bwiza.com
Amakuru Imikino

Umutoza wa FC Barcelona yababajwe n’umwanya Messi yajeho mu bahataniraga Ballon d’Or

Umutoza Ernesto Valverde w’ikipe ya Barcelona yavuze ko “bitumvikana” ukuntu Lionel Messi yaje ku mwanya wa gatanu ku rutonde rw’uko abakinnyi 10 bahataniraga igihembo cya Ballon d’Or cy’uyu mwaka wa 2018 bakurikiranye.

Iki gihembo gitangwa n’ikinyamakuru France Football cyo mu Bufaransa ucyegukanye agatoranywa n’abanyamakuru 180, cyegukanywe uyu mwaka na Luka Modric, umukinnyi ukina ku mwanya wo hagati mu kibuga mu ikipe ya Real Madrid no mu ikipe y’igihugu ya Croatia.

Messi, rutahizamu wa Barcelona n’uw’ikipe y’igihugu ya Argentine w’imyaka 31 y’amavuko, ntabwo yashoboye kuza mu myanya itatu ya mbere mu bahataniraga icyo gihembo uyu mwaka, ibintu byari bimubayeho bwa mbere guhera mu mwaka wa 2006.

Iki gihembo amaze kugitsindira inshuro eshanu. Umutoza Valverde yagize ati “Turashimira Modric ku kuba yaratsindiye Ballon d’Or, ariko kuba Messi yaraje ku mwanya wa gatanu ntibyumvikana”.

Yongeyeho ati “Sindibujye mu gusobanura ibidahwitse kuri iki gihembo”.

Mu mwaka ushize w’imikino, Messi yaciye agahigo ko gutsindira igihembo cy’urukweto rwa zahabu ku nshuro ya gatanu, nyuma yo gusoza uwo mwaka ari we uri ku mwanya wa mbere mu gutsinda ibitego byinshi kurusha abandi ku mugabane w’Uburayi.

Yatsinze igiteranyo cy’ibitego 34 ubwo Barcelona yatsindiraga igikombe cya shampiyona ya La Liga yo muri Espanye ndetse n’igikombe cy’umwami cya Copa del Rey.

Amanota 280 Messi yabonye mu matora ya Ballon d’Or uyu mwaka, yatumye aza inyuma ya Modric wayegukanye n’amanota 753, rutahizamu Cristiano Ronaldo wa Juventus n’amanota 476, rutahizamu Antoine Griezmann wa Atletico Madrid n’amanota 414 na rutahizamu Kylian Mbappe wa Paris St-Germain n’amanota 347.

 

 

Izindi wakunda

Bwiza.com