bwiza.com
Ahabanza » Rwamagana: Ruswa ishobora no gutuma abana bagwingira- Umuvunyi Mukuru  
Amakuru Politiki

Rwamagana: Ruswa ishobora no gutuma abana bagwingira- Umuvunyi Mukuru  

Kuwa Gatatu tariki ya 5 Ukuboza 2018 ku kibuga cya Polisi mu Murenge wa Kigabiro mu Karere ka Rwamagana hatangiwe ubukangurambaga bugamije gushishikariza abagore kurwanya ruswa n’akarengane ku rwego rw’intara z’iburasirazuba, aho mu butumwa Umuvunyi Mukuru Anastase Murekezi yagejeje ku bagore yabasabye kugira uruhare mu gukumira no kurwanya ibyaha bya Ruswa kuko ngo ishobora no gutuma abana bagwingira  .

Abagore biyemeje kurwanya ruswa n’akarengane ndetse  banemeza ko basobanukiwe n’ububi bwa Ruswa.

Mushimiyimana Valentine utuye mu Murenge wa Kigabiro yemeza ko abaturage b’abagore basobanukiwe ububi bwa Ruswa.

Yagize ati: “Ibiganiro batugejejeho byatumye twumva uburyo ruswa ari mbi kandi kutayirwanya bishobora kugira ingaruka ku baturage twese harimo natwe abagore ,umugore w’umutima twumvise  ko tugomba kwamagana abasaba n’abatanga ruswa kandi tugatanga amakuru ku muvunyi cyangwa polisi ,nasaba abagore bagenzi banjye kujya birinda guhishira abarya ruswa kuko idindiza iterambere ryacu.”

Mukabarisa Aisha nawe yavuze ko abagore nibagira uruhare mu kurwanya ruswa n’akarengane bizatuma Akarere ka Rwamagana gakomeza gutera imbere.

Yagize ati: “Twishimiye ibiganiro batugejejeho kandi koko twebwe ba mutima w’urugo duhagurukira kurwanya ruswa turizera ko tuzarandura ruswa bityo nkuko akarere kacu kesa imihigo mu bindi bikorwa no mu kurwanya ruswa turifuza kuba abambere kandi turashimira abayobozi bacu batwegera kandi kuba duhabwa serivisi nziza bizatuma nta muntu utanga ruswa kugirango ahabwe serivisi kandi ba mutima w’urugo turashaka gutoza abana bacu guhanira kugira ubushobozi aho gutekereza ko bazabona akazi ari uko batanze ruswa.”

Umuvunyi Mukuru, Anastase Murekezi, wari umushyitsi mukuru  yasabye abagore kwamagana abaka n’abatanga ruswa.

Yagize ati: “Ba mutima w’urugo murakenewe mu rugamba rwo kurwanya ruswa ,niyo mpamvu umugore afite inshingano zikomeye zo kwirinda ruswa kandi akamaganira kure ruswa   yakwa umugabo we cyangwa abana be ,birakwiye ko akwiye gufata iya mbere kugirango atange inama ku mugabo we cyangwa abana be  ,ruswa ni ikintu kibi kandi icyaha kidasaza  iyo yageze mu gihugu iterambere rirahagarara ishobora no gutuma abana bagwingira iterambere rigahagarara ,kuko ruswa iyo yinjiye mu muryango iba intandaro y’ibibazo byinshi niyo mpamvu dukwiririye kuyirwanya twese kugirango tugere ku iterambere igihugu cyacu kifuza.”

Icyumweru cyahariwe kurwanya ruswa mu ntara y’iburasirazuba cyatangiye tariki ya 4 Ukuboza kikazasozwa tariki ya 9 Ukuboza .

 

Justin Ngabonziza/Rwamagana

Izindi wakunda

Bwiza.com