bwiza.com
Amakuru

Kamonyi : Min. Prof Shyaka arasaba abaturage guharanira kugira umuryango utekanye

Minisitiri w’Ubutegetsi bw’Igihugu, Prof Shyaka Anastase, arasaba abaturage b’akarere ka Kamonyi guharanira kugira umuryango mwiza utekanye bita ku mibanire myiza, birinda amacakubiri ndetse n’ amakimbirane yo mu ngo.

Ibi Min. Prof Shyaka yabibasabye ubwo yagakoreragamo uruzinduko, agasura imirenge ya Mugina na Nyamiyaga, bityo akabashishikariza  gukora cyane baharanira kurwanya ubukene, birinda ibiyobyabwenge n’ibindi byatuma umuryango udatekana.

Agira ati« isaso y’iterambere umusingi w’iterambere ni imibanire myiza y’abaturage ,ni umutekano usesuye ,ni umuryango utekanye ,aho niho bihera. Niba mushaka iterambere mugomba gukomera ku mutekano kandi byose bihera mu muryango, umuryango utarimo amakimbirane uha abana uburere bwiza, aho abana barya bakijuta kandi bagashisha bagakura neza».

Umuyobozi w’Intara y’Amajyepfo,  Emmanuel K.Gasana avuga ko muri iyi ntara hariho gahunda y’umudugudu umwe w’ikitegererezo muri buri karere uzafashwa kwihuta mu iterambere. Hatoranijwe imidugudu 101 mu mirenge 101 aho abayobozi b’uturere basinyanye amasezerano n’abayobozi bayo mu gukemura ibibazo bibugarije.

Guverineri Gasana avuga ko mu mezi atandatu bizaba byacyemutse, mu  mwaka  umwe imidugudu yose yo mu Ntara y’Amajyepfo ikazaba iri ku kigero kimwe cy’ iterambere rishimishije nta bibazo bicyugarije abaturage nko kubura ubwisungane mu kwivuza, kutagira ubwiherero, isuku n’isukura n’umwanda.

Yagize ati«Tuvuye mu nama y’umushyikirano hari umurongo washyizweho ariko by’umwihariko dufatanije n’abaturage twasabwe gufatanya cyane kurwanya ubukene, kurwanya imirire mbi, kurwanya amakimbirane mu ngo no kurwanya ko abana bata amashuri».

Mbere yo kuganira n’abaturage Minisitiri Prof.  Shyaka Anastase yasuye abahinzi b’umuceli bo mu gishanga cya Mukunguri ndetse n’uruganda ruwutunganya anerekwa uko hakorwa amakara akorwa mu bishishwa by’umuceli, asaba abaturage bo muri iyi mirenge kwitabira kuyacanisha hagamijwe guteza imbere ibikorerwa iwabo.

 

Izindi wakunda

Bwiza.com
error: Alert: Ntabwo byemewe!!