bwiza.com
Ahabanza » Beni: Umukandida Fayulu yijeje kuhimurira ikigo cya gisirikare cya mbere kinini muri Congo
Amakuru Politiki

Beni: Umukandida Fayulu yijeje kuhimurira ikigo cya gisirikare cya mbere kinini muri Congo

Umukandida Martin Fayulu mu matora y’umukuru w’igihugu ateganyijwe muri uku kwezi muri Repubulika iharanira Demokarasi ya Congo, kuri uyu wa Gatatu, itariki 05 Ukuboza yerekeje I Beni mu gikorwa cyo kwiyamamaza cyaje gikerereweho gato kubera ingorane yagize zo kubona uburenganzira bwo gukoresha indege ye bwite. Yijeje abaturage ba Beni kwimurira aha ikigo cya mbere kinini cya gisirikare kiri I Kinshasa mu rwego rwo kugarura amahoro muri iki gice gikomeje kwibasirwa n’imitwe yitwaje ibirwanisho n’icyorezo cya Ebola.

Indege yari itwaye uyu mukandida w’ihuriro Lamuka yageze I Beni muri Kivu y’Amajyaruguru mu masaha ya nyuma ya saa sita, ariko ntibyamubuza gukoresha mitingi imbere y’imbaga ibihumbi byari byagiye kumva imigabo n’imigambi ye.

RFI dukesha iyi nkuru ivuga ko abaturage bari bategerezanyije uyu mukandida igishyika ku buryo baninjiye mu kibuga cy’indege bagakikiza indege yaziyemo.

Nubwo yageze aho yagombaga kuganirira n’abaturage amasaha akuze, Martin Fayulu ntibyamubujije kuvugana n’abamushyigikiye bari bateraniye kuri rond-point y’uwa 30 Kamena. Yasubiyemo amasezerano ye nyamukuru mu kwiyamamaza, avuga ko azimura ikigo kinini cya gisirikare cya Congo kiri Kinshasa akakijyana I Beni, ndetse akahashinga etat-major y’ingabo mu rwego rwo kuhagarura umutekano. Ibi bikaba byatumye abaturage bamuha amashyi y’urufaya.

Yasezeranyije kandi ko ubucukuzi bw’umutungo kamere nka Coltan by’umwihariko abaturage bagomba kubyungukiramo ndetse no kugeza mu rukiko abakoze ibyaha bikabije muri Congo.

Martin Fayulu wiyita “Umusirikare w’Abaturage‘ akaba yaboneyeho gusaba imbaga yari iteraniye aha gushyigikira igitekerezo cye cyo kwanga kuzatora hifashishijwe imashini, bagasaba ko bazakoresha impapuro mu biro by’itora kuwa 23 Ukuboza.

Yasoje asaba abaturage kutazatuma umukandida mugenzi we, Emmanuel Shadary,  wo ku ruhande rushyigikiye ubutegetsi, yiba amajwi.

 

Izindi wakunda

Bwiza.com
error: Alert: Ntabwo byemewe!!