bwiza.com
Ahabanza » Kayonza :Abaturage barasabira umutanzaniyakazi gusubirana n’umugabo bakabafasha
Amakuru Politiki Umuryango

Kayonza :Abaturage barasabira umutanzaniyakazi gusubirana n’umugabo bakabafasha

Mu kagari ka Rukara mu karere ka Kayonza, haravugwa umugore ufite inkomoko muri Tanzaniya washakanye n’umunyarwanda, nyamara nyuma yo gutahuka mu gihugu nyirabukwe akaba ashaka kumwirukana agatandukana n’umugabo. Ni ikibazo cyagarutsweho mu nteko y’abaturage, basaba umugabo gusubirana n’umugore we bakabona kubafasha.

Muri iyi nteko yanitabiriwe n’umuyobozi w’akarere ka Kayonza wungirije ushinzwe imibereho y’abaturage Harerimana Jean Damascene, umugabo witwa Habimana Innocent ahingutse mu nteko y’abaturage agendera ku kibando, nyuma y’iminsi yari amaze ataboneka aha I Rukara. Abaturage bari bamaze kuvuga ko nyina umubyara yamuhishe ngo abone uko yirukana umugore bashakaniye Tanzaniya akamuzana mu Rwanda, Flora Zawadi.

Nta kindi gitumye Habimana agaruka mu ruhame, ni uko umugore yari amze gutanga ikirego mu nteko avuga ko umuryango w’umugabo umujujubya ushaka kumwirukana ngo asubire Tanzaniya, akaba yari amze iminsi asembereye kwa Secari.

Zawadi Flora wambaye ubururu ari kumwe n’umugabo we Habimana Innocent uzamuye ukuboko

Akagambane k’umuhungu na nyina

Mu guhinguka abaturage biganjemo abagore bahise bamuha inkwenene. Ageze imbere y’inteko yitaje umugore we wari uhagaze imbere atanga ikirego. Ariko umuyobozi w’akarere wungirije ushinzwe imibereho y’abaturage amusabye kwegera umugore we.

Mu kwisobanura, Habimana agira ati, “uyu ni umugore wanjye ariko yavuye mu rugo kandi aziko navunitse, nagiye kwiyungisha. Naragarutse mbona ararenga n’igipfurumba ku mutwe n’umwana akuruye, kubera imvune sinabasha kumwirukaho ngo mugarure”.

Akomeza agira ati, “amaze kugenda, ku cyumweru mama yarambwiye ati ariko ko udaheruka gusura nyoko wanyu, nahise njya kumusura, ibyo bavuga ko natorotse sibyo”.

Aha abaturage bahise basakuriza rimwe, bisa n’ibisobanura ko ari kubeshya.

Arongera ati, “nasize uyu mugore atongana na nyirabukwe ntazi icyo bapfa, ariko iyo aza guca bugufi akumva ibyo nyirabukwe avuga nta kibazo kiba cyarabaye….”. Abaturage bati kweeeeee.

Aya magambo Habimana yisobanuramo, umuyobozi w’inama njyanama y’umurenge wa Rukara Sanyo Ndimbati Desire ayita “amacuragahinda”, niko kubaza Habimana niba abo baturage basakuza bamwanga bose, arabihakana.

Perezida wa njyanama yungamo ati, “ niko sha, uzanye umugore umukuye iwabo Tanzaniya, uraje umuragije inkoni, urangije umuteza umuryango, wumva hari uwabyemera muri iki gihugu?”

Ati, “hari n’umwe raaa?”, abaturage bavugira rimwe bati “ntaweeee”.

Maze ati, “tega amatwi sha, uyu mugore uramwirukana ajye he? Iyo uzanye umugore umuhetse ku bitugu, mukabyarana ntuba ukimwururukije. Tanga umutekano w’uyu mugore n’abana be, kuko ntibaranaba abawe, bazaba abawe watuje”. Amashyi y’urufaya ngo” kaci kaci kaci kaci”.

Abaturage batanze ibitekerezo baza kwanzura ko uyu mugore akurwa kwa nyirabukwe, umugabo akamushakira indi nzu babanamo, bakazamwifashiriza atakibana na nyirabukwe; kandi uyu muryango ugomba gushakirwa isambu.

Umuryango wa zimurinda ubyara Habimana watahutse mu gihugu mu 1995 uvuye Tanzaniya utuzwa mu mudugudu wa Rukara, ariko Habimana we yasigayeyo aza muri Nyakanga 2018 azanye na Zawadi umugore we n’abana babiri.

 

 

 

 

 

 

 

 

 

 

 

 

 

 

 

 

Izindi wakunda

Bwiza.com