bwiza.com
Ahabanza » Amajyaruguru: Ubuyobozi bwiyemeje gukurikirana abibye Sacco asaga miliyoni 200
Amakuru Politiki

Amajyaruguru: Ubuyobozi bwiyemeje gukurikirana abibye Sacco asaga miliyoni 200

“Ntabwo nk’Abayobozi dushobora kwemera ko amafaranga y’abaturage ahera burundu, tugomba, byanze bikunze, kugaruza izo nguzanyo zatanzwe na SACCOs zitishyurwa”, ibi ni ibyagarutsweho na Guverineri w’Intara y’Amajyaruguru, Hon Gatabazi Jean Marie Vianney, kuwa Gatatu tariki ya 12 Ukuboza 2018 mu nama yamuhuje n’Abacungamutungo ba SACCOs zo mu Mirenge 89 igize Intara y’Amajyaruguru. Iyi nama yari igamije kuganira ku mikorere ya SACCOs no gufata ingamba z’uburyo izo SACCOs zarushaho kunoza imikorere yazo.

Nyuma yo kugaragarizwa ko muri SACCOs hari ibibazo bijyanye n’inguzanyo zatanzwe zitishyurwa n’ibijyanye n’amafaranga asaga miliyoni magana abiri yibwe muri izo SACCOs, ahanini bigizwemo uruhare n’abakozi bazo, Guverineri Gatabazi yasabye ko abahawe inguzanyo ndetse n’abagize uruhare mu kwiba amafaranga ya SACCOs bagomba gukurikiranwa bakayagarura, kuko Leta itakwemera ko amafaranga y’abaturage ahera burundu.

Yagize ati, ”Ntabwo nk’Abayobozi dushobora kwemera ko amafaranga y’abaturage ahera burundu, tugomba, byanze bikunze, kugaruza izo nguzanyo zatanzwe na SACCOs zitishyurwa ndetse n’abagize uruhare mu kwiba SACCOs tugomba kubakurikirana bakagarura amafaranga bibye”.

Guverineri Gatabazi yavuze ko SACCOs zifitiye akamaro kanini abaturage kuko zibimakazamo  umuco wo kuzigama no kuguza, bityo zikaba ari imbarutso y’iterambere rirambye ry’abaturage. Yaboneyeho gusaba Abacungamutungo ba SACCOs kwimakaza umuco wo gutanga serivisi nziza ku banyamuryango no guharanira ko SACCOs bayobora zitera imbere.

Yagize ati, “SACCOs zinjiye mu buzima bw’abaturage kuko zabaye impinduramatwara y’imitekerereze y’abaturage ku bijyanye no kuzigama no kwaka inguzanyo. Ndabasaba rero gukora akazi kanyu neza mutanga serivisi nziza ku banyamuryango babagana no gukora cyane mugateza imbere SACCOS muyobora”. Guverineri Gatabazi yongeyeho ko kugira ngo ibyo bazashobore kubigeraho bibasaba gukunda akazi bakora kandi bagaharanira buri gihe kugira icyo bongera ku byo basanzwe bakora.

Mu bindi bibazo byagaragajwe SACCOs zifite, harimo izahawe ibibanza na Leta ariko zikaba zaragowe no kubona ibyangombwa by’ubutaka, ikibazo cy’uburinzi buhenze, ikibazo cy’inguzanyo zitangwa muri gahunda ya VUP, aho usanga abayobozi b’inzego z’ibanze baba bashaka ko zihabwa abantu bose n’abadafite ubushobozi, nyuma bananirwa no kwishyura ntibazifashe kwishyuza n’ibindi

Kuri ibi bibazo n’ibindi byagaragajwe, Guverineri w’Intara y’Amajyaruguru yijeje Abacungamutungo ba SACCOs ko azabakorera ubuvugizi ku babishinzwe kugira ngo bibashe gukemuka.

Twabamenyesha kandi ko ku ruhande rwabo, nyuma y’inama zitandukanye bagiriwe na Guverineri Gatabazi n’abandi Bayobozi bitabiriye inama, Abacungamutungo ba SACCOs zo mu Ntara y’Amajyaruguru biyemeje gukosora ibitagendaga neza mu mikorere yazo.

 

Izindi wakunda

1 Igitekerezo

Imicungire mibi ya za SACCO iratanga isomo kuri RCA na BNR - bwiza.com 03/06/2019 9:00 am at 9:00 am

[…] Tariki 15 Ukuboza 2018: Ubuyobozi bw’intara y’Amajyaruguru bwiyemeje gukurikirana abibye Sacco asaga miliyoni 200 […]

Subiza

Tanga Igitekerezo

Bwiza.com
error: Alert: Ntabwo byemewe!!