bwiza.com
Ahabanza » Kasai: Ibiro by’ishyaka riri ku butegetsi byibasiwe, umuntu aricwa
Amakuru Politiki

Kasai: Ibiro by’ishyaka riri ku butegetsi byibasiwe, umuntu aricwa

Kuri uyu wa Kabiri ushize umuntu umwe yiciwe mu myigaragambyo yadutse muri Congo hagati yamagana umukandida w’ishyaka riri ku butegetsi, PPRD mu gihe habura iminsi micye amatora y’umukuru w’igihugu akaba muri iki gihugu.

Imyivumbagatanyo yadutse mu mujyi wa Tshikapa, uherereye muri Kasai yo Hagati, yasize inangije bikomeye ibiro bikuru by’ishyaka PPRD nk’uko ababibonye babitangarije itangazamakuru.

Uburyo  uwo muntu yapfuyemo buravugwa bitandukanye, gusa umwe mu miryango itegamiye kuri leta uhakorera watangaje ko abasirikare barashe amasasu bagerageza gutatanya ikivunge cy’abigaragambyaga mu mujyi, barasa umugore w’umucuruzikazi mu isoko ry’aha hantu mu mutwe.

Andi makuru yemeje ko koko hapfuye umuntu mu myigaragambyo ariko ntasobanura uko uwapfuye yishwe. Ni mu gihe ku ruhande rw’ubuyobozi ho ntacyo baremeza nk’uko iyi nkuru ya AFP ikomeza ivuga.

Imyivumbagatanyo yongeye kwaduka nyuma y’aho undi muntu yari yishwe abandi basaga 80 barakomereka muri weekend muri uyu mujyi wa Tshikapa n’ubundi.

Umuyobozi w’uwo muryango utegamiye kuri leta yagize ati: “Abasirikare, bari barimo gufasha polisi, bafunguye umuriro ngo batatanye abigaragambya. Umugore wari urimo kugurisha imyembe ku isoko rya Sokajik yafashwe mu mutwe.”

Nyuma y’ibi bibazo, ibikorwa byo kwiyamamaza by’umukandida Emmanuel Shadary byari biteganyijwe muri uyu mujyi byahise bisubikwa, mu gihe hari hategerejwe ko umutekano wongera kuboneka.

Abakandida bagera kuri 21 nibo benda guhatanira kuzasimbura Perezida Joseph Kabila uri ku butegetsi kuva mu 2001 mu matora ateganyijwe ku Cyumweru itariki 23 Ukuboza.

 

 

Izindi wakunda

Bwiza.com