bwiza.com
Amakuru Politiki

Kamonyi: Abakora muri VUP barinubira uburyo bubi bahembwamo

Abaturage bahawe akazi muri VUP bavuga ko nubwo bahembwa amafaranga make ngo nayo batajya bayabonera igihe cyangwa ngo bayahabwe yuzuye.

Aba baturage bagejeje iki kibazo cyabo kuri Minisitiri w’Ubutegetsi bw’Igihugu, Prof .Shyaka Anastase ubwo yasuraga imirenge ya Nyamiyaga na Mugina muri aka karere ku wa kabiri tariki 18 Ukuboza 2018, bavuga ko bahawe akazi muri VUP kugira ngo bajye babona amafaranga abafasha mu mibereho yabo ya buri munsi, none ajya kubageraho ibibazo byararushijeho kwiyongera.

Elia Rwagasore, ni umwe mu bakora iyo mirimo utuye mu murenge wa Nyamiyaga, avuga ko bahembwa ibihumbi 10 ku kwezi nayo yita make, ariko ngo bagenda bayahembwa nabi bigatuma ntacyo abamarira.

Agira ati « Nta mafaranga aba make agirwa make na nyirayo, mwadushyize ku bihumbi 10 ku kwezi turabyihanganira ariko ikibazo dufite ni uko nayo tutayabona, niba tugize amezi abiri cyangwa atatu bataduhemba ntibayaduhera rimwe, baraza bakaduha ibihumbi 10 gusa andi agasigaramo”.

Avuga ko nubwo bahembwa nabi bitababuza gukomeza akazi, ati “Turakomeza tugakora, bazongera kwishyura bakaduha makeya gutyo gutyo kandi dufite abana turihirira ndetse n’ibindi bibazo tuba dufite mu ngo zacu”.

Min. Prof. Shyaka yasabye umuyobozi w’aka karere ka Kamonyi, Alice Kayitesi kugisubiza maze ashimangira ko bagize ikibazo cy’amafaranga yatinze kuva muri Minecofin.

Agira ati “bariya baturage ni abakora imirimo y’amaboko bafite intege nkeya byumvikane ko amafaranga yabo baba bayakeneye ariko impamvu batishyuriwe ku gihe twari twagize ikibazo cy’amafaranga yatinze kuza ava muri Minecofin ariko turakomeza kubikurikirana turabizeza ko bazayaduha vuba bakishyurwa neza kandi ku gihe».

Aba bahawe imirimo y’amaboko yo gukora ni abaturage batishoboye bo mu kiciro cya mbere n’icya 2 cy’ubudehe ariko bagifite imbaraga zo gukora, iyi gahunda yo kubaha akazi igamije kubafasha kwikura mu bukene aho bakora imirimo itandukanye yiganjemo iyo gusukura imihanda bagahembwa.

Uyu muyobi w’akarere yijeje Minisitiri ko azabikemura vuba kandi ngo kazamugezaho raporo y’uko bamaze kubona amafaranga yabo.

Izindi wakunda

Bwiza.com
error: Alert: Ntabwo byemewe!!