bwiza.com
Ahabanza » Igitekerezo: Ikibazo cy’inda ziterwa abangavu gikeneye ingamba za buri wese
Featured Umuryango

Igitekerezo: Ikibazo cy’inda ziterwa abangavu gikeneye ingamba za buri wese

Inda ziterwa abangavu zigira ingaruka nyinshi ku buzima bwabo, imiryango yabo n’igihugu muri rusange, ku buryo hadafashwe ingamba cyaba icyorezo mu muryango nyarwanda. Ihungaba rivamo kubura ubuzima, abana bavuka badafitiwe urukundo rw’ababyeyi bombi, badafite uburenganzira bwo kumenya ba se, kandi batandikwa mu bitabo by’irangamimerere; ndetse izi nda ziba intandaro y’amatiku n’inzangano mu miryango. Akaga abakobwa baterwa inda bahura nako, uwabyita ishyano ntiyaba akabije cyane.

Imibare iravuga

Nubwo nta mibare ya nyuma ifatika kubera ko bamwe mu bayobozi b’inzego z’ibanze bayihisha (CLADHO), n’ihari iteye inkeke.

Mu mwaka wa 2016, Minisiteri y’ubuzima yagaragaje ko abana 17444 bari hagati y’imyaka 16 na 18 batewe inda. Aba ni abamenyekaniye kwa muganga, ntihabariwemo ababyariye mu rugo ndetse n’abazikuyemo. Ntiharimo kandi abazitewe bari munsi y’imyaka 16 kandi nabo barahari.

Ubushakashatsi bwa CLADHO mu mwaka wa 2016, bwagaragaje ko abakobwa 818 batewe inda mu mirenge 52 gusa bwakorewemo. Aba barimo kuva ku myaka 11(4%) kugeza kuri 18(23%).

Aba bana kandi 63% baba biga amashuri abanza n’ayisumbuye, ariko 5% gusa muri bo nibo basubira mu ishuri nyuma yo kubyara.

Muri uyu mwaka wa 2018, umuryango Haguruka nawo wakoze ubushakashatsi bwamuritswe mu Ugushyingo, ugaragaza ingaruka z’iki kibazo mu ntara y’uburasirazuba, zirimo akato gahabwa aba bakobwa, no kucibwa mu miryango ndetse no mu matorero basengeramo. Abaziterwa 76,1% ni abakene, kuko 44.2% babarizwa mu cyiciro cya mbere cy’ubudehe, naho 31,9% ni abo mu cya mbere.

Mu mwaka wa 2017, akarere ka Gatsibo kabaruye abakobwa batewe inda batagejeje imyaka 18, bagera ku 1200(abageze kwa muganga gusa). Ariko nyuma bagiye kubareba, basanga abakiri muri aka karere ari 648 gusa. Umuyobozi w’ishami ry’ubuzima mu karere, Habiyaremye Jean Claude we avuga ko “abandi baba ari abakomoka mu tundi turere baje kubyarira mu mavuriro n’ibitaro biri muri aka karere”.

Mu murenge wa Kigabiro, akarere ka Rwamagana, Reseau des femmes ifasha abakobwa babyaye bagera kuri 45, muri 92 bahari(kuva 2015). Mu murenge wa Musha nawo wo muri aka karere, abazitwaye muri uyu mwaka bagera kuri 23.

Mu kagari ka Cyarubare, umurenge wa Kabare mu karere ka Kayonza, hababaruwe abagera kuri 74, naho mu ka Rubumba hari ishyirahamwe ry’abagera kuri 21.

Bimwe mu bibazo inzego n’abashakashatsi birengagiza

1.”Umwana uvutse agakura atari kumwe n’ababyeyi bombi akura nabi, abura urukundo(affection) rwa kibyeyi. Mu gihe umubyeyi umwe babana ahora mu gahinda ko yaratereranywe, naho umwana agahora yibaza irengero ry’undi mubyeyi. Ibi bimugiraho ingaruka mu mikurire myiza y’ibitekerezo”(byemezwa Dr Muhire Philbert, umuyobozi w’ibitaro bya Rwamagana).

Aha niho benshi bibaviramo kuba abarakare, bakajya mu mihanda bakanywa ibiyobyabwenge ngo biyibagize ibibazo. Bivugwa ko abakora iterabwoba, ibyihebe n’ibyigomeke biganjemo abantu babayeho gutya.

Umwana wakuze muri ubu buryo akinana igihunga yahuranya bushotoranyi (agressif), kandi aba akina na bagenzi be babayeho mu rukundo rwa kibyeyi rwuzuye.

  1. Umubyeyi wabyaye umwana akabura ubushobozi akamushyira se, nawe asigara mu gahinda, hakaba ubwo yifuza kumubona bitagishoboka. Uyu mubyeyi atangira kwishinja icyaha kandi wenda yarabikoreshejwe n’imibereho mibi.
  2. Umwana warezwe n’abo yita ababyeyi atari bo, agera ubwo ashaka kumenya ukuri. Iyo aguhishwe nabyo bimugiraho ingaruka, hakaba n’ubwo ahawe amakuru atari yo muri iyo nzira yo gushaka ukuri, nabyo bikamucanga.
  3. Mu gutinya ibihano biremereye biteganyirizwa uwateye inda umwangavu, bamwe mu bagabo baziteye bata ingo zabo bagahunga. Imiryango yabo isubira inyuma mu bukungu kuko umwe mu bayikoreraga avuyemo. Uwari ufite abana batatu agatera inda, abo bana bane bose babaho nabi.
  4. Amatiku n’inzangano mu miryango biba byinshi iyo umuryango umwe ushinja undi kuwangiriza umwana, kuwufungishiriza umwana cyangwa gutuma umwe mu bawugize atoroka.

Ubuhamya bw’abakobwa n’abagore bahuye n’akaga burimo inyigisho

Musambira kamonyi: umukobwa w’imyaka 12 yariyahuye nyuma yo guterwa inda mu bukene. Iwabo bahise bamuha agakono ke akarya yiciriye incuro kandi yonsa. Bimunaniye yashyiriye umwana se, ajya i Kigali gushaka akazi ko mu rugo. Agezeyo amashereka yamubanye menshi igituza kirabyimba, abamukoresha bamusaba kujya kuzana umwana bakabana, agakora akazi anonsa. Agiye gusaba umwana, aho kumumuha baramukubise, asubiye iwabo baramwamagana, birangira yanditse urwandiko ariyahura (bivugwa na CLADHO).

Kisaro Rulindo: umukobwa w’imyaka 17 yatewe inda n’umumotari wo mu kagari ka Mubuga. Mukase yahise amuha inzu ye n’amashyiga ye akajya yihahira agateka. Umugabo yaje gufatwa afungirwa kuri sitasiyo ya Tumba, nyuma aza kurekurwa.

Abagiraneza bakurikiranye wa mukobwa, basaba ko umwana yapimwa ADN bakareba ko wa mumotari ari we se koko.

Habura umunsi umwe ngo ibizamini bitangwe, umwana yafashwe n’indwara itunguranye bukeye arapfa, na wa mumotari aratoroka. Umurambo w’umwana wamaze ukwezi mu bitaro bya Byumba, bakavuga ko ugipimwa.

Umubyeyi yari mu gihirahiro yibaza niba yarapfushyije kandi atarashyingura umwana we.

Nyuma umurambo warabonetse urashyingurwa. Muri bwa buzima bwo kwicira incuro ngo abeho, wa mukobwa yasamiyemo indi nda, ubu ni imvutsi.

Nyanza ya Butare: uyu we ni umugore ukuze, arashengurwa n’agahinda k’umwana yahaye se kubera ubuzima bubi. Ubu umwana amaze kugira imyaka 19, aherukana na nyina afite amezi 9. Ubu uwo yita nyina ni nyirasenge, naho nyina arashaka uburyo yabonana n’umwana we, umwana nawe uzi ko nyina ari umwe, “uwamureze akamukuza”.

Kamabuye Bugesera: kuri pasika y’uyu mwaka, umukobwa wigaga mu mwaka wa kabiri w’amashuri yisumbuye yasambanyijwe n’uwari ishinzwe kumurinda, aho yari afungiye mu kigwi cya nyina wacuruzaga inzoga bita ‘igikwangari’. Uwo bari bafunganywe avuga ko yajyanywe saa tatu z’ijoro akagarurwa mu rukerera; naho nyina umubyara ahamya ko umwana yamubwiye ko iryo joro yasambanyijwe, akanahakura inda.

Inda yaje gukurwamo, nyuma yo kugerageza uburyo bwa gakondo bikanga, uwayimuteye yamujyanye i Musanze mu murenge wa Muko, atumirizwa ibinini Gisoro muri Uganda, inda ivamo. Uyu mwana nta cyizere ko aho azashakira azabasha kubyara kubera ibikomere yaba yarasigiwe n’ubwo buryo bwose. Uwayimuteye amwizeza ubufasha, ku buryo umuryango wirinda kubivugaho cyane.

Mwogo Bugesera: umukecuru w’imyaka 65, arera abana batatu b’umwuzukuru we ufite uburwayi bwo mu mutwe. Uyu mukobwa ngo ajya mu tubari akarara aho abonye, abagabo bagafatira ku burwayi afite, bakamusambanya bakamutera inda, yabyara akazanira umukecuru utishoboye utanafite imbaraga. Ubu abana babaye batatu, bafite imirire mibi kuko ajya gufata amata ku kigo nderabuzima cya mwogo.

Kigabiro Rwamagana: mu kagari ka Sibagire, uyu mukobwa ntagira amano n’intoki. Yabyaye afite imyaka 15, yatewe inda n’uwari abacumbikiye we na nyina. Uyu ngo yafatwaga nka musaza we, kuko bakuze abareba, yarabahaye icumbi ku buntu ku buryo yisanzuraga. Amaze kumutera inda, yihakanye umwana, ngo kuko hari undi mugabo wagendaga muri urwo aje kureba nyina. Ubu ari mu itsinda rya 45 rifashwa na Reseau des femmes mu murenge wa Kigabiro.

Rukara Kayonza: umukobwa wo mu mudugudu wa Kinunga II mu kagari ka Rukara, yatewe inda afite imyaka 16, ayiterwa n’uwo abaturanyi bita “umukire waje avuye i Rwamagana”. Uyu mugabo yarafashwe arafungwa nyuma ararekurwa.

Rwinkwavu Kayonza: uyu wo mu kagari ka Mukoyoyo, we yatewe inda yujuje imyaka 18, ayiterwa na murumuna wa sebuja aho yakoraga i Kabarondo. Mu gusama umukobwa yamenyesheje umuhungu arabyemera, ariko ngo yibeshye amatariki umuhungu aramwihakana. Ati, “kubera ko byari ubwa mbere ntabizi, nibeshye amatariki. Namubwiye ko nzabyara mu kwa cyenda, mbyara mbere tariki 14/8”. Gusa uyu mukobwa agaya abahungu b’iki gihe, ngo barushwa urukundo n’abakecuru bababyara. Ati, “babaye ibisambo, ni gute umukecuru udashoboye yemera umwana, umusore ufite imbaraga zo gukora akamwihakana?”Uyu musore akora akazi k’ubunyonzi mu mujyi wa Rwamagana.

Kigabiro Rwamagana: uyu we ni umugore umaze kugira abana bane ku bagabo batatu. Afite imyaka 30, umugabo wa mbere babyaranye kabiri baratandukana kubera inkoni. Uwa kabiri ngo, “yari umwarimu w’incuke, umwana wanjye bari bamwirukanye nabuze amafaranga y’ishuri, aza mu rugo kumufata arimusubizamo, akajya anamuzana. Yaranyimenyereje antera inda, maze kubyara aranyihakana, turaburana birangira atorotse”.

Rubona Rwamagana: uyu mwana w’imyaka 15 yaterewe inda mu Nyakabanda ya Kigali/ Nyamirambo, aho yakoraga akazi ko mu rugo. Yatewe inda n’umukozi mugenzi ahita atoroka. Yakoreraga umumotari ufite umugore ucuruza mituyu, bahise bamwirukana batanamuhembye. Ageze iwabo, mu muryango w’abana 7 washyizwe mu cyiciro cya gatatu, ntagira mituweli. Ubwo twamusuraga muri Werurwe, yari agitwite, amatama n’ibirenge byarabyimbye kubera ubuzima bubi.

Cyarubare Kabare: mu karere ka Kayonza, ku myaka 15 yigaga mu mwaka wa kane w’amashuri abanza, atuye mu kagari ka Rubumba. Yatewe inda n’umusore wamufatiye mu nzira ava ku ishuri, ngo “hari mu gihe cy’ibizamini”. Iyo atanga ubuhamya, amarira amutanga imbere. Ati, “Umuryango wacu uri mu cyiciro cya gatatu, papa ajya guhinduza bakamusaba umutobe[inyoroshyo] kandi nta mafaranga afite”. Akimara kubyara umusore yaratorotse ajya kwibera i Kabarondo, babwira abayobozi kumushaka bagasaba ‘umutobe’.

Kabarore Gatsibo: uyu we ntazi n’isura y’uwayimuteye. Nubwo yari agejeje imyaka 18, yavuye iwabo agiye gutashya mu ishyamba i Gabiro, ahahurira “n’uruva gusenya”. Ati, “ haje abashumba batatu, abana twajyanye umwe arabirukankana, nsigarana na mugenzi wanjye w’imyaka 16. Bagize ibyo bagira, ku bw’amahirwe uwo mugenzi wanjye we nta nda yahakuye. Urumva uwayinteye sinamumenya, ubu nta n’abashumba bakiba muri ririya shyamba”.

Cyarubare Kabare: uyu w’imyaka 17, arasiragira ku kagari mu manza n’umugabo wamuteye inda, amusanze mu rugo ababyeyi badahari. Gusa burya ngo “aho yonnye ihoramo”, umugabo ngo yaje kubigira akamenyero, umukobwa nawe ngo ntacyo yaramiraga ko yari yarasamye. Ubu amaze ukwezi abyaye, araburana n’uwo mugabo ufite abana batatu, uvuga ko “azemera kumufasha bamaze gupima ADN”.

Kabarondo Kayonza : ku myaka 14, umwana w’umukobwa yagiye gukora akazi ko mu rugo aterwa inda na sebuja, “yahengereye umugore adahari, asambanyiriza muri dushe, yemera kuzafasha. Inda imaze gukura umugore we aranyirukana mpita nigira iwacu’’.

Uyu mugabo yemera ko yabikoze kandi agafasha umwana, nk’uko yanabyemereye ababyeyi b’umukobwa, ariko ati, “kuba yarashatse undi mugabo nibyo wenda bishobora kutera ikindi kibazo’’.

Umwana amaze gucuka, nyina yamutahanye mu nzu, abura intama n’ibyuma. Se w’umwana yahagaritse ubufasha, umugabo wa nyina nawe ati, “mushyire se”, rubura gica.

Rwamagana: ubu haravugwa umugabo w’umuherwe usambanya abakobwa mbere yo kubaha akazi. Bwa mbere yarafashwe ararekurwa, ngo “habuze utanga ikirego”, nyamara abakobwa barenga batandatu bamaze gukorerwa ibya mfura mbi, n’ubuyobozi burabizi. “Bene amaguru ngizo inkwavu”.

Amategeko yabuze abo ahana, kandi ibyaha bikorwa

Muri iki gitekerezo twirinze gutangaza amazina y’abantu, dukoresha ay’ahantu; ngo dutungire agatoki abafite icyo bakora.

Amategeko arengera abana baterwa inda arahari kandi akakaye, ariko ntabona abo ahana, nubwo imibare y’abaterwa inda ikomeza kwiyongera. Ikibazo cy’umuco, duhishirane, gutinya ibihano biremereye, abayobozi badashaka kwiteranya, ibimenyetso bidapfa kuboneka, ibiciro byo gupima ADN bihanitse; ndetse n’amakuru adahagije ku bijyanye n’ubufasha bwakorerwa abangavu batewe inda.

Iri ni ihurizo ariko rireba abanyarwanda benshi: ababyeyi, abarezi, abana ubwabo, inzego z’ibanze, abashinzwe umutekano, abatanga ubufasha mu by’amategeko, imiryango itari iya leta, abashyiraho amategeko ndetse n’itangazamakuru.

Buri wese mu mwanya akinamo, buri ntore ku ruhembe irasaniraho, hari icyakorwa:

Niba itegeko riremereye bakaritinya, kuki ritahinduka aho kubaho ridahana kandi ibyaha bikorwa?

Niba biri mu muco guhishirana, kuki imiryango itakumvikana hagakorwa inyandiko, ariko umwana uvutse akagira uburenganzira kuri se na nyina, kandi uyu mwangavu agafashwa mu buzima, agasubizwa mu ishuri akiga akaziteza imbere?

Niba itegeko rihawe agaciro, abamenyekanye bakurikiranwe, abakekwa bapimwe ADN (ku buntu cyangwa ku giciro gito) urwikekwe rushire, abantu babane mu mahoro. Tubifurije Umwaka mushya muhire wa 2019.

Karegeya Jean Baptiste

 

Izindi wakunda

Bwiza.com
error: Alert: Ntabwo byemewe!!