bwiza.com
Ahabanza » Buri mwana w’Umunyarwanda akwiriye kubona ubushobozi bwo kwiga- Mme J. Kagame
Amakuru mashya Featured Mu mashuli

Buri mwana w’Umunyarwanda akwiriye kubona ubushobozi bwo kwiga- Mme J. Kagame

Madamu Jeannette Kagame avuga ko buri mwana w’Umunyarwanda akwiriye kubona ubushobozi bwo kwiga ibyiciro byose by’amashuri, by’umwihariko agashima abasoje umwaka bafite amanota meza, ari nako asaba abatahanye amake kwikubita agashyi.

Yabitangaje ku wa Gatatu tariki ya 5 Ukuboza 2018, mu muhango wo gusoza ingando z’abanyeshuri baturuka mu miryango itishoboye bishyurirwa n’umuryango ‘Imbuto Foundation’ abereye umuyobozi mukuru. Aya mahugurwa akaba yaberaga mu Rwunge rw’Amashuri rwa Mater Dei,  ruherereye mu Karere ka Nyanza, Intara y’Amajyepfo.

Madamu Jeannette Kagame avuga ko Guverinoma y’u Rwanda yashyizeho umurongo mugari, ku buryo ngo nta mwana w’umunyarwanda ugomba kubuzwa amahirwe yo kwiga.

Ati “Ubuyobozi bw’Igihugu cyacu bwadushyiriyeho umurongo mugari. Buri mwana w’Umunyarwanda akwiriye kubona ubushobozi bwo kwiga, agasoza ibyiciro byose nk’uko byagenwe”.

Yakomeje ashimira abiga mu mashuri yisumbuye birengagiza ibyabaca intege, ahubwo bakarushaho kwigana umuhate bagatsinda.

Ati “Ndashima abitwaye neza ku ishuri bagakomeza kubona amanota meza. Impamvu mbashimira si uko mwabonye amanota meza gusa, ahubwo ni uko mwirengagije ibyabaca intege byose, mugakorana umwete, mugakomeza kuba Imbuto zitoshye koko”.

Abatahanye amanota make nabo yabasabye kureba mu nguni zose bagashaka umuti, ati “abataragize amanota meza namwe, aho mutitwaye neza, mufate umwanya wo kubitekerezaho no kubishakira umuti. Mugire umuco wo kwemera ko hari aho mufite intege nke, ntibibatere ipfunwe. Mubaze ibyo mutazi, haba kuri bagenzi banyu, ababyeyi cyangwa abarimu, nibyo bizabafasha kwiga byinshi vuba kandi mugatsinda neza”.

Nyuma y’uko Perezida wa Repubulika, Paul Kagame atangarije ko amavuta ahindura uruhu ari mabi ku buzima bwa muntu, ndetse akanasaba Polisi na Minisiteri y’Ubuzima kuyaca mu Rwanda, Mme Jeannette Kagame na we yasabye aba banyeshuri kuyirinda.

Ati “Ikindi nifuza kubibutsa ni uko muri beza bihagije, ntimukwiye kwangiza uruhu rwanyu, mukoresheje amavuta atukuza uruhu n’ibindi byose biruhindura. Mubyirinde”.

Yakomeje abasaba gutanga umusanzu mu rugo iwabo, bita ku isuku; ko ari umusanzu ukomeye bazaba bahaye igihugu cyabo. Yaboneyeho kandi no kubaha umukoro agira ati “Ndifuza kandi kubaha umukoro wo gukomeza gutekereza, ku mubare w’abangavu n’ingimbi baterwa cyangwa batera inda, turebe icyo twakora ngo habeho impinduka”.

Aba banyeshuri yabasabye gutangira gutekereza ku mishanga ibyara inyungu, abifuriza kuzagira ibiruhuko byiza by’umwihariko n’Umwaka Mushya Muhire wa 2019.

Aba banyeshuri basoje aya mahugurwa bafashwa na ‘Imbuto Foundation, ni 681 bakomoka mu miryango itishoboye. Izi ngando zasojwe zari zimaze iminsi itatu.

Mme J.Kagame yahaye umukoro aba banyeshuri wo kuzita ku isuku iwabo mu miryango

Izindi wakunda

Bwiza.com
error: Alert: Ntabwo byemewe!!