ku rwego rw’Isi.

Ababyeyi basabwa kwirinda guhisha abana babo bafite ubumuga

Justin Ngabonziza/ Bwiza.com

Izindi wakunda

Bwiza.com