bwiza.com
Ahabanza » RDC: Col Mambweni yatawe muri yombi akekwaho uruhare mu iyicwa ry’impuguke 2 za Loni
Amakuru Politiki

RDC: Col Mambweni yatawe muri yombi akekwaho uruhare mu iyicwa ry’impuguke 2 za Loni

Colonel Jean De Dieu Mambweni wo mu gisirikare cya Congo (FARDC) yatawe muri yombi mu rwego rw’iperereza akekwaho uruhare mu iyicwa ry’impuguke za Loni 2 muri Gicurasi 2017 ziciwe muri iki gihugu ziri mu iperereza ku bwicanyi bwo muri Kasai.

Itabwa muri yombi rya Col Mambweni utari warigeze ahangayikishwa n’Urukiko rwa gisirikare rije nyuma y’icyegeranyo kiswe Congo Files kigizwe n’amapaji ibihumbi kuri ubu bwicanyi bwakorewe Umunyamerika, Micheal Sharp n’Umunyasuedekazi, Zaida Catalan.

Amakuru yasohotse muri iki cyegeranyo bivugwa yari ahishwe n’ubunyamabanga bukuru bwa Loni mu kanama k’amahoro n’umutekano. Kuri ubu ngo Col Jean De Dieu Mambweni akaba akekwa, afunze, ariko nta cyaha arashinjwa.

Jean De Dieu Mambweni yabanje gutabwa muri yombi kuwa 26 Ugushyingo ariko ahita arekurwa. Gusa umwe mu bashinjwa kwica aba banyamahanga wari umukuru w’agatsiko kitwaje intwaro ndetse akaba ari n’umwicanyi witwa Vincent Manga, yari yabwiye urukiko ko uyu musirikare yabahaye intwaro.

Uyu musirikare yahise afatirwa aho, bamwambura telephones ze, ariko ahita afungurwa bidatinze nyuma yo kubijyaho impaka.

Kuri iyi nshuro nk’uko tubikesha RFI, urukiko rwa gisirikare rwatangaje ko hasohotse urupapuro rwo guta muri yombi uyu musirikare, ndetse byemezwa na Col Mambweni ubwe ku murongo wa telephone abibwira umwunganizi mu mategeko, nabyo bitungura abantu kumva ko agifite telephone kandi afunze.

Urukiko rwa gisirikare rwo ruvuga ko uyu nta cyaha yashinjijwe ahubwo hakomeje iperereza ariko yabaye atawe muri yombi. Bivugwa ko hari amajwi  y’uyu musirikare yafashwe afatana ifunguro n’izo mpuguke za Loni zishwe iminsi ibiri mbere y’uko zicwa yafashwe na Zaida Catalan. Aya majwi akaba yaroherejwe na Loni mu butabera bwa gisirikare bwa Congo.

Ni mu gihe kugeza ubu Col Mambweni yahakanaga ko atigeze abonana n’izi mpuguke mbere y’uko zicwa, atigeze azihuza n’uwitwa Betu Tshintela, wahoze akorana n’urwego rw’ubutasi rwa Congo (ANR) yaberetse nk’umusemuzi, ariko ayo majwi yafashwe agaragaza ibitandukanye.

 

Izindi wakunda

Bwiza.com